Bakı, 11 dekabr, AZƏRTAC 

Dekabrın 11-də Suraxanı Rayon İcra Hakimiyyətində 2018-2019-cu il payız-qış mövsümünə hazırlığın yekunu, qış aylarında qarşıda duran vəzifələrə həsr olunmuş rayon icra hakimiyyəti başçısı yanında Şuranın geniş tərkibdə iclası keçirilib. Bu barədə AZƏRTAC-a Suraxanı Rayon İcra Hakimiyyətindən məlumat verilib.

İcra başçısı İlqar Abbasov çıxış edərək bildirib ki, rayon təsərrüfatının payız-qış mövsümünə hazırlanması Suraxanı Rayon İcra Hakimiyyətinin fəaliyyətinin daim prioritet istiqamətlərindən biri olub, bununla bağlı zəruri tədbirlərin həyata keçirilməsi üçün bir sıra işlər görülüb. Mövsümə hazırlıqla əlaqədar rayon icra hakimiyyətində xüsusi qərargah yaradılıb, tədbirlər planı təsdiq olunub. Tədbirlər planında istilik qazanxanalarının, eləcə də əhalinin enerji daşıyıcıları ilə fasiləsiz təmin olunması, mərkəzi istilik sisteminə qoşulmuş yaşayış binalarının, təhsil, səhiyyə və mədəniyyət müəssisələrinin keyfiyyətli istiliklə təchiz edilməsi, mənzil-kommunal təsərrüfatında zəruri təmir işlərinin aparılması, qış mövsümündə nəqliyyatın normal fəaliyyəti üçün küçə və yolların işlək vəziyyətdə saxlanılması, yanğın təhlükəsizliyi ilə bağlı zəruri tədbirlərin görülməsi kimi işlər nəzərdə tutulub.

Suraxanı Rayon İcra Hakimiyyəti başçısının müavini Etibar Yolçiyev payız-qış mövsümünə hazırlıqla əlaqədar görülmüş işlər barədə məlumat verib. Bildirib ki, görülən işlər nəticəsində hazırda rayon əhalisinin 100 faizi elektrik enerjisi, 98 faizi məişət qazı, 97 faizi su ilə (40 faizi fasiləsiz olmaqla) təmin edilir. Eyni zamanda, rayonun qəsəbələrarası, məhəllədaxili və mərkəzi küçələrində müxtəlif mənbələr hesabına 50 min kvadratmetr asfalt örtüyü salınıb.

Bakı Şəhər İcra Hakimiyyəti başçısı aparatının ərazi idarəetmə və yerli özünüidarəetmə orqanları ilə iş şöbəsinin müdiri Coşqun Cəbrayılov, şəhər təsərrüfatı, sosial-iqtisadi inkişafın təhlili və proqnozlaşdırılması şöbəsinin müdiri Ayaz Hüseynov, Bakı Şəhər İcra Hakimiyyəti Mənzil-Kommunal Təsərrüfatı Departamentinin sədri Rəfael Mehralıyev, “Azəristiliktəchizat” ASC-nin şöbə müdiri Rafiq Əliyev Prezident İlham Əliyevin tapşırıqlarına əsasən paytaxtda qış mövsümünə hazırlıqla bağlı tədbirlər planının hazırlandığını, eyni zamanda, dövlətimizin başçısının mövsümlə bağlı tövsiyələrinin rayonlara paylanıldığını diqqətə çatdırıblar. Həmçinin şəhərdə genişmiqyaslı quruculuq və abadlıq işlərinin görülməsi, yeni infrastruktur layihələrinin həyata keçirilməsi ilə bağlı xüsusi proqram hazırlandığı da bildirilib.

Şura iclasına yekun vuran rayon icra hakimiyyətinin başçısı İlqar Abbasov 2018-2019-cu il payız-qış mövsümünə hazırlıqla bağlı işlərin müəyyən olunmuş qrafik üzrə aparıldığını, hazırlıqla bağlı rayonun bütün təsərrüfat obyektlərində çatışmazlıqların aradan qaldırılması üçün tədbirlər görüldüyünü, qış fəslində sakinlərin rahatlığının təmin edilməsi məqsədilə müvafiq tədbirlərin yüksək səviyyədə həyata keçiriləcəyini diqqətə çatdırıb.