MƏDƏNİYYƏT


Tokio Olimpiadası üçün hazırlanacaq Azərbaycan kimonosunun eskizləri üzərində iş davam etdirilir VİDEO

Tokio, 17 oktyabr, AZƏRTAC

Gələn il Tokioda keçiriləcək Olimpiya və Paralimpiya oyunları ilə əlaqədar “Kimono layihəsi - vahid dünyanı təsəvvür edin” layihəsi çərçivəsində yarışlara qatılacaq dövlətlərin və ərazi vahidlərinin kimonoları hazırlanır.

AZƏRTAC xəbər verir ki, bununla bağlı ölkəmizin Yaponiyadakı səfirliyində layihənin nümayəndələri ilə növbəti görüş keçirilib.

Görüşdə layihənin əsas məqsədinin yapon mədəniyyətinin ənənələrini bütün dünyaya təqdim etmək üçün 213 ölkənin və ərazi vahidinin kimonosunun yaradılmasından, 2020-ci ildə Tokioda keçiriləcək Olimpiya və Paralimpiya Oyunlarına qatılacaq ölkələrin təşviqindən, xalqlar arasında dostluq əlaqələrinin gücləndirilməsindən ibarət olduğu vurğulanıb. Bildirilib ki, hər bir ölkə üçün kimononun hazırlanmasına 2 milyon yen (təqribən 18200 ABŞ dolları) məbləğində vəsait tələb olunur. Azərbaycan kimonosunun hazırlanması üçün sponsor qismində Osaka şəhərində fəaliyyət göstərən “Sakai” daşımaçılıq şirkəti çıxış edib.

Görüşdə səfirlik tərəfindən verilmiş tövsiyələr əsasında Azərbaycana həsr olunan kimonoya dair bir sıra eskizlər nümayiş etdirilib. Azərbaycanın Yaponiyadakı müvəqqəti işlər vəkili Fərid Talıbov milli mədəniyyətimizə, ölkəmizin müasir inkişafına daha uyğun eskizi seçərək, onun daha mükəmməl versiyasının hazırlanmasını xahiş edib.

Layihənin nümayəndələri tezliklə eskizin tam ölçüdə hazırlanaraq səfirliyə təqdim olunacağını bildiriblər. Qeyd edilib ki, Azərbaycana həsr olunacaq kimono, səfirliyin tam razılığı əldə edildikdən sonra hazırlanacaq.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.