CƏMİYYƏT
Region gəncləri “Könüllü qonaq” təşəbbüsü çərçivəsində tədbirləri uğurla davam etdirirlər
Bakı, 18 fevral, AZƏRTAC
Azərbaycan Prezidenti İlham Əliyevin Sərəncamı ilə 2020-ci ilin ölkəmizdə “Könüllülər ili” elan olunması ilə əlaqədar region gənclərinin bölgələrdə həyata keçirdikləri “Könüllü qonaq” təşəbbüsü uğurla davam etdirilir.
Gənclərin İnkişaf və Karyera Mərkəzindən AZƏRTAC-a bildiriblər ki, gənclərimizin böyük həvəs və məsuliyyətlə qatıldıqları təşəbbüs çərçivəsində növbəti tədbirlər Qax, Quba və Lənkəran gəncləri tərəfindən həyata keçirilib.
Gənclər həmin rayonlarda yaşayan və xüsusi qayğıya ehtiyacı olan növbəti sakinlərin evlərinə baş çəkiblər. Evdə təmizlik işləri aparan, həyətdə və bağda səliqə-sahman yaradan gənclər ev sahibi ilə xoş və maraqlı vaxt keçiriblər. Onlar ölkəmizin digər şəhər və kəndlərində yaşayan gəncləri də #konulluqonaq təşəbbüsünə qoşulmaq barədə çağırış ediblər.
Xatırladaq ki, bu təşəbbüs xüsusi qayğıya ehtiyacı olan ailələrin və tənha şəxslərin evlərinə baş çəkərək təmizlik işlərinin aparılması, evlərdə, həyətlərdə və bağlarda səliqə-sahman yaradılmasını nəzərdə tutur.