İQTİSADİYYAT


“SmartPay” ödəmə sisteminə 2 yeni xidmət əlavə olunub

Bakı, 1 iyun, AZƏRTAC

Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinə məxsus “SmartPay” ödəmə sisteminə 2 yeni xidmət əlavə olunub.

Nazirlikdən AZƏRTAC-a bildirilib ki, bir çox xidmətləri vahid platformada toplayan “SmartPay” ödəmə sisteminə artıq “e-agro” Elektron Kənd Təsərrüfatı İnformasiya Sistemi və “Bakı Sığorta” Agentliyi də qoşulub. Bununla da fermerlər və sığorta etdirənlər ödənişlərini “SmartPay” vasitəsilə rahat şəkildə həyata keçirə biləcəklər.

Fermerlərin elektron ödənişlər üçün “smartpay.az” saytı üzərindən axtarış bölməsində yalnız “e-agro” yazaraq müvafiq məlumatları daxil etmələri kifayətdir. Ödənişləri şəxsiyyət vəsiqəsinin FİN kodu və ya VÖEN məlumatları üzrə həyata keçirmək mümkündür. “Bakı Sığorta” ASC-nin müştəriləri isə kasko sığortalarını etmək üçün “Sığorta xidmətləri” bölməsindən “Bakı Sığorta”nı seçməlidirlər. “Bakı Sığorta” bölməsinə kliklədikdən sonra müqavilə üzrə müştəri kodu müvafiq xanaya yazılmalıdır.

Bundan əlavə, “Android” əməliyyat sistemində çalışan mobil cihaz istifadəçiləri “Play Store”da “SmartPay Wallet” yazıb axtarış etməklə tətbiqi mobil qurğularına yükləyib ödənişlərini edə bilərlər.

“SmartPay” 400-ə qədər ödəniş təminatçısını özündə birləşdirir. Bu xidmət vasitəsilə “SmartPay” terminallarından və 1425 poçt filialından ödəniş etmək mümkündür. İstifadəçilərin fərdi məlumatlarının təhlükəsizliyinə və mühafizəsinə yüksək şəkildə təminat verən “SmartPay” ödəmə sistemi Azərbaycanın bütün ərazisini əhatə edir.

“SmartPay” vasitəsilə istifadəçilər kommunal ödənişlər, bank xidmətləri, sığorta ödənişləri, mobil cihazların qeydiyyatdan keçirilməsi üçün dövlət rüsumlarının ödənilməsi, mobil nömrələrdə balansın artırılması və sair kimi xidmətlərdən yararlana bilərlər.

Qeyd edək ki, ödənişlərin qəbzlərini yaddaşda saxlamaq istəyən istifadəçilərə qeydiyyatdan keçmək və əməliyyatları şəxsi kabinet üzərindən etmək tövsiyə olunur.

Azərbaycanın İKT yönümlü ilk qurumlarından olan Məlumat Hesablama Mərkəzi (MHM) 1974-cü ildə fəaliyyətə başlayıb. Qurum ölkəmizdə Data Analiz və Smart həllərin ilkin mərhələlərinin formalaşmasında bünövrə rolu oynayıb.

“ISO 9001:2015” beynəlxalq keyfiyyət sertifikatına malik Məlumat Hesablama Mərkəzi ölkə əhəmiyyətli bir neçə layihənin texniki operatorudur. Mərkəz Elektron İmza, Bilinq sistemi, Açıq Məlumatlar Portalı, Mobil Cihazların Qeydiyyatı Sistemi, “AzDataCom” şəbəkəsi, “Smartpay” ödəmə sistemi və sair kimi rəqəmsal xidmətlər göstərir.

Ölkəmizin rəqəmsal transformasiyası, virtual sferada güclənməsi, həmçinin yüksək texnologiyaların tədqiqi və tətbiqi qurumun strateji hədəfidir.

Məlumat Hesablama Mərkəzi haqqında daha ətraflı məlumatı “rabita.az” saytından ala bilərsiniz.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.