İQTİSADİYYAT


“Star” NEZ ötən il 10,5 milyon ton xam neft emal edib

Bakı, 15 fevral, AZƏRTAC

Pandemiyaya baxmayaraq, SOCAR-ın Türkiyədəki “Star” neft emalı zavodu (NEZ) keçən il 250 milyon dollardan çox kreditin geri ödənilməsinə nail olub.

SOCAR-dan AZƏRTAC-a bildirilib ki, Türkiyənin ən böyük birbaşa xarici investoru olan “SOCAR Turkey”in törəmə müəssisəsi “Star” NEZ 2020-ci ildə qlobal pandemiya ilə bağlı məhdudiyyətlərə baxmayaraq, rekord göstəriciyə imza atıb. Emal gücü 10 milyon ton həcmində müəyyənləşdirilən “Star” istehsal planını artıraraq bu həcmi 10,5 milyon tona çatdırıb. 2020-ci ildə təxminən 10,3 milyon tonluq satış həyata keçirən zavod bu həcmin təxminən 70 faizini daxili bazara yönəldərək Türkiyə iqtisadiyyatına töhfə verib.

“SOCAR Turkey”in Emal və Neft-Kimya bölməsinin rəhbəri Anar Məmmədov “Star” NEZ-in yüksək göstəricilərini şərh edərkən deyib: “Petkim”in xammalı olan naftanın tədarükü ilə yanaşı, daxili bazarda həyata keçirdiyimiz satışlarla Türkiyənin cari kəsirinin azalmasına mühüm töhfə verdik. “Star” NEZ-də sahib olduğumuz qabaqcıl texnologiya, “Petkim”lə inteqrasiya, əlverişli rəqəmsal transformasiya modelimiz, səmərəli istehsal planı və optimallaşdırma prosesləri bu uğuru qazanmağımız üçün şərait yaratdı. Pandemiya səbəbindən təyyarə yanacağına tələbatın azalmasını nəzərə alaraq, potensialımızı sürətlə dizel yanacağına yönəldib fasiləsiz istehsala davam edə bildik. Xüsusilə, 2020-ci ilin ikinci yarısından etibarən 100 faizdən çox istehsal gücü ilə çalışaraq zavodumuzun xam neft emalı həcmini 10,5 milyon tona çatdırdıq. Bizə qürur verən bu yüksək göstəricilərə görə hər biri öz sahəsində məsuliyyətlə çalışan bütün həmkarlarıma təşəkkür edirəm”.

2020-ci ildə neft qiymətlərində azalmanın təsiri ilə emal gəlirlərinin də aşağı düşdüyünü sözlərinə əlavə edən A.Məmmədov bildirib: “6,3 milyard dollarlıq dəyəri ilə Türkiyədə real sektorun tək sahəyə yatırdığı ən böyük investisiya layihəsi olan “Star” NEZ bu çətin ildə 250 milyon dollardan çox kreditin geri ödənilməsinə nail olub. Bundan əlavə zavodumuzun anbar tutumunu və əməliyyat elastikliyini artıracaq investisiyalarımızı da davam etdiririk. Bu çərçivədə, təxminən 45 milyon dollarlıq sərmayə büdcəsinə malik olan “NEZ-in elastikliyinin, iş qabiliyyətinin və gəlirliliyinin yaxşılaşdırılması” layihəsini (IFOP) bu il başa çatdıracağıq. IFOP layihəsi ilə birlikdə ümumi dəyəri təxminən 600 milyon dollar təşkil edən və böyük hissəsi əlavə anbar tutumu ilə əlaqədar olan yeni investisiyalarımızı da 2022-ci ildə tamamlamağı planlaşdırırıq”.

Fəaliyyətə başladıqdan 1 il sonra, 2019-cu ildə İstanbul Sənaye Palatasının “Türkiyənin 500 böyük sənaye qurumu” siyahısında 5-ci yeri tutan “Star” NEZ inkişaf etmiş konfiqurasiyası sayəsində 100 növdən çox nefti emal etmək qabiliyyətinə malikdir. Türkiyədə xam neft emal edən iki müəssisədən biri olan “Star” NEZ bu baxımdan da ölkə iqtisadiyyatına mühüm töhfə verir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.