REGİONLAR
Şuşaya çəkilən avtomobil yolunun keçəcəyi ərazilər minalardan təmizlənir
Füzuli, 31 mart, A.Yavərzadə, AZƏRTAC
Füzuli rayonundan Şuşa şəhərinə çəkilən avtomobil yolunun keçəcəyi ərazilər minalardan təmizlənir.
Azərbaycan Respublikasının Minatəmizləmə Agentliyi (ANAMA) Horadiz inzibati mərkəzinin təmizləmə qrupunun əməliyyat meneceri Mədət Məmmədov AZƏRTAC-ın bölgə müxbirinə bildirib ki, ilk mərhələdə ANAMA tərəfindən Şuşaya çəkilən yolun keçəcəyi ərazinin 34 kilometrlik hissəsində təmizləmə işləri icra olunur. Füzulinin Alxanlı və Seyidəhmədli kəndlərinin ərazisi də daxil olmaqla, yolun keçdiyi yerlərdə indiyədək 207 ədəd tank əleyhinə, 168 ədəd piyada əleyhinə, 5 ədəd partlamamış digər hərbi sursat aşkarlanıb.
Hazırda kommunikasiya xətlərinin keçdiyi ərazilər minalardan təmizlənir.
Ümumilikdə, azad olunmuş ərazilərdə bu günədək 4224 ədəd piyada əleyhinə, 1181 ədəd tank əleyhinə, 2064 ədəd tank əleyhinə minanın partladıcısı, 300 ədəd bombacıq aşkarlanıb. Həmçinin 3 milyon 600 min kvadratmetrdən çox ərazi təmizlənib. Minatəmizləmə əməliyyatları davam edir.