REGİONLAR
Sabirabadda aqropark yaradılır – zəmilərdən yüksək məhsuldarlıq gözlənilir FOTO VİDEO
Sabirabad, 22 iyun, Aydın Yavərzadə, AZƏRTAC
Sabirabad rayonunda “Sabirabad Pilot Aqropark” yaradılır. Aqroparkda 8 istiqamətdə təsərrüfatın yaradılması nəzərdə tutulur. Artıq əkinçilik üzrə uğurlu nəticələr var, zəmilərdən yüksək məhsuldarlıq gözlənilir.
İqtisadiyyat Nazirliyinin İqtisadi Zonaların İnkişafı Agentliyindən AZƏRTAC-ın bölgə müxbirinə bildirilib ki, “Orta fermer təsərrüfatının aqrar-sənaye klasterlərinə inteqrasiyası” pilot layihəsi çərçivəsində Sabirabad rayonu ərazisində 7544 hektar sahədə 8 investorun iştirakı ilə pilot aqroparkın yaradılması istiqamətində iş görülür. Aqroparkda müasir suvarma sistemlərinin tətbiqi ilə 500 hektar sahədə intensiv nar bağının salınması, taxıl, qarğıdalı və yonca toxumçuluğunun təşkili, taxılçılığın, həmçinin süd və pambığın ilkin emalı, qüvvəli yem istehsalı və heyvandarlıq sahələrinin yaradılması planlaşdırılır. Layihələrin həyata keçirilməsi ilə 730 yeni iş yerinin yaradılması nəzərdə tutulur.
Ərazilərinin böyük hissəsini deqradasiyaya uğramış torpaq sahələri təşkil edən aqroparkda birinci il 2075 hektar sahədə taxıl və pambıq əkini aparılıb.
Sabirabaddakı pilot aqroparkda sahibkarlıq fəaliyyətinin inkişaf etdirilməsi üçün dövlət tərəfindən bir sıra stimullaşadırıcı tədbirlər görülür və bu işlər mütəmadi olaraq davam etdiriləcək. Belə ki, dövlət vəsaiti hesabına aqroparkın suvarma suyuna olan tələbatının təmin edilməsi məqsədilə beton su kanalı inşa olunub və ərazilərin şoranlaşmasının qarşısını almaq üçün kollektor-drenaj şəbəkəsi qurulub.
Aqroparkın rezidentlərindən biri 988 hektar sahədə yaradılan “Fructus Aqropark” MMC-dir. MMC-nin direktoru İqbal Əliyev bildirib ki, əkin aparılmadan öncə burada torpaq işləri yerinə yetirilib, aqrotexniki qaydalara əməl olunmaqla lazımi tədbirlər görülüb. İlk əkin ilində yerli iqlimə uyğun toxumlardan istifadə etməklə arpa və buğda əkini aparılıb. Sahələrdən yüksək məhsuldarlıq gözlənilir.
Bundan başqa, aqroparkda qeyri-ənənəvi südçülük (keçi və dəvə südü istehsalı və ixracı) və əkinçilik təsərrüfatlarının, həmçinin emal sahəsinin yaradılması nəzərdə tutulur. Emal sahəsində paketlənmiş təzə və quru süd, pendir, qatıq və digər süd məhsulları istehsal olunacaq.
Qeyd edək ki, hazırda respublikanın 32 rayonu üzrə 239 min 312 hektar ərazidə 51 aqroparkın yaradılması üzrə işlər davam etdirilir. Aqroparkların 34-ü bitkiçilik, 14-ü bitkiçilik və heyvandarlıq, 1-i heyvandarlıq, 2-si isə emal sənayesi üzrə ixtisaslaşıb. Sözügedən aqroparklardan 44-ü artıq fəaliyyətə başlayıb, digərlərində isə layihələndirmə və ya tikinti işləri aparılır.
Aqroparkların yaradılması ölkədə yeni iş yerlərinin açılmasına böyük töhfə verir. Hazırda aqroparklarda ümumilikdə 4491 nəfər daimi, 6303 nəfər isə mövsümü işlə təmin olunub, gələcəkdə əlavə 5000-dən çox iş yerinin yaradılması nəzərdə tutulur.