REGİONLAR
Şuşa təbiət gözəllikləri və tarixi-mədəni irsimizin vəhdət tapdığı unikal məkandır
Zaqatala, 29 aprel, Mustafa Dadaşov, AZƏRTAC
Şuşanın Azərbaycan xalqının qəlbində özünəməxsus yeri və dəyəri var. Bu qədim şəhəri təsadüfən Azərbaycanın mədəniyyət paytaxtı adlandırmırlar. Şuşa musiqi, ədəbiyyat və xalçaçılığın mərkəzi, təbiət gözəllikləri və tarixi-mədəni irsin vəhdət tapdığı unikal məkandır.
AZƏRTAC-ın bölgə müxbiri xəbər verir ki, bu fikirlər Zaqatala Rayon İcra Hakimiyyəti, Dini Qurumlarla İş üzrə Dövlət Komitəsinin (DQİDK) Zaqatala bölgəsi üzrə şöbəsinin və rayon Mərkəzi Kitabxanasının birgə təşkilatçılığı ilə aprelin 29-da Zaqatala rayon Mərkəzləşdirilmiş Kitabxana Sistemində (MKS) keçirilən “Milli qürurumuz – Şuşa” adlı tədbirdə səsləndirilib.
Tədbirin əvvəlində ərazi bütövlüyümüz uğrunda döyüşlərdə canlarından keçən qəhrəman şəhidlərin xatirəsi bir dəqiqəlik sükutla yad edilib.
Rayon MKS-nin direktor əvəzi Leyla Məmmədova tədbiri açaraq, Prezident İlham Əliyevin müvafiq Sərəncamı ilə 2022-ci ilin Azərbaycanda “Şuşa İli” elan edildiyini diqqətə çatdırıb, Şuşanın Azərbaycanın mədəniyyət paytaxtı olmasından, yetişdirdiyi mütəfəkkirlərdən söz açıb.
DQİDK Zaqatala bölgəsi üzrə şöbəsinin müdiri İlqar Vəliyev çıxışında Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə Zəfərlə başa çatan 44 günlük Vətən müharibəsində qazanılan şanlı Qələbədən, Qarabağda aparılan quruculuq işlərindən, Şuşanın Azərbaycan üçün əhəmiyyətindən bəhs edib.
“Zaqatala” qəzetinin redaktor müavini, Əməkdar mədəniyyət işçisi Elmira Mehdiyeva çıxışında Şuşa şəhərinə səfəri ilə bağlı təəssüratlarını bölüşüb.
Tədbirdə, həmçinin DQİDK-nın Zaqatala bölgəsi üzrə şöbəsinin məsləhətçisi Vüqar Məmmədovun “Milli qürurumuz – Şuşa şəhəri” mövzusunda məruzəsi dinlənilib.
Sonra kitabxananın böyük metodisti Sevda Rəhimova tərəfindən hazırlanan “270 yaşlı Şuşa – mənəvi varlığımızın ayrılmaz parçası” adlı məlumat toplusunun təqdimatı olub.
Tədbirin sonunda Prezident İlham Əliyevin Şuşa şəhərində Dünya Azərbaycanlılarının V Qurultayı – Zəfər Qurultayındakı nitqinin videolenti nümayiş etdirilib.