Bakı, 20 aprel, AZƏRTAC

Batut və tamblinq üzrə Avropa Çempionatı yaddaşlarda təkcə idman nəticələri ilə deyil, habelə Qur-Qur maskotunun fəal iştirakı ilə qaldı.

AZƏRTAC xəbər verir ki, qurbağa personajını amerikalı peşəkarlar Barri Anderson və Skott Hesinqton canlandırıblar.

B.Anderson qeyd edib ki, Avropa Çempionatına gəlmək imkanı onların karyerasında yeni təcrübə olub. “Biz, yarışların statusunu nəzərə alaraq, Bakıya gəlmək dəvətini məmnuniyyətlə qəbul etdik. Bu günədək gimnastika yarışlarında işləmək bizə müyəssər olmayıb, hərçənd keçən il Londonda yüngül atletika üzrə Dünya Çempionatına qatılmaq təcrübəmiz vardı. Burada olduğumuz ilk gündən yarışların səmimi atmosferini hiss etdik. Bizim fəaliyyət dairəmiz geniş idi, Qur-Qur maskotuna isə bütün qəlbimizlə yanaşdıq və bu personaj dərhal tamaşaçıların sevimlisinə çevrildi”, - deyə B.Anderson bildirib.

Səhnəyə hər çıxışın təqribən 30-40 dəqiqə çəkdiyini qeyd edən B.Anderson deyib: “Hazırlığın bir çox incəlikləri var, axı maskot kostyumu geyinmək o qədər də asan deyil. Bu səbəbdən S.Hesinqton ilə bir-birimizi əvəz edirdik. Bizim bir çox zarafatlar bədahətən yaranırdı, lakin tamaşaçıların reaksiyası bizi sevindirirdi. Mühüm olan, Avropa Çempionatında idmanın və incəsənətin vəhdəti idi və düşünürük ki, buna nail ola bildik. Əgər ilk gün tamaşaçılar Qur-Qurla yalnız tanış oldularsa, sonra o, turnirin ayrılmaz hissəsinə çevrildi və sevinclə qarşılandı. Deməli, bizim missiya baş tutdu”.

Skott Hesinqton öz növbəsində qeyd edib ki, onların canlandırdığı maskotların özünəməxsus hit-paradında Qur-Qur özəl yerə sahib olacaq. “Biz hamımız onu çox sevdik. Batutda tullanmanın xüsusiyyətlərinə uyğun olaraq, çempionat üçün məhz qurbağa personajının üzərində dayanan təşkilatçıların kreativliyi də xüsusilə qeyd olunmalıdır. Bizə isə Qur-Qura lətafət vermək və onu interaktiv etmək qalmışdı. O, işlədiyim personajların ən yaxşılarından biridir”, - deyə S.Hesinqton qeyd edib.

O, həmçinin diqqətə çatdırıb ki, Qur-Qur maskotu onun B.Anderson ilə ilk birgə işlərindəndir. S.Hesinqton sonda deyib: “Bu yaxınlara qədər mən Orlandoda, Barri isə Çikaqoda yaşayırdıq. Sonra biz birgə işləməyə qərar verdik, çünki maskot mədəniyyəti sadəcə əyləncə olmaqdan çıxmışdı. Bu, tamaşaçıların və azarkeşlərin yaddaşında qalan personajdır və onlar arenaya təkcə idman mübarizəsi üçün deyil, həm də öz sevimli maskotlarını görmək üçün qayıdırlar. Bakıdakı yarışlarda qazandığımız təcrübə çox xoşumuza gəldi və biz yeni personajları canlandırmaq üçün qayıtmağa hazırıq”.