AZƏRTAC xəbər verir ki, fevralın 7-də İmişli Rayon İcra Hakimiyyətinin 2007-ci ilin sosial-iqtisadi yekunlarına həsr olunmuş hesabat yığıncağı keçirilmişdir.

Tədbir iştirakçıları əvvəlcə ümummilli lider Heydər Əliyevin abidəsini ziyarət etmiş, ulu öndərin xatirəsinə dərin ehtiramlarını bildirmişlər.

Yığıncaqda rayon icra hakimiyyətinin başçısı Əbülfəz Ağayevin məruzəsi dinlənilmişdir. Natiq “Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər)” icrası ilə əlaqədar görülən işləri nəzərə çarpdıraraq keçən il rayonda 3090 iş yerinin açıldığını bildirmişdir.

Rayonda 159,8 milyon manatlıq məhsul istehsal olunmuşdur. Bunun 84,2 milyon manatı və ya 52,7 faizi sənayenin, 51,5 milyon manatı və ya 32,2 faizi kənd təsərrüfatının payına düşür. Ümumiyyətlə, məhsul istehsalı əvvəlki illə müqayisədə 35,2 milyon manat və ya 28,3 faiz artmışdır.

Dövlət proqramına uyğun olaraq 330 kilovoltluq İmişli-Parsabad və 330 kilovoltluq İmişli-Əli Bayramlı Dövlət Rayon Elektrik Stansiyası ötürücüsü xətlərinin inşası üzrə nəzərdə tutulan işlərin yarıdan çoxu yerinə yetirilmiş, Qarabağ müharibəsi əlilləri və şəhid ailələri üçün 16 mənzilli bina istifadəyə verilmiş, Otuziki və Boşçalılar kəndlərində müvafiq olaraq 120 və 260 yerlik yeni məktəb binaları açılmış, Mirili kəndində 192, Qaralar kəndində 600 yerlik yeni məktəb binalarının, Muradalılı və Muradxanlı kəndlərində isə 260 yerlik əlavə sinif otaqlarının inşasına başlanmışdır.

Qeyd olunmuşdur ki, hesabat ilində əvvəlki illə müqayisədə 570 ton çox – 51 min 600 ton taxıl, 70 ton çox – 11 min 723 ton pambıq yığılmış, əlavə 5 qum-çınqıl istehsalı sahəsi istifadəyə verilmişdir.

Müzakirələrdə çıxış edənlər rayon icra hakimiyyətinin hesabat dövründəki fəaliyyətini qənaətbəxş qiymətləndirməklə, qarşıda duran vəzifələrdən danışmış, ölkə başçımız İlham Əliyevin yürütdüyü siyasəti qətiyyətlə müdafiə etdiklərini bildirmişlər.

Kənd təsərrüfatı naziri İsmət Abasov Azərbaycanın iqtisadi imkanlarının durmadan möhkəmlənməsini, regionun lider dövlətinə çevrilməsini faktlarla əsaslandırmış, tövsiyə və tapşırıqlarını vermişdir.

Yığıncaqda Prezidentin İcra Aparatının məsul işçisi Dəyanət Abdullayev iştirak etmişdir.