Bakı, 3 aprel, AZƏRTAC

Qida Təhlükəsizliyi Agentliyi Salyan rayonunda sahibkarların maarifləndirilməsi ilə əlaqədar tədbir keçirib.

Agentliyin informasiya təminatı və innovativ həllər şöbəsindən AZƏRTAC-a verilən məlumata görə, tədbir iştirakçılarına agentliyin fəaliyyət istiqamətləri, o cümlədən qida sahəsində çalışan subyektlərin qida təhlükəsizliyi qeydiyyatına alınması qaydaları haqqında məlumat verilərək bildirilib ki, qeydiyyatdan keçən sahibkarlıq subyektləri Qida Təhlükəsizliyi Agentliyi tərəfindən daim nəzarətdə saxlanılır və onlarla sıx əməkdaşlıq edilir.

Müasir kəsim məntəqələrinin yaradılması və bu sahədə fəaliyyət göstərən sahibkarlara agentlik tərəfindən dəstək göstəriləcəyi iştirakçıların diqqətinə çatdırılıb. Tədbirdə Qida Təhlükəsizliyi İnstitutunun göstərdiyi xidmətlər barədə də sahibkarlara geniş məlumat verilib.

Görüşdə qida zəncirinin bütün mərhələlərində fəaliyyət göstərən sahibkarlıq subyektlərinin və qida məhsulları istehlakçılarının maarifləndirilməsi işinin bundan sonra da davam etdiriləcəyi bildirilib.

Tədbirdə sahibkarları maraqlandıran suallara cavablar verilib və onların qarşılaşdıqları problemlərin həlli istiqamətində fikir mübadiləsi aparılıb.