DÜNYA
Türkiyədə koronavirusdan ölənlərin sayı sürətlə azalır
Ankara, 5 iyun, AZƏRTAC
Türkiyədə yeni növ koronavirusla (COVID-19) bağlı gündəlik testlərin aparılması davam edir. İyunun 5-də ümumilikdə 57 min 829 nəfər testdən keçib. Onlardan 930 nəfərdə testlərin nəticələri pozitiv çıxıb.
AZƏRTAC Türkiyə Səhiyyə Nazirliyinə istinadla xəbər verir ki, gün ərzində 1622 nəfər sağalıb, 18 nəfər dünyasını dəyişib. Gündəlik sağalmada sıçrayışlı artım, ölümdə sürətli azalma qeydə alınıb. Bu vaxtadək ölkədə 2 milyon 267 min 412 nəfər koronavirus testindən keçib. Hazırda 592 nəfər reanimasiyada, 269 xəstə süni nəfər aparatına qoşulmuş halda müalicə alır. İndiyədək bu virusdan 4648 xəstə dünyasını dəyişib, 133 min 400 nəfər sağalıb.
Qeyd edək ki, Türkiyə hökuməti pandemiyaya qarşı məhdudiyyətləri aradan qaldırmaq üçün planlaşdırılmış qaydada normallaşma prosesinə keçib. COVID-19 ilə mübarizə tədbirləri çərçivəsində bu həftəsonu nəzərdə tutulan növbəti komendant saatı rejimi ləğv olunub.
Sabir Şahtaxtı
AZƏRTAC-ın xüsusi müxbiri
Ankara