SİYASƏT
TƏCAVÜZKAR ERMƏNİSTAN AZƏRBAYCANIN İQTİSADİ İNKİŞAFINDAN TƏLAŞ KEÇİRİR
BU FİKİR SƏTTARXAN ADINA MAŞINQAYIRMA ZAVODUNDA KEÇİRİLƏN ELMİ-NƏZƏRİ KONFRANSDA SƏSLƏNMİŞDİR
AZƏRTAC-ın müxbiri xəbər verir ki, Azərbaycan Respublikaçılar Partiyasının təşəbbüsü ilə keçirilən bu konfransda Milli Məclisin deputatları, siyasi partiya və ictimai birliklərin rəhbərləri, metallurgiya və maşınqayırma sahəsində tanınmış alimlər, eləcə də, Səttarxan adına zavodun mütəxəssisləri iştirak etmişlər.
Məşvərət Məclisinin sədri Məmməd Əlizadə konfransı giriş sözü ilə açaraq demişdir ki, Azərbaycanda metallurgiya və maşınqayırma sənayesinin inkişafı umimmilli liderimiz Prezident Heydər Əliyevin adı ilə bağlıdır. Məhz onun hakimiyyətdə olduğu dövrdə Azərbaycanın metallurgiya və maşınqayırma sənayesində möhkəm təməl yaradılmış, bu sahənin sürətli inkişafı təmin edilmişdir. Ağır sənayedə çalışan azərbaycanlı mütəxəssislərin səmərələşdirici təklif və ixtiraları keçmiş SSRİ-nin böyük sənaye müəssisələrində tətbiq edilmişdir. Lakin təəssüf ki, 1987-1992-cü illərdə ölkəmizdə siyasi hakimiyyətdə böhran yarandığından iqtisadiyyatımızın digər sahələri kimi, metallurgiya və maşınqayırma sənayesində də tənəzzül baş vermişdir.
Dövlət Neft Akademiyası metalların texnologiyası kafedrasının müdiri, professor Sənan Mustafayev “Metallurgiya və maşınqayırma kompleksi və sosial-iqtisadi inkişaf” mövzusunda məruzə etmişdir. Məruzəçi qeyd etmişdir ki, Azərbaycanın metallurgiya və maşınqayırma sənayesində görülən işlər ölkəmizin iqtisadiyyatının digər sahələrinin də inkişafında əhəmiyyətli rol oynamışdır. Xususilə də neft sənayesində istifadə olunan qurğu və avadanlığın Azərbaycanda istehsal olunması ölkəmizin iqtisadi qüdrətini xeyli artırmış, xalqımızın sosial həyatının yaxşılaşmasına öz təsirini göstərmişdir. Alim qeyd etmişdir ki, Prezident İlham Əliyevin ölkəmizin iqtisadi inkişafı ilə bağlı imzaladığı fərman və sərəncamlar metallurgiya və maşınqayırma sənayesində də canlanma yaratmışdır. Əsasən, neft istehsalından əldə olunan gəlirlər hesabına yeni iş yerlərini açılması ilə bağlı müəyyənləşdirilən dövlət proqramı ilk növbədə ölkəmizdən mütəxəssis axınının qarşısını alacaq, əhalinin sosial həyatını yaxşılaşdıracaqdır.
Məruzə ətrafında çıxış edənlər bildirmişlər ki, xalqımızın ümummilli lideri, Heydər Əliyevin həyata keçirdiyi uzaqgörən neft strategiyasının Prezident İlham Əliyev tərəfindən uğurla davam etdirilməsi Azərbaycanın iqtisadiyyatındakı dinamik inkişafın dayanaqlı olmasına təminat yaratmışdır.
Natiqlər demişlər ki, ağır sənayenin inkişafı əhalinin rifahını əhəmiyyətli dərəcədə yaxşılaşdıracaqdır. Qeyd olunmuşdur ki, müasir dünyada ölkəmizin iqtisadiyyatının hərtərəfli və dinamik inkişafını təmin etmək ən güclü silah əldə etməkdən də əhəmiyyətlidir. Hərbi yolla Azərbaycan torpaqlarının 20 faizini zəbt edən təcavüzkar Ermənistan ölkəmizin iqtisadiyyatının dinamik inkişafından təlaş keçirir. Bədnam qonşularımız yaxşı dərk edirlər ki, ölkəmizin iqtisadi tərəqqisi Ermənistan-Azərbaycan, Dağlıq Qarabağ münaqişəsinin beynəlxalq hüquq normaları çərçivəsində, ədalətli həll olunmasını sürətləndirən əsas amillərdən biridir.