CƏMİYYƏT
Səfərbərlik və Hərbi Xidmətə Çağırış üzrə Dövlət Xidmətinin gənclərimizin vətənpərvərlik ruhunda tərbiyə olunmasında rolu böyükdür
Bakı, 10 dekabr, Məhərrəm Əlioğlu, AZƏRTAC
Tarixboyu qonşu ölkələrlə dinc yanaşı yaşamağın, sülh və əmin-amanlığın, sabitliyin tərəfdarı olan Azərbaycan xalqında özünümüdafiə əzmi, döyüş rəşadəti, qəsbkarlara qarşı mübarizə ruhu hər zaman yüksək olub. Tarixin müxtəlif dövrlərində dövlət qurmaq haqqını təmin etmiş xalqımız taleyini daim inandığı nizami orduya, cəsur, mübariz sərkərdələrə, vətənpərvər oğullara etibar edib.
Azərbaycan mübariz, Vətən uğrunda canından belə keçməyə hazır olan insanların yurdu kimi tanınıb. Ona görə bu gün də hər bir azərbaycanlının hələ uşaq yaşlarından vətənpərvərlik ruhunda tərbiyə olunması mühüm əhəmiyyət daşıyır. Bunu, ilk növbədə, ölkəmizin hazırkı durumu, müharibə şəraitində yaşamağımız və torpaqlarımızın işğal altında qalması gerçəkliyi tələb edir. Vətənimizin müdafiəsi, ərazilərimizin və sərhədlərimizin toxunulmazlığı böyükdən kiçiyə bütün vətəndaşların ən əsas və əbədi borcudur.
Bu amalların və borcun bizə yetkinlik çağlarından aşılanması prosesində Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) xüsusi rolu var. Bu, Azərbaycan Prezidenti, Silahlı Qüvvələrin Ali Baş Komandanı İlham Əliyevin müəyyən etdiyi ordu quruculuğu siyasətinin yüksək səviyyədə həyata keçirilməsi işində də əsas yer tutur. Yarandığı 7 il ərzində Xidmət genişmiqyaslı tədbirlər həyata keçirir, səfərbərlik hazırlığı və səfərbərlik işinin təşkili, vətəndaşların hərbi qeydiyyata alınması, hərbi xidmətə hazırlanması və müddətli həqiqi hərbi xidmətə çağırılmasının təşkili, Silahlı Qüvvələrin çağırışçılarla komplektləşdirilməsi, gənclərin hərbi-vətənpərvərlik tərbiyəsi, müddətli həqiqi hərbi xidmətə çağırışaqədərki hazırlığı, habelə vətəndaşların qəbulu və müraciətlərinə baxılması, korrupsiyaya qarşı mübarizə, maddi-texniki və qanunvericilik bazalarının təkmilləşdirilməsi, eləcə də digər sahələrdə əhəmiyyətli nəticələr qazanıb. Xidmət Ali Baş Komandan İlham Əliyevin diqqət və qayğısı nəticəsində böyük inkişaf yolu keçərək ordu quruculuğu prosesinin təkmilləşdirilməsinə layiqli töhfə verib və bu proses hazırda davam edir.
Xidmətin ölkəmizdə hərbi-vətənpərvərlik tərbiyəsi, vətəndaşlıq hisslərinin yüksəldilməsi məqsədilə mütəmadi keçirdiyi tədbirlərin nəticəsində gənclər arasında hərbi vətənpərvərlik tərbiyəsi gücləndirilib, ordudan yayınma halları aradan qaldırılıb, bir sıra uğurlar əldə edib. “Vətənin müdafiəsinə hazıram” devizi altında keçirilən vətənpərvərlik-maarifləndirmə xarakterli kütləvi tədbirlər bu baxımdan olduqca əhəmiyyətlidir. Azərbaycanın bütün bölgələrini əhatə edən bu vacib tədbir vətənpərvərlik təbliğatının aparılması işinə müsbət təsir göstərir.
Azərbaycan Prezidentinin vətəndaşlarımızın müddətli həqiqi hərbi xidmətə çağırılması haqqında müvafiq sərəncamlarının icrasının təmin edilməsi, Silahlı Qüvvələrin müddətli həqiqi hərbi xidmət hərbi qulluqçuları ilə daha keyfiyyətli komplektləşdirilməsi üçün çağırış yaşlı vətəndaşların qanuna müvafiq qaydada çağırışa cəlb edilməsi və xidmət keçmək üçün təyin olunduqları hərbi hissələrə təhvil verilməsi də Xidmətin qarşısında duran əsas vəzifələrdəndir.
Xidmət ölkəmizdə gənclərin həqiqi hərbi xidmətə yola salınması və qarşılanması prosesini əsl bayram ovqatında təşkil edilməsini diqqətdən kənarda qoymur. Çağırış vaxtlarında gənclərin hərbi xidmətə getmək, Vətən qarşısında mənəvi borclarını yerinə yetirmək üçün böyük ruh yüksəkliyi və həvəslə Dövlət Xidmətinin yerli idarə, şöbə və bölmələrinə gəlmələri uğurla görülən işlər sırasındadır.
Səfərbərlik işinin uğurla yerinə yetirilməsi işinə son dövrlər ölkədə keçirilən hərbi təlimlər zamanı, eləcə də 2016-cı ilin Aprel döyüşlərində Xidmətin Müdafiə Nazirliyi, yerli icra hakimiyyəti orqanları və digər qurumlarla yüksək səviyyədə əlaqələndirilmiş fəaliyyəti buna misaldır. Bu təlimlər zamanı uğurla həyata keçirilən səfərbərlik prosesi Dövlət Xidmətinin öz işini günün tələblərinə uyğun qurmasından xəbər verir. Təbii ki, bütün bunlar ölkədə ordu quruculuğunun inkişafına mühüm təkan və töhfə verir.
Xidmət birbaşa fəaliyyət sahəsində uğurla çalışmaqdan əlavə, Qarabağ əlillərinə, şəhid ailələrinə, müharibə veteranlarına da xüsusi diqqətlə yanaşır. Prezident İlham Əliyevin yürütdüyü siyasətə uyğun olaraq, Dövlət Xidmətinin rəhbərliyinin Qarabağ əlilləri, şəhid ailələri, müharibə veteranlarına xüsusi diqqət göstərdiyini demək yerinə düşər.
Mühüm tədbirlərdən KİV nümayəndələri arasında Xidmətin elan etdiyi “Əsgərə məktublar” mövzusunda yazı müsabiqəsini, ümummilli lider Heydər Əliyevin xatirəsinə həsr edilmiş atıcılıq turnirini, ulu öndər Heydər Əliyevin anadan olmasının 95-ci ildönümü münasibətilə şagirdlər arasında keçirilən “Müstəqil Azərbaycanın memarı” adlı rəsm və “Müstəqilliyimiz əbədidir” adlı yazı müsabiqələrini, şagirdlər arasında Azərbaycan Silahlı Qüvvələrinin 100 illiyinə həsr edilən atıcılıq turnirini, həmçinin ölkəmizin azadlığı və ərazi bütövlüyü uğrunda qəhrəmancasına həlak olmuş şəhidlərimizin gənc nəslə tanıdılması, onların adlarının əbədiləşdirilməsini xüsusi vurğulamaq olar.
Bir sözlə, Səfərbərlik və Hərbi Xidmətə Çağırış üzrə Dövlət Xidməti əsası ulu öndər Heydər Əliyev tərəfindən qoyulan və bu gün Prezident İlham Əliyevin rəhbərliyi ilə davam etdirilən ordu quruculuğu prosesinə də əhəmiyyətli təkan verməkdədir. Xidmətin şəxsi heyəti dövlətin, xalqın və Ali Baş Komandanın etimadını doğrultmaq, üzərinə düşən məsul və şərəfli vəzifələri layiqincə yerinə yetirmək üçün bundan sonra da böyük səy və fədakarlıqla çalışacaq.
Qeyd: Yazı Səfərbərlik və Hərbi Xidmətə Çağırış üzrə Dövlət Xidmətinin yaradılmasının 7-ci ildönümü münasibətilə elan edilmiş yazı müsabiqəsinə təqdim olunur.