SİYASƏT


Səfir: Azərbaycan Ordusu işğal altındakı ərazilərini terrorçulardan təmizləməkdədir

Tehran, 15 oktyabr, AZƏRTAC 

Azərbaycanın İrandakı səfiri Bünyad Hüseynov İranın ILNA informasiya agentliyinə müsahibə verib.

AZƏRTAC xəbər verir ki, müsahibəsində səfir Azərbaycan Ordusunun əks-hücum əməliyyatına toxunub. Qeyd olunub ki, Ermənistanın çox sayda tankı, raket sistemi, müxtəlif texnikası və komanda qərargah məntəqəsi, habelə Dağlıq Qarabağda yerləşdirdiyi “S-300” zenit-raket kompleksi məhv edilib.

Diplomat diqqətə çatdırıb ki, Azərbaycan özü separatizmin qurbanıdır. Təcavüzkar separatizm Qarabağ müharibəsinin başlanmasının əsas səbəbidir. Azərbaycan hökuməti dünyanın bütün nöqtələrindəki separatizmi pisləyir. Azərbaycanın və İranın müvafiq qurumları arasında bütün sahələrlə qarşılıqlı təmaslar var. Ermənistan Azərbaycan ilə İran arasındakı mehriban münasibətlərdən və əməkdaşlıqdan məmnun deyil, ölkələrimiz arasındakı münasibətlərdə anlaşılmazlıq yaratmağa çalışır.

Səfir bildirib ki, Ermənistanın Azərbaycan ilə Türkiyənin birgə hərbi təlimlərini İran üçün təhlükə hesab etməsi gülüncdür. Çünki İran-Azərbaycan və ya İran-Türkiyə münasibətləri bu şayiələrdən korlanacaq həddən çox yüksəkdədir. Ermənilər bu cür iddialarla özlərini gülünc vəziyyətə salırlar. Azərbaycan üçün İranın şimal-qərb və ya mərkəzi, yaxud cənub vilayətləri arasında fərq yoxdur. Ölkəmiz vilayətlərin hamısını vahid İran kimi qəbul edir.

Azərbaycan İranın təhlükəsizliyini və sabitliyini öz təhlükəsizliyi və sabitliyi, İranın inkişafını isə öz inkişafı kimi qəbul edir. Azərbaycan ilə İran beynəlxalq mahiyyət daşıyan birgə iqtisadi layihələrin müəllifləridir.

Ermənistan Livan, Suriya və İraqdan erməniləri köçürərək Azərbaycanın işğal olunmuş ərazilərində məskunlaşdırır. İşğalçı ölkə təxribat xarakterli bu hərəkəti ilə başqa bir müharibə cinayəti törədir.

Ermənilər Azərbaycan mədəniyyətinin beşiyi hesab olunan Şuşa şəhərində qondarma “prezident” üçün “andiçmə mərasimi” təşkil etdilər. Qondarma rejimin “parlamenti” üçün orada inzibati bina tikmək istəyirdilər. Bu kimi hərəkətlərlə Azərbaycanı müharibəyə təhrik edirdilər. Həmçinin ermənilər on minlərlə sıravi vətəndaşı səfərbər edərək könüllü dəstələr təşkil edir, bunu ölkənin müdafiəsi üçün etdiklərini söyləyirdilər. Baş nazirləri isə açıqlamaları və hərəkətləri ilə 28 illik danışıqları prinsipcə mənasız edirdi. Əgər danışıqlar və atəşkəs ermənilər üçün mənasızdırsa, bizim üçün dünəndən mənasızdır.

Təxribat xarakterli bütün bu hərəkətlərin, eləcə də yaşayış məntəqələrinin və mülki binaların hədəfə alınması nəticəsində Azərbaycan tərəfi sülhə məcburetmə və işğal altındakı əraziləri azad etmək üçün sentyabrın 27-də səhər saatlarında əks-hücum əməliyyatına başlamağa qərar verib.

Bundan sonra Ermənistanın baş naziri dünyanın bütün ölkələrinə və bütün beynəlxalq təşkilatlara zəng edərək, hər kəsə Azərbaycanın atəşkəsi pozduğunu və onlara hücum etdiyini deyir. Əslində, günahkar özüdür. İndi də Suriya və başqa yerlərdən Azərbaycana kömək etmək üçün qüvvələr gəldiyi barədə yalan təbliğat aparır. Düşünürəm ki, Ermənistanın baş naziri özünü itirib. Belə yalanlar səbəbindən erməni əsgərləri xidmət yerlərini tərk edirlər. İndi Ermənistan hərbi polisi fərariliyin qarşısını ala bilmir. Əsgərləri səngərə və ya maşına zəncirləməklə yerlərində saxlayırlar. Virtual məkanda videogörüntülər mövcuddur.

Suriyadan və digər ölkələrdən muzdlular gətirən Ermənistandır. Hazırda Azərbaycan Ordusu işğal altındakı ərazilərimizi terrorçulardan təmizləməkdədir.

Rabil Kətanov

AZƏRTAC-ın xüsusi müxbiri

Tehran

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.