CƏMİYYƏT


“Respublika Gənclər Debat Forumu: Payız 2018”in qalibləri mükafatlandırılıb

Bakı, 3 dekabr, Həsrət Mahmudova, AZƏRTAC

Gənclər və İdman Nazirliyinin və “Vətəndaş Cəmiyyətində Debat” İctimai Birliyinin (DVC) tərəfdaşlığı ilə Milli Debat Proqramı çərçivəsində reallaşdırılan “Respublika Gənclər Debat Forumu: Payız 2018” layihəsinin bağlanış və qaliblərin mükafatlandırılması mərasimi keçirilib.

AZƏRTAC xəbər verir ki, tədbirin açılış mərasimində çıxış edən ADA Universitetinin prorektoru Fariz İsmayılzadə qonaqları salamlayaraq, debatın gənclərin və tələbələrin ictimai fəallığında və təhsil həyatındakı rolundan söz açıb.

Gənclər və idman nazirinin müavini İntiqam Babayev uğurla yekunlaşmış “Respublika Gənclər Debat Forumu: Payız 2018” münasibətilə gəncləri təbrik edib, Prezident İlham Əliyevin gənclərə göstərdiyi diqqət və qayğıdan danışıb.

Sonra nazir müavini layihə ərzində fəaliyyəti ilə seçilən gənclər və idman idarələrini, Gənclər evlərini və regional debat mərkəzlərini də təbrik edib, onlara gələcək fəaliyyətlərində uğurlar arzulayıb.

Prezident Administrasiyasının gənclər siyasəti və idman məsələləri şöbəsinin böyük məsləhətçisi Həmid Nəsirov çıxışında bildirib ki, cəmiyyətdə aktual olan debat prosesində iştirak edənlər bir-birini dinləmək qabiliyyətinə malik olmalı, fikirlərini mədəni şəkildə çatdıra bilməlidirlər. Debat forumu bu baxımdan gənclər uçun həm xaricdə, həm də ölkə daxilində biliklərini artırmaq, fikirlərini çatdıra bilmək üçün gözəl təşəbbüsdür.

Layihə çərçivəsində görülmüş işlər barədə məlumat verən DVC-nin sədri Ələkbər Mustafayev bildirib ki, “Dövlətlərin sahib olduğu hərbi gücün sivil münasibətlərin inkişafında rolu” mövzusunda aparılan debatlar uğurla başa çatıb. Azərbaycan Respublikasının Prezidenti İlham Əliyevin 2017-ci il 16 may tarixli “Azərbaycan Xalq Cümhuriyyətinin 100 illik yubileyi haqqında” Sərəncamına əsasən reallaşdırılan “Respublika Gənclər Debat Forumu: Payız 2018” çərçivəsində Bakıda və 12 regionda, o cümlədən Sumqayıt, Gəncə, Şəki, İsmayıllı, Qusar, Lənkəran, Mingəçevir, Şəmkir, Ağdam, Biləsuvar, Şirvan və Sabirabadda yerləşən ali və orta ixtisas təhsili müəssisələrində min gəncin iştirakı ilə təlimlər, turnirlər və forumlar keçirilib.

Sentyabrdan start götürmüş “Respublika Gənclər Debat Forumu: Payız 2018” layihəsi çərçivəsində oktyabrda gənclərə debat təlimləri, həmçinin təlimçilər və hakimlər üçün treninqlər təşkil olunub. Təlimlər nəticəsində gənc debatçılar universitetlərdə daxili turnirlərdə güclərini sınayıblar. Həmçinin debat hakimliyi hüququnu qazanmış tələbələr turnirlərdə hakimlik ediblər.

“Bakı Gənclər Debat Forumu: Payız Kuboku 2018” layihəsinin Azərbaycan bölməsi üzrə qalibi Bakı Dövlət Universitetinin “Əl-qərəz”, rus bölməsi üzrə qalibi isə “Angeli Dıyavola” komandaları olublar.

Daha sonra Bakı çempionluğunu qazanmış “Əl-qərəz” komandası ilə final görüşündə Gəncə şəhərini təmsil edən komandası qarşılaşıblar. “Respublika Gənclər Debat Forumu: Payız 2018” layihəsinin qalibi “Əl-qərəz” komandası oyunda qalib gəlib.

Sonda qaliblərə mükafatlar təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.