REGİONLAR


Tovuzda ermənilərin dağıtdığı evlər bərpa edilib FOTO VİDEO

Tovuz, 30 aprel, Ruslan Novruzoğlu, AZƏRTAC

Erməni təxribatı nəticəsində iyul hadisələri zamanı Tovuzda bir çox evlərə, mülki obyektlərə ciddi ziyan dəymişdi. Düşmən iriçaplı silahlardan və ağır artilleriya qurğularından istifadə etməklə mülki əhaliyə, dövlət əmlakına, o cümlədən infrastruktur obyektlərinə zərər vurmuşdu. Prezident İlham Əliyevin tapşırığı ilə əhaliyə dəyən ziyanın aradan qaldırılması məqsədilə qısa müddətdə bərpa işlərinə başlandı. Bu gün düşmənin dağıtdığı evlərin yerində yenisi tikilib, bəzi evlər təmir edilib.

AZƏRTAC xəbər verir ki, digər sərhədyanı yaşayış məntəqələri kimi Tovuz rayonunun Dondarquşçu kəndində də düşmən təxribatı nəticəsində iki ev tamamilə dağılıb yararsız hala düşmüşdü. İyulun sonlarından işçi qrup tərəfindən dəyən ziyanın həcmi müəyyənləşdirildi və bərpa işlərinə başlanıldı.

Evləri zərər çəkənlərdən biri də Dondarquşçu kəndində yaşayan Əliyevlər ailəsidir. Onlar da yeni evlərinə köçəcəyi günü gözləyirdilər. Nəhayət o gün gəlib çatdı.

Ailə başçısı Namiq Əliyev ermənilərin iyul təxribatından danışarkən deyib: “İyulun 13-ü, günorta saat təxminən 12 idi. Güclü atışma oldu. Anam xəstə olduğuna görə onu həkimə aparmışdım. Mənə zəng etdilər ki, evinizə top mərmisi düşüb. Qayıdanda gördüm ki, evimiz dağılıb”.

Beş nəfərdən ibarət olan ailə üçün Azərbaycan dövləti tərəfindən yeni ev inşa edilib. “Təzə evimizə köçmüşük. Dövlətimiz sağ olsun, bizə dəstək oldu”, – deyə Namiq Əliyev vurğulayıb.

Mərmi evə düşən zaman xoşbəxtlikdən evdə heç kim olmayıb. 73 yaşlı Tellarə nənə deyib ki, hələ də o anı yada salanda pis olur. O, evsiz qaldıqları müddətdə Vətən müharibəsinin başladığını bildirərək, ordumuzun qələbə qazanmasının bütün dərdlərini unutdurduğunu söyləyib. “Allaha şükür olsun ki, torpaqlarımız azad olundu. Allah şəhidlərimizə rəhmət eləsin. Qazilərimizə də Allah kömək dursun. Vətən müharibəsində mənim nəvəm də döyüşlərdə iştirak edib. Noyabrın 10-da gecə saat 5 idi. Qonşu bizi muştuluqladı ki, müharibə bitdi. Öz problemim, evim eşiyim yadımdan çıxdı. Dedim ki, Allah sənə şükür, balalarımız salamat gəldi”, - deyə Tellarə Əliyeva əlavə edib.

Qeyd edək ki, ötən il ermənilərin Tovuz istiqamətində silahlı təxribatı zamanı sərhədboyu yaşayış məntəqəsində 60-dan çox evə ziyan dəyib. Bunlardan 6 ev tamamilə yenidən tikilərək sakinlərin istifadəsinə verilib, 36 evdə isə təmir işləri aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.