REGİONLAR
Şahbuz və Ordubad yaylaqlarındakı obalardan FOTOREPORTAJ
Naxçıvan, 15 iyul, Rauf Kəngərli, AZƏRTAC
Hər il yay fəslində muxtar respublikanın müxtəlif bölgələrindən olan heyvandarlar Şahbuz və Ordubad rayonlarının ərazilərində yerləşən uca dağlara üz tuturlar. Onlar həmin dağların əhatəsində yerləşən yaylaqlarda məskən salır, obalar qururlar.
Muxtar respublikanın yaylaqları düşmənlə sərhəd ərazilərdə yerləşir. Ona görə də vaxtilə düşmənin təxribatları səbəbindən burada insanların heyvandarlıqla, təsərrüfat işləri ilə məşğul olmaları mümkün deyildi. Ötən illərdə qüdrətli Əlahiddə Ümumqoşun Ordunun strateji yüksəkliklərdə yaratdığı möhkəm müdafiə sistemi bu gün ailə təsərrüfatlarının yaylaqlarda sərbəst fəaliyyətinə şərait yaradıb, həmin ərazidə obalar salınıb.
Oba sakinləri AZƏRTAC-ın Naxçıvan bürosunun əməkdaşına müsahibələrində deyiblər ki, biz daim dövlətin qayğısını üzərimizdə hiss edirik. Yaylaqlardan rahat və təhlükəsiz istifadə edirik. Məhsulumuzun bazarı vardır. Bu gün ailələrimizlə bu yaylaqlarda məskən salmağımızın bir səbəbi də ordumuza, əsgərlərimizə olan güvənimizdir. Bilirik ki, torpaqlarımız göz bəbəyi kimi qorunur. Bu gün xalqımızla ordumuz arasındakı birliyin bir nümunəsini də oba sakinləri ilə burada xidmət edən əsgərlər arasında yaratmışıq. Qüdrətli ordumuz güvən yerimiz, dayağımızdır. Biz də çalışacağıq ki, təsərrüfatlarımızı daha da genişləndirək, ölkəmizin inkişafında pay sahibi olaq.
Qeyd edək ki, baytarlar və kənd təsərrüfatı mütəxəssisləri mütəmadi olaraq yaylaqlarda olur, təbii sərvətlərimizdən səmərəli istifadə ilə bağlı oba sakinləri arasında söhbətlər aparılır, tövsiyələr verilir. Bütün bunların nəticəsidir ki, təsərrüfatlarda saxlanılan mal-qaranın və heyvanların cins tərkibi yaxşılaşdırılır, məhsuldarlıq artırılır. Bundan başqa, oba sakinlərinə məişət və tibbi xidmət də göstərilir. Həkimlər sakinlərin səhhəti ilə maraqlanır, onları müayinə edir, lazımi məsləhətlərini verirlər. Eyni zamanda, yaylaqlarda istifadəsinə daha çox ehtiyac olan qida məhsulları da onlara təklif edilir.
AZƏRTAC-ın Naxçıvan bürosu füsunkar təbiətin qoynunda yerləşən obalardan hazırladığı fotoreportajı təqdim edir.