CƏMİYYƏT
Səbinə Cabarova: “Könüllülər ili” yaşından, sosial statusundan asılı olmayaraq hər kəs üçün bir şansdır
Bakı, 15 yanvar, AZƏRTAC
Prezident İlham Əliyev “Azərbaycan Respublikasında 2020-ci ilin “Könüllülər ili” elan edilməsi haqqında” Sərəncam imzalayıb. Bu ilin “Könüllülər ili” elan edilməsi könüllülük fəaliyyətinin ölkəmizdə daha da genişlənməsinə şərait yaradacaq. Düşünürəm ki, bu il mövcud olan, könüllülük fəaliyyəti ilə məşğul olan təşkilatlar, hərəkatlar öz fəaliyyətini daha da genişləndirəcək. Həmçinin bizim sıralarımıza yeni-yeni təsisatlar qoşulacaq ki, bu da ölkəmizdə könüllü fəaliyyəti üzrə mühitin zənginləşməsinə dəstək verəcək. Bu ilin də məhz könüllülərə həsr edilməsi ölkə başçısı tərəfindən gənclərimizə ayrılan diqqətin bariz nümunəsidir. Bu sahədə görüləcək işlər, atılacaq addımlar ölkə gəncliyinin inkişafına təkan verəcək və onların özlərini təsdiq etmələrində böyük rol oynayacaq. Həmçinin onu da vurğulayım ki, biz hər zaman könüllü deyəndə gəncləri nəzərdə tuturuq. Zənnimcə, “Könüllülər ili” təkcə gənclər üçün yox, həmçinin yaşından, sosial statusundan asılı olmayaraq hər kəs üçün bir şansdır.
Bu sözləri AZƏRTAC-a müsahibəsində “ASAN Könüllüləri” Təşkilatının sədri Səbinə Cabarova deyib.
“Əslində könüllü olmaq üçün xüsusi bilik və bacarıqlara ehtiyac yoxdur. Könüllülük daxildən gələn hissdir. Əgər bir insan təmənna güdmədən cəmiyyətə öz töhfəsini vermək istəyirsə, bunun üçün spesifik meyar mütləq deyil. Lakin söhbət strukturlaşmış təşkilatlara könüllü müraciətindən gedirsə, o zaman bu, fərdin fəaliyyət göstərmək istədiyi sahədən asılıdır. Nümunə olaraq deyə bilərəm ki, “ASAN Könüllüləri” sırasına qoşulmaq üçün dövlətçiliyi, vətənpərvərliyi, peşəkarlığı özünə dəyər bilən təşəbbüskar vətəndaşlara üstünlük verilir”, - deyə S.Cabarova bildirib.
Təşkilatın sədrinin sözlərinə görə, hazırda gənclər təkcə təhsil müəssisələrində yiyələndikləri biliklərlə kifayətlənmir və çox erkən yaşlarda təcrübə qazanmağa, bilik və bacarıqlarını artırmaq, öyrəndikcə öyrətməyə, cəmiyyətə, dövlətə faydalı olmağa can atırlar. Onların böyük qismi də “ASAN xidmət” mərkəzlərində könüllü fəaliyyətə qoşulur, vətəndaşlara xidmət göstərir, sosial əhəmiyyəti layihələr təşkil edir və bu cür layihə və tədbirlərin iştirakçısına çevrilirlər. Bununla da könüllülər yeni əlaqələr qurur, peşəkar bacarıqlara yiyələnir, dövlət institutlarının vahid iş mexanizmi ilə yaxından tanış olur və bu kimi bir sıra imkanlardan faydalanırlar.
Onun sözlərinə görə, “ASAN Könüllüləri” Təşkilatı şaxələnərək öz fəaliyyətini genişləndirir və hər il öncəki illərə nisbətən daha çox yeni işlərə, uğurlara imza atmaq üçün çalışır: “Altı illik fəaliyyət dövrü müddətində çox mühüm layihələrə imza atmışıq. Bunlara nümunə olaraq 500 gənci hərbi təlimlərə yiyələndirən “Hərbiyyə” hərbi-vətənpərvərlik düşərgəsi, ölkəmizin 50-ə yaxın şəhər və rayonlarından olan 5 min gəncin şəxsi inkişafına təkan verən “Könüllülər Yurdu-Azərbaycan”, 4 ildə ölkəmizin dörd bir tərəfindən 4 min uşağın arzusunu gerçəkləşdirən “ASAN Məktub”, vətənimizin keşiyində duran əsgərlərimizə 80 mindən çox dəstək mesajları ünvanlayan “Əsgərə Məktub” layihələrini qeyd edə bilərəm. “ASAN Könüllüləri” olaraq bu il məqsədimiz təşkilatın fəaliyyətini yeni müstəviyə çıxarmaqdır. Bundan sonra da Prezident İlham Əliyevin istər 2014-cü il dekabrın 16-da Sabirabaddakı Heydər Əliyev Mərkəzində keçirilən ASAN Könüllülərinin I Ümumrespublika Forumunda, istərsə də ötən il fevralın 1-də Bakı Konqres Mərkəzində keçirilən Azərbaycan Gəncləri Gününə həsr olunmuş respublika toplantısında gənclərlə görüşü zamanı verdiyi tövsiyələrə əsaslanıb, həmin məsləhətləri özümüzə rəhbər tutaraq gənclərdə vətənpərvərlik və dövlətçilik ruhunun yüksəldilməsi, bu sahədə müxtəlif dəyərlərin qazandırılması, gənclərin şəxsi inkişaflarının təkmilləşdirilməsi istiqamətində təşkilatımızın fəaliyyətinin daha da genişləndirilməsi və onların cəmiyyətimizə faydalı olmaları üçün çalışacağıq”.