İQTİSADİYYAT
“Silk Way West Airlines” növbəti dəfə IOSA auditini keçib
Bakı, 27 fevral, AZƏRTAC
Azərbaycanın yük aviaşirkəti “Silk Way West Airlines” növbəti dəfə Beynəlxalq Hava Nəqliyyatı Assosiasiyasının (IATA) IOSA (IATA Operational Safety Audit) standartına uyğunluğu üzrə audit yoxlama prosedurunu uğurla keçib.
Aviaşirkətin mətbuat xidmətindən AZƏRTAC-a bildirilib ki, müvafiq sertifikat daha iki il müddətinə - 2021-ci ilin yanvarına uzadılıb. Bu standartın tələbləri ildən-ilə sərtləşdirilir, keçirilən audit “Silk Way West Airlines” aviaşirkətini bir daha mülki aviasiyada ən ciddi beynəlxalq təhlükəsizlik tələblərinə cavab verən etibarlı yük aviadaşıyıcı kimi təsdiqləyib.
IOSA (IATA-nın İstismar Təhlükəsizliyinin Audit proqramı) - bir neçə bölmə üzrə strukturlaşdırılan bir neçə yüz mütləq standart və tövsiyə olunan prosedurlardır. Aviaşirkət auditin keçirilməsi zamanı bu standartlara və tövsiyə olunan prosedurlara cavab verdiyini təsdiq etməlidir. Təhlükəsizlik təhlili təkcə aviaşirkətin istehsal fəaliyyətinin deyil, həm də onun təşkilati strukturunun qiymətləndirilməsini nəzərdə tutur. İnsan amili təsirindən risklərin minimallaşdırılması sistemi və düzəliş əməliyyatlarının vaxtında təmin edilməsinə imkan verən əks əlaqə sistemi nəzərdə tutulub. Aviaşirkətin hər bir əməkdaşının hərəkətləri ən xırda təfərrüatına kimi qeyd edilir ki, bu da uçuşların təhlükəsizliyinin təmin edilməsi texnologiyası haqqında danışmağa imkan verir.
“Silk Way West Airline” aviaşirkəti artıq üçüncü dəfədir ki, IOSA sertifikatını alır. Belə ki, aviaşirkət ilk dəfə IOSA sertifikatını 2015-ci ildə alıb. Aviaşirkət “Azərbaycan Hava Yolları”ndan (AZAL) sonra ölkədə IOSA sertifikatına malik ikinci aviaşirkətdir.
Audit hava daşımaları, mühəndislik və texniki xidmət, aviasiya xidmətləri, yerüstü xidmət və yük emalı, uçuşların təhlükəsizliyinin və aviasiya təhlükəsizliyinin təmin edilməsi, personalın idarə olunması və keyfiyyətin təminatı şöbələrində, həmçinin uçuşları idarəetmə mərkəzində keçirilib. IOSA auditinin başa çatması “Silk Way West Airlines” aviaşirkətinin uçuşların təhlükəsizliyi üzrə ən yüksək standartlara sadiqliyini bir daha təsdiqləyir.
2012-ci ildə yarandığı vaxtdan etibarən yük aviadaşıyıcısı bütün dünya üzrə bir çox istiqamətləri əhatə etmək məqsədilə öz marşrut şəbəkəsini daima genişləndirir. “Silk Way West Airlines” 9 “Boeing B747” təyyarəsi ilə Bakıdan Honkonq, Osaka, Seul, Dəkkə, Şanxay, Sinqapur, Kuala-Lumpur, Çikaqo, Milan, Amsterdam, Lüksemburq, İstanbul, Dubay və sair kimi əsas nəqliyyat hablarına uçuşlar yerinə yetirir.