SİYASƏT
“Şuşa İli”nin elan edilməsi azad olunmuş torpaqlara Böyük Qayıdışın ən önəmli mərhələlərindən biridir
Bakı, 11 yanvar, AZƏRTAC
2022-ci ilin “Şuşa İli” elan edilməsi Azərbaycan xalqının işğaldan azad etdiyi tarixi yurd yerlərinə Böyük Qayıdışının ən önəmli mərhələlərindən biridir.
Bunu AZƏRTAC-a açıqlamasında Milli Məclisin deputatı Azər Kərimli deyib.
Bu il Şuşa şəhərinin əsasının qoyulmasının 270-ci ildönümünün qeyd olunacağını xatırladan deputat mədəniyyət paytaxtımızın təkcə Azərbaycanın deyil, bütövlükdə Cənubi Qafqazın mədəni və ictimai-siyasi həyatında müstəsna rol oynadığını bildirərək deyib: “Azərbaycan dövlətçiliyinin ayrılmaz parçası olan Qarabağ xanlığının yaranmasından 5 il sonra Şuşanın əsasının qoyulması, şəhərin xanlığın siyasi və mədəni mərkəzinə çevrilməsi mühüm tarixi hadisə olmaqla yanaşı, Azərbaycan xalqının böyük dövlətçilik ənənələrinə malik qurucu xalq olduğunu təsdiqləyir. Bu fakt həm də xalqımızın müstəqil yaşamaq, dövlət qurmaq iqtidarında və gücündə olduğunu nümayiş etdirir”.
A.Kərimli qeyd edib ki, son 1 il ərzində Şuşa şəhərində həyata keçirilən layihələr, görülən işlər Azərbaycan xalqının bu torpaqların əsl sahibi olduğunu nümayiş etdirməklə bərabər, işğaldan azad edilmiş torpaqlarımızda həyata keçiriləcək quruculuq-bərpa işlərinin ümumi mənzərəsini də formalaşdırır. “Şuşa şəhərinin tarixi simasının bərpası istiqamətində həyata keçirilən nəhəng layihələr, bütövlükdə erməni vandallarının işğalından azad edilmiş əzəli torpaqlarımıza böyük mədəniyyətimizin qayıdışı kimi də dəyərləndirilməlidir. 270 il əvvəl dağlıq bir ərazidə Şuşa şəhəri kimi nəhəng mədəniyyət nümunəsi yaradan Azərbaycan xalqı bu gün daha böyük əzm və məharətlə bu ənənəni davam etdirir”.
Deputatın sözlərinə görə, qısa müddət ərzində Şuşanın Baş planının hazırlanması, böyük şair və siyasi xadim Molla Pənah Vaqifin büstünün və muzey-məqbərə kompleksinin ilkin görkəminə qaytarılması, Bülbülün ev-muzeyinin və Üzeyir Hacıbəylinin heykəlinin açılışları, həmçinin buradakı tarixi, dini və memarlıq abidələrinin bərpası prosesi Azərbaycan dövlətinin gücünü və xalqımızın yaradıcılıq potensialının, yüksək mədəniyyətinin bariz nümunələridir. Ötən il Cıdır düzündə “Xarıbülbül” musiqi festivalının və Vaqifin möhtəşəm məqbərəsi önündə Vaqif Poeziya Günlərinin təşkili ənənəsinin bərpası da göstərir ki, Şuşa sürətlə dirçələrək əvvəlki dolğun mədəni həyatına qovuşmaq yolundadır və bu proses bütövlükdə işğaldan azad olunmuş ərazilərimizi əhatə edəcək, yeni-yeni mədəniyyət nümunələrinin yaranmasına töhfə verəcək.