REGİONLAR
Şimal bölgəsi üzrə ən yüksək nəticə göstərən siyəzənli abituriyent həkimliyi seçir VİDEO
Siyəzən, 29 iyun, Elxan Yusifli, AZƏRTAC
Ali məktəblərə qəbul imtahanının ilkin nəticələrinə əsasən şimal bölgəsi üzrə ən yüksək bal toplamış Siyəzən məktəblisi Samirə Qədəşova həkim olmaq istəyir.
AZƏRTAC-ın bölgə müxbiri xəbər verir ki, qəbul imtahanlarında 683 bal yığan abituriyent Siyəzən şəhər Mikayıl Müşfiq adına 2 nömrəli tam orta məktəbin məzunudur. Samirə Qədəşova buraxılış imtahanında mümkün 300 baldan 298-ni toplayıb. IV ixtisas qrupu üzrə qəbul imtahanındakı göstəricisi isə 385 baldır.
Abituriyent Azərbaycan Dövlət Tibb Universitetində Müalicə işi ixtisası üzrə təhsil almaq arzusundadır. Gələcəkdə ölkəmizdə ginekologiya üzrə mütəxəssis olmağı hədəfləyib.
“Məktəbdən sonra hazırlığa gedirdim. Növbəti günün dərslərinə axşam hazırlaşırdım. Gün ərzində iki saata yaxın istirahət edirdim. Digər əyləncələrə və sosial şəbəkələrə isə yalnız həftəsonu vaxt ayıra bilirdim. İmtahanda riyaziyyat, kimya və rus dili fənlərindən maksimum nəticə göstərmişəm. Fizikadan 2, biologiya və Azərbaycan dilindən isə bir sualı səhv cavablandırmışam. Amma ikinci şansdan da yararlanıb növbəti imtahanda iştirak etmişəm. Ümidvaram ki, nəticəm daha yaxşı olacaq. İmtahana hazırlaşan məzunlara tövsiyə edirəm ki, qarşılarına qoyduqları məqsədə çatmaq üçün səylə çalışsınlar. Qarşılarına çıxan maneələrdən çəkinməsinlər. Sona qədər mübarizə aparsınlar”, - deyə S.Qədəşova bildirib.
Samirənin hər iki valideyni müəllimdir. Anası Mətanət Qədəşova Samirənin təhsil aldığı məktəbdə biologiya fənnini tədris edir.
“Hər bir valideynin arzusudur ki, övladının belə gözəl nailiyyətlərini görsün. Biz Samirə ilə fəxr edirik. O, elə ibtidai siniflərdən çox zəhmətkeş şagird olub. X-XI siniflərdə isə daha çox oxuyurdu. Hətta kitab arxasında yuxusuz gecələr keçirib. Biz də ona həmişə dəstək olmuşuq. Samirə dərslərini yaxşı oxumaqla yanaşı, həm də təlim və tərbiyəsi ilə nümunəvi məktəbli olub. Məktəbdə müəllimləri də ondan həmişə razılıq ediblər”, - deyə Mətanət Qədəşova söyləyib.
Bu il Siyəzən rayonunun ümumtəhsil məktəblərini 350 şagird bitirib. Ali məktəblərə sənəd verənlərdən 30-u 500, 12-si isə 600 baldan yuxarı nəticə göstərib.