CƏMİYYƏT


Səfir Bavitlunq Vanlalvavna: Yoqa qədim Hindistanın dünyaya bəxş etdiyi misilsiz bir hədiyyədir

Bakı, 21 iyun, AZƏRTAC

Yoqa qədim Hindistanın dünyaya bəxş etdiyi misilsiz bir hədiyyədir. İllər ərzində yoqa müxtəlif bölgələrdə və cəmiyyətlərdə yayılaraq, balanslı və sağlam həyat yaşamaq üçün bir vasitə kimi bütün dünya tərəfindən qəbul olundu. Bu gün yoqa dünyanın əksər yerlərində insanlar tərəfindən edilir və hər keçən gün populyarlığı daha da artır.

Yoqanın müxtəlif cəmiyyətlərdə nail olduğu əhəmiyyətli rolunun qəbul edilməsinə və Hindistanın Baş naziri Narendra Modinin 2014-cü ilin sentyabr ayında BMT Baş Assambleyasında tarixi müraciətinə cavab olaraq, Birləşmiş Millətlər Təşkilatı 21 iyun tarixini Beynəlxalq Yoqa Günü olaraq qəbul etdi. Beynəlxalq Yoqa Günü 2015-ci ildən bəri hər il qeyd olunur. Qeyd olunan günlə bağlı Hindistanın Azərbaycandakı səfiri Bavitlunq Vanlalvavna AZƏRTAC-a fikirlərini bildirib.

Yoqanın Azərbaycanda da populyarlığının artığını deyən səfir bildirib ki, 2015-ci ildən öncədə buradakı insanlar yoqa ilə məşğul olublar. Lakin 2015-ci ildən Bakı və Azərbaycanın digər şəhərlərinin məşhur yerlərində Beynəlxalq Yoqa Gününün hər il qeyd olunması yoqanın daha da populyarlaşmasına kömək edib. Əvvəlki illərdən fərqli olaraq, keçən il koronavirus pandemiyasının baş verməsi səbəbindən 2020-ci il Beynəlxalq Yoqa Günü onlayn formatda müxtəlif yoqa tədbirləri ilə qeyd olundu.

Səfir bildirib ki, bu il 7-ci Beynəlxalq Yoqa Günü bütün dünyada “Sağlamlıq üçün yoqa” mövzusu ilə qeyd olunur. “Azərbaycanda isə Hindistanın Bakıdakı səfirliyi tanınmış yoqa müəllimləri və qurumları ilə birlikdə həm onlayn, həm də qarışıq formatda müxtəlif proqramlar təşkil edir. Sizi @indiainazerbaijan Facebook səhifəmizdə paylaşılan yoqa proqramlarımızı nəzərdən keçirməyə dəvət edirəm.

Bədəndə və zehində harmoniya yaratmaq üçün effektiv vasitə hesab olan yoqa, hər bir fərd üçün gündəlik problemlərə həll yolu tapmağa nail olmaqda önəmli rol oynayır. Yoqa mütəxəssisləri və yoqa ilə məşğul olan hər kəs COVID-19 pandemiyasının dünyaya yayıldığı bir dövrdə yoqanın yenidən aktuallıq qazandığı fikri ilə razılaşır. Bu dövrdə fiziki immuniteti və balanslı ağılı qoruyub saxlamaq xəstəliklə mübarizədə ən təsirli vasitələrdən biridir və yoqa bu istiqamətdə faydalı həll yolu ola bilər. Nəfəsalma, meditasiya və xüsusi hərəkətlərin (asanas) daxil olduğu zaman içərisində sınanmış yoqa texnikaları hər bir fərdə bədən və zehinə təsir edə biləcək xəstəliklərə qarşı müqavimət göstərməyə və sağlamlığa qovuşmağa kömək edə bilər.

Yoqanın sadəcə fiziki məşq olmayıb daha çox əhəmiyyət daşıdığını qəbul etmək önəmli məsələdir. Müntəzəm olaraq yoqa ilə məşğul olmaq bədən və zehin arasında vəhdət yaradaraq insana sakitlik bəxş edə bilər. Yoqa eyni zamanda insana fiziki gümrahlığa qovuşmasında kömək edə bilər ki, bu da ümumiyyətlə həyat keyfiyyətini yüksəldə bilər. Başlanğıc səviyyəsi olaraq hamını ümumi yoqa protokolunu (https://www.youtube.com/watch?v=Av5ib_XRKT4) izləyərək müntəzəm olaraq yoqa ilə məşğul olmağa dəvət edirəm. Hər il Beynəlxalq Yoqa Günü çərçivəsində mütəmadi olaraq nümayiş edilən bu video, fiziki və zehni tarazlığa nail olmaq üçün edəcəyiniz yoqa səyahətdə yaxşı bir başlanğıc nöqtəsidir.

Yoqa səyahətinizdə sizi daha da istiqamətləndirməsi üçün Hindistanın Baş naziri Narendra Modinin linkdə göstərilən 3D videolarına baxmağınızı və yoqa ilə məşğul olmağınızı tövsiyə edirəm.

https://www.youtube.com/playlist?list=PLKrFtLRqyz6MWIswWKBazJOux333ZMyvX .

Yoqanın dərin elmi əsası olan bənzərsiz hərəkətləri və dartınma məşqləri əzələlərdə və oynaqlarda gərginliyi azaltmağa kömək edə bilər. Yoqa ilə müntəzəm olaraq məşğul olmaq əzələləri rahatlaşdırır və bədəndə gərginliyin azalmağına kömək edir. Yoqanın nəfəsalma texnikaları insana əsl mahiyyətini kəşf etməyə və bədəndə tarazlığı düzəltməyə kömək edə bilər. Yoqa, həmçinin insanın sağlamlığa qovuşmasına və həyatda müsbət və zənginləşdirici bir dönüşüm yaratmasına kömək edə bilər”, - deyə səfir Beynəlxalq Yoqa Günü münasibətilə hamını təbrik edib və ən xoş arzularımı çatdırıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.