CƏMİYYƏT


Rokuelle Herron: Məqsədimiz gəncləri narkotiklərdən istifadənin fəsadları barədə daha çox məlumatlandırmaqdır

Bakı, 16 aprel, AZƏRTAC

Narkotiklərlə Mübarizə üzrə XXXVI Beynəlxalq Konfransın (IDEC) “Tələbatın Azaldılması Təhsil Proqramı” kimi proqramlarının həyata keçirilməsində əsas məqsəd gəncləri narkotiklərdən istifadənin təhlükəli fəsadları barədə daha çox məlumatlandırmaqdır.

Bu fikri AZƏRTAC-a müsahibəsində Amerika Birləşmiş Ştatlarının Narkotiklərlə Mübarizə İdarəsinin San-Dieqo şəhərində fəaliyyət göstərən əməkdaşı, IDEC Konfransının “Tələbatın Azaldılması Təhsil Proqramı”nın təşkilatçısı Rokuelle Herron deyib.

Rokuelle Herron bildirib ki, o, ABŞ-ın Ədliyyə Departamentinin Narkotiklərlə Mübarizə Administrasiyasında bu sahədə 30 illik təcrübəyə malikdir. Bakıda Arif Hüseynzadə adına 20 nömrəli tam orta məktəb-liseydə “Mən öz gələcəyimi seçirəm” mövzusunda keçirdiyi mühazirənin sayca 540-cı təqdimat olduğunu və indiyədək təxminən 95 min şagird və tələbə qarşısında çıxış etdiyini deyən Rokuelle Herron qeyd edib ki, azərbaycanlı gənclərin qarşısında təqdimatla çıxış etməsindən məmnundur.

Təqdimatın məqsədi barədə danışan amerikalı mütəxəssis diqqətə çatdırıb ki, tədbirin əsas hədəflərindən biri narkotiklərdən qeyri-qanuni istifadə ilə bağlı ABŞ-da olan problemlər barədə azərbaycanlı şagird və tələbələri məlumatlandırmaqdır: “Narkotiklərdən qeyri-qanuni istifadə bütün dünyada yayılmış bir problemdir və ABŞ-ın Ədliyyə Departamentinin Narkotiklərlə Mübarizə Administrasiyası dünyada bu sahədə müvafiq iş aparır”.

Bakıda keçirilən Narkotiklərlə Mübarizə üzrə XXXVI Beynəlxalq Konfransın əhəmiyyətini xüsusi vurğulayan Rokuelle Herron deyib ki, tədbir narkotiklərlə mübarizə sahəsində ölkələr arasında təcrübə mübadiləsinin aparılması və bu təhlükəyə qarşı birgə əməkdaşlığın inkişaf etdirilməsi baxımından çox önəmlidir. Rokuelle Herron bildirib ki, o, həmin konfrans çərçivəsində ABŞ Ədliyyə Departamentinin Narkotiklərlə Mübarizə Administrasiyasının dəvəti ilə ekspert kimi Azərbaycana gəlib. ABŞ-ın Ədliyyə Departamentinin Narkotiklərlə Mübarizə Administrasiyası narkotiklərlə mübarizə üzrə fəaliyyətini təkcə narkotik vasitələrin satışı ilə məşğul olanların həbs edilməsi ilə məhdudlaşdırmır, həmçinin təşkilat tərəfindən gəncləri narkotiklərdən uzaq durmağa təşviq etmək məqsədilə bu cür maarifləndirmə seminarları keçirilir. O, Azərbaycanın ABŞ-ın Ədliyyə Departamentinin Narkotiklərlə Mübarizə Administrasiyasının belə proqramı həyata keçirdiyi 10-cu ölkə olduğunu vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.