“Standard Insurance” şirkətinin əmlaklarının satışı ilə bağlı hərrac keçiriləcək

Bakı, 24 yanvar, AZƏRTAC

Ləğv prosesində olan “Standard Insurance” sığorta şirkətinin ləğvetmə komissiyası tərəfindən şirkətə məxsus, rekonstruksiya işlərindən sonra birləşdirilmiş 4 mənzil onların ümumilikdə satış qiyməti olan 1 milyon 150 min manatdan 25 faiz aşağı olmaqla, yəni 862 min 500 manata təkrar açıq hərraca çıxarılacaq.

Şirkətin ləğvetmə komissiyasından AZƏRTAC-a bildirilib ki, hərrac “Əmlak Hərrac Mərkəzi” MMC tərəfindən yanvarın 28-i saat 11:00-da (növbəlilik qaydasında) Bakı şəhəri, Yasamal rayonu M.Rahim 4A ünvanında keçiriləcək. Hərracda iştirak üçün satış qiymətinin 1 faizi, yəni 8625 manat məbləğində beh ödənilməlidir. Şirkətin digər əmlaklarının qanunvericiliyə və təsdiq edilmiş hərrac qaydalarına əsasən açıq hərrac yolu ilə satışının təşkili davam edəcək və bu barədə ictimaiyyətə əvvəlcədən məlumat veriləcək. Xatırladaq ki, əmlak ilkin olaraq 2 milyon manata satışa çıxarılıb.