CƏMİYYƏT
Şahin Rəhmanlı: “İrəli” İctimai Birliyi il ərzində 40 layihə həyata keçirib
Bakı, 7 dekabr, Həsrət Mahmudova, AZƏRTAC
“İrəli” İctimai Birliyi gənclərin hərtərəfli inkişafı, Vətənə sadiq, sağlam, rəqabətədavamlı və milli ruhda formalaşması istiqamətləri üzrə 13 ilə yaxındır fəaliyyət göstərən aparıcı gənclər təşkilatlarından biridir. Fəaliyyətə başladığımız ilk gündən əsası ulu öndər Heydər Əliyev tərəfindən qoyulan və dövlətimizin başçısı tərəfindən uğurla davam etdirilən dövlət gənclər siyasətinin daha geniş şəkildə həyata keçirilməsinə töhfələrimizi verməyə çalışırıq. Bu məsuliyyət “İrəli”nin öz fəaliyyətini planlı şəkildə davam etdirməsinə əsaslı zəmin yaradıb.
Bunu “İrəli” İctimai Birliyinin sədri Şahin Rəhmanlı rəhbərlik etdiyi təşkilatın cari ildəki fəaliyyətinin yekunları ilə bağlı AZƏRTAC-a məxsusi açıqlamasında bildirib.
İctimai Birliyin 2021-ci ildə də qarşıya qoyulan hədəflərə nail olduğunu vurğulayan Ş.Rəhmanlı deyib: “Təşkilat olaraq məhsuldar fəaliyyət göstərdik. Gənclərin hərtərəfli inkişafına töhfə vermək məqsədilə bir il ərzində 40 genişmiqyaslı layihə həyata keçirilib. Cari ilin əvvəlində keçirilən “Tarixin canlı şahidləri”, “Məndən başlanır Vətən!” və “Onun gözündən Azərbaycan” adlı tədbirlər gənclərdə 1990-cı illərin əvvəllərində ölkəmizdə baş vermiş hadisələr, Birinci Qarabağ müharibəsi, Xocalı soyqırımı və onun tanıdılması, sonrakı dövrdə ordu quruculuğu haqqında aydın təsəvvürün formalaşdırılması məqsədi daşıyıb. Ümumilikdə 500-dən çox “İrəli” gənci adıçəkilən tədbirlərə qoşulub. Pandemiyanın ölkədə və dünyada geniş yayılması gənclərin asudə vaxtının səmərəli təşkili, rəqəmsal marketinq üzrə bilik və bacarıqlarının inkişaf etdirilməsi, onlayn resurslar haqqında məlumatlılığının artırılması istiqamətində həyata keçirilən “Rəqəmsal ay” (All Digital Month) layihəsinə müraciətləri daha da stimullaşdırdı. Layihə çərçivəsində ümumilikdə 650-dən çox gəncin müraciəti qeydə alınıb. Onlardan 517-si həyata keçirilən tədbirlərdə iştirak hüququ qazanıb”.
“İrəli” İctimai Birliyinin sədri qeyd edib ki, Azərbaycan gəncliyinə ümummilli lider Heydər Əliyevin keçdiyi ömür yolunu aşılamaq məqsədilə müxtəlif fəaliyyətləri özündə birləşdirən “Action Week” layihəsi çərçivəsində “Ulu Öndərlə keçmiş və bu gün” adlı fotokonkurs həyata keçirilib. Gənclərimizi 1918-ci ildən Zəfər Günümüzə aparan yolun nə qədər şərəfli və bir o qədər də çətin olması haqqında məlumatlandırmaq məqsədilə “Tarixin ədaləti: Cümhuriyyətdən Böyük Zəfərə Azərbaycan” layihəsi icra olunub. Gənclərimizə komandada işləmə bacarıqlarını aşılamaq və intellektual oyunlara maraqlarının artırılması üçün “Nə? Harada? Nə zaman?”, informasiya texnologiyaları sahəsində təhsil alan və bu sahəyə marağı olan gənclərə ilkin anlayışlarla bağlı maarifləndirmək məqsədilə “Introduction to IT” layihələri də uğurla başa vurulan layihələr sırasındadır.
Qeyd olunub ki, “İrəli” İctimai Birliyi gənclərdə sağlam həyat tərzinin formalaşması, onlara Zəfər ruhunun aşılanması, gənclərin intellektual bilik və bacarıqlarının artırılması, rəqabətədavamlı və hərtərəfli inkişafı istiqamətində qısa müddətdə böyük uğurlara imza atıb. Belə ki, təşkilat il ərzində 600-dən çox gənci əhatə edən “Birlik turniri”, “Marş İrəli-Göygöl”, “YayFest: Vətənpərvərlik düşərgəsi”, “Gənclər Kuboku: Hərb Oyunları”, “Marş İrəli-Naxçıvan” kimi genişmiqyaslı layihələrin təşkilatçısı və tərəfdaşı olub. Bununla yanaşı, Vətənimizin ərazi bütövlüyü uğrunda canından keçən şəhidlərimizin ailələri “Müzəffər Əsgərimiz” layihəsi çərçivəsində ziyarət olunub, igid qəhrəmanlarımızın şücaəti, sarsılmaz Vətən eşqi videoçarxlar vasitəsilə ölkə ictimaiyyətinə çatdırılıb.
İctimai Birliyin sədri vurğulayıb ki, Azərbaycan gəncliyinin siyasi, iqtisadi və humanitar sahələrdə biliklərini artırmaq, onların hərtərəfli inkişafı və maarifləndirilməsinə dəstək olmaq məqsədilə keçirilmiş “Gənclərin siyasi savadlılığının artırılması” layihəsi, sosial iş ixtisası üzrə təhsil alan və bu sahədə özünü inkişaf etdirmək, həmçinin praktiki biliklərə yiyələnmək istəyən gənclər üçün reallaşdırılan “Essentials of social work” və bir sıra digər layihələrin icraları da uğurla həyata keçirilib. Eyni zamanda, gənclərin asudə vaxtının səmərəli təşkili, mövcud pandemiya şəraitində fərqli istiqamətlər üzrə maarifləndirilmələri, gənclər üçün daha yaxşı imkanların yaradılması, təlimçilər, fasilitatorlar, müəllimlər və eləcə də gənclərlə işləyən şəxslərin, gənclər təşkilatları və mərkəzlərinin fəaliyyətlərini daha yaxşı təşkili üçün resursların yaradılması üzrə Birlik tərəfindən işçi qrupları yaradılıb. Bu layihə çərçivəsində indiyə kimi onlarla gənclə iş mövzusuna aid kitablar dilimizə tərcümə edilib, beynəlxalq təcrübə araşdırılır və qabaqcıl təcrübələr işimizə tətbiq edilir. Gənclərin ehtiyaclarının müəyyənləşdirilməsi üzrə sorğuların təşkili, maraq dairələrinə uyğun məqalələrin hazırlanması da bu qəbildən görülən işlərə aiddir.
“Bu günlərdə “İrəli” İctimai Birliyi “İZ” layihəsinin keçirilməsinə hazırlaşır. Layihənin məqsədi adından görüldüyü kimi, Azərbaycanın dövlətçilik tarixində, ordu, mədəniyyət, milli-mənəvi dəyərlər, incəsənət, sənətkarlıq, elm tarixində iz qoymuş əlamətdar hadisələr, görkəmli şəxsiyyətlərin gənclərə tanıdılması, Azərbaycanın və onun xalqının nə qədər qədim və sağlam köklərə sahib olduğunu aşılamaqdır.
“İrəli” İctimai Birliyinin qarşısına qoyduğu əsas fəaliyyət istiqamətlərindən danışan Şahin Rəhmanlı bildirib ki, bu istiqamətlərdən biri də sağlam düşüncəli gəncliyin inkişafına nail olmaq, onların fəaliyyətlərinin stimullaşdırılması və innovativ təşəbbüslərinin dəstəklənməsi istiqamətində də gənclərə yaxından dəstək göstərmək və layihə təkliflərinin həyata keçirilməsinə münbit şərait yaratmaqdır. Ümumilikdə keçirilmiş layihələr çərçivəsində 13 min 236 gəncin müraciətinə baxılıb. Onlardan 6493-ü birbaşa olaraq layihələrdə iştirak hüququ qazanıb. İştirakçıların 70 faizdən çoxu region gəncləri olub. Layihələr müddətində müxtəlif mövzularda 160 təlim sessiyası təşkil edilib. Əlamətdar günləri özündə əks etdirən 25 müxtəlif təlim proqramı, həmçinin 27 tədbir vasitəsilə ümumilikdə 1300-dən çox gənc görüşlərdən yararlanıb.
“İrəli” İctimai Birliyi fəaliyyətinin daha geniş auditoriyaya çatması məqsədilə mətbuat orqanları ilə də sıx əməkdaşlıq edir. Birliyin son bir il ərzində 75 mövzuda xəbəri 50-dən çox kütləvi informasiya vasitələrində işıqlandırılıb, 10-dan çox qəzetdə 41 nüsxədə, 9 müxtəlif televiziya kanalında 21 verilişdə yer alaraq mütəmadi reallaşdırılan tədbirlər barədə gənclər məlumatlandırılıb.
“Düşünürəm ki, bir il ərzində məhsuldar və səmərəli fəaliyyət göstərdik. Gördüyümüz işlərlə bağlı nəticələr onu deməyə əsas verir ki, biz seçilən gənclər təşkilatlarından olduq. Pandemiyanın yaratdığı çətinliklərə baxmayaraq, genişmiqyaslı layihələrimizlə yenə də regionlarda gənclər üçün faydalı işlər görməyə, bizə çatmayan gənclərə çatmağa çalışdıq. Keyfiyyətli iş ortaya qoyaraq dövlət-QHT özəl əməkdaşlığını qurduq, hesabatlarımızda hər zaman xüsusi olaraq seçildik. Pandemiya dövrünə baxmayaraq, beynəlxalq fəaliyyətimiz dayanmayıb, 15-ə yaxın “İrəli” gənci bu fəaliyyətlərdə iştirak edib. Üç gəncimiz Avropa Həmrəylik Korpusu proqramı üzrə uzunmüddətli könüllülük proqramında iştirak edib. Onların ikisi Almaniyada, biri isə Avstriyada könüllülük təcrübəsindən yararlanıb. Daha bir “İrəli” üzvü Polşaya göndərilib. Gənclərimiz qısamüddətli beynəlxalq layihələrdə də iştirak ediblər. Buna misal olaraq altı gəncimiz Trabzon şəhərində keçirilən “XXI əsrin problemlərinə reaksiya” adlı “Erasmus+” layihəsində, bir gəncimiz “Youth for Exchange and Understanding” beynəlxalq təşkilatı tərəfindən Brüsseldə həyata keçirilən 2022-2025-ci illər üzrə stratejik planlaşdırma görüşündə və daha bir gəncimiz həmin təşkilatın Yunanıstanın Saloniki şəhərində təşkil etdiyi “Disconnect - take your power back” layihəsində iştirak edib”, - deyə Ş.Rəhmanlı deyib.
İctimai Birliyin sədri, həmçinin vurğulayıb ki, region gəncləri ilə fəal işləyən təşkilat olaraq növbəti il üçün də planlar hazırdır və gələn il regionlardakı fəaliyyət daha da genişləndiriləcək: “Bu illər ərzində həyata keçirilən tədbirlər, gənclər təşkilatlarının bir-biri ilə səmərəli əməkdaşlığı, dövlətin bu sahədə dəstəyi gənclərin hərtərəfli faydalanması və inkişafına gətirib çıxararaq 30 ilə yaxın davam edən həsrətə son qoyan tarixi missiyanın gerçəkləşdirilməsində böyük rol oynadı. Ölkə gəncliyi ötən il 44 günlük İkinci Qarabağ müharibəsi dövründə Müzəffər Ali Baş Komandanın ətrafında sıx birləşərək, Vətənimizə, milli-mənəvi dəyərlərimizə sadiqliyini bütün dünyaya nümayiş etdirdi. Heç şübhəsiz, Azərbaycanın bu uğurları qazanmasında, o cümlədən müzəffər xalq, rəşadətli Ordu və qalib gəncliyin formalaşmasında Ulu Öndərimizin əsasını qoyduğu dövlət gənclər siyasətinin təsiri danılmazdır. Əminik ki, bundan sonra da, bu istiqamətlərdə fəaliyyətlərimizi uğurla davam etdirəcəyik. Bu dəfə isə daha əmin addımlarla - qalib gəncliyin nümayəndələri kimi! Şüarımız isə dəyişməzdir: “Daim irəlidə, “İrəli” ilə birgə olmaq”.