SİYASƏT


Səməd Seyidov: Bəziləri bədbəxt hadisələrdən, faciələrdən öz məqsədləri üçün istifadə etməyə çalışırlar

Strasburq, 27 iyun, AZƏRTAC

Çox kədərli anlardır. Bu jurnalistin zalda olan ailə üzvlərinə başsağlığı verirəm. Bilirəm ki, bu müzakirələri dinləmək onlar üçün nə qədər ağırdır. Bu, faciədir. Ancaq təəssüf ki, bəzi insanlar belə bədbəxt hadisələrdən, faciələrdən öz şəxsi niyyətləri, məqsədləri üçün istifadə etməyə çalışırlar. Bu, Avropanın bədbəxtliyidir, onun islamofobiya xəstəliyidir, tolerantlığın, qarşılıqlı anlaşma imkanının olmaması xəstəliyidir. Üzləşdiyimiz problemlər bu təşkilatın müqəddəs dəyərlərindən şəxsi məqsədlər üçün istifadə cəhdləridir.

AZƏRTAC xəbər verir ki, bu fikirləri AŞPA-nın yay sessiyasında “Dafne Karuana Qalizianın qətli və Maltada və digər ölkələrdə hüquqi dövlət: bütün həqiqətlərin işıqlandırılmasını təmin etmək” adlı məruzənin müzakirələri zamanı nümayəndə heyətimizin qurumdakı rəhbəri Səməd Seyidov söyləyib.

S.Seyidov deyib: “Burada insan hüquqlarından təzyiq məqsədi kimi istifadə olunmasına şahid olmuşuq. Bu gün hamımızın birlikdə mübarizə aparmalı olduğumuz korrupsiya ölkələrə qarşı təzyiq vasitəsi kimi istifadə edilir. Azərbaycan haradadır, Malta haradadır? Azərbaycanın Malta ilə nə əlaqəsi var? Məruzəçi Azərbaycanın adını səsləndirir, çünki Azərbaycanın Malta ilə rəsmi əlaqələri var. Böyük Britaniya Azərbaycanda ən böyük sərmayəçidir. İtaliya, Fransa ilə də ticarət əlaqələrimiz var. Bəs onda bu ölkələrin adları niyə sadalanmır? Bu, əsl məqamdır ki, məruzəçinin beynəlxalq ictimaiyyəti aldatmağa çalışdığını göstərək. Məruzəçi Azərbaycanı təhqir etmək, ölkəmizin korrupsioner olması kimi bir fikir yaratmaq məqsədi güdür. Əslində, budur korrupsiya.

Nümayəndə heyətinin rəhbəri bildirib ki, məsələ Maltada deyil, Malta çox yaxşı iş aparıb. Heç kim, heç nə əla deyil: “Üzümü həmkarlarıma tutub deyirəm ki, bu məruzənin arxasında nə dayandığını düşünün, burada məruzəçinin özünəpərəstişi durur. Belə hallara qarşı birlikdə mübarizə aparmalıyıq”.

Şəhla Ağalarova

AZƏRTAC-ın xüsusi müxbiri

Strasburq

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.