SİYASƏT


Qətərdə yaşayan soydaşlarımızla görüş keçirilib

Bakı, 11 fevral, AZƏRTAC

Diasporla İş üzrə Dövlət Komitəsinin nümayəndə heyəti Qətərdə yaşayan azərbaycanlılarla görüşüb.

Dövlət Komitəsindən AZƏRTAC-a bildiriblər ki, görüşdən əvvəl nümayəndə heyəti ölkəmizin Qətərdəki səfirliyində ümummilli lider Heydər Əliyevin büstünü ziyarət edib, qarşısına gül dəstələri düzüblər.

Dövlət himnimizin səsləndirilməsi ilə başlayan görüşdə Diasporla İş üzrə Dövlət Komitəsinin fəaliyyətinə həsr olunmuş videoçarx nümayiş etdirilib.

Tədbirdə çıxış edən Dövlət Komitəsinin sədri Fuad Muradov rəhbərlik etdiyi qurumun fəaliyyəti, həyata keçirilən layihələr, 29 ölkə üzrə Koordinasiya şuralarının təsis olunması, 11 ölkədə Azərbaycan evinin yaradılıb soydaşlarımızın istifadəsinə verilməsi və layihələrlə bağlı Azərbaycan Diasporuna Dəstək Fonduna müraciət olunması qaydaları barədə ətraflı məlumat verib.

Qətərdə Azərbaycan icmasının bir ildir yarandığına diqqəti cəlb edən soydaşlarımız Dövlət Komitəsinin sədrinə diaspor təşkilatının mütəşəkkilliyinə və sistemli şəkildə fəaliyyətinə nail olunmasının yolları, erməni lobbisinin ölkəmizə qarşı apardığı təxribatların qarşısının alınması üsulları barədə çoxsaylı suallar ünvanlayıblar.

Komitə sədri bildirib ki, diaspor fəaliyyətinin kökündə vətənpərvərlik dayandığı üçün bu iş soydaşlarımız tərəfindən daim aparılmalıdır. Xaricdə yaşayan soydaşlarımızın Vətənimizin maraqlarının müdafiə edilməsi, Azərbaycan həqiqətlərinin dünyada təbliğ olunması, erməni lobbisinin ölkəmizə qarşı çirkin niyyətlərinin qarşısının alınması ilə bağlı bütün təşəbbüslərinin Dövlət Komitəsi tərəfindən dəstəkləndiyi vurğulanıb.

Soydaşlarımızın milli kimliyinin qorunması və mədəni irsimizin təbliği sahəsində aktiv fəaliyyətinə görə Mehdiyeva Nazənin Adıbala qızına Dövlət Komitəsi adından təşəkkür plaketi təqdim edilib.

Tədbirdə Azərbaycanın Qətərdəki səfiri Rəşad İsmayılov da iştirak edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.