REGİONLAR
Türkiyəli jurnalistlər: Naxçıvan son illərdə böyük inkişaf yolu keçib
Naxçıvan, 23 oktyabr, AZƏRTAC
Qədim Azərbaycan diyarı olan Naxçıvan son illərdə böyük inkişaf yolu keçib. Şəhərin abad və rahat yolları, müasir binaları, bir-birindən gözəl küçə və prospektləri Naxçıvanın hərtərəfli inkişafının göstəricisidir.
Bu sözləri AZƏRTAC-ın Naxçıvan bürosuna müsahibəsində Şərqi Anadolu Jurnalistləri Federasiyasının sədri Firudin Fazil Özsoy deyib.
Naxçıvanla tanışlıq üçün onlara yaradılmış şəraitə görə minnətdarlığını bildirən qonaq qədim Azərbaycan diyarına səfərlərinin məqsədi barədə danışaraq deyib: “Buraya gəlməkdə məqsədimiz Naxçıvanla tanışlıq və muxtar respublikanın kütləvi informasiya vasitələri ilə Türkiyənin Şərqi Anadolu vilayətində fəaliyyət göstərən media orqanları arasında əməkdaşlıq imkanlarını müzakirə etməkdir. Qeyd edim ki, bir millət, iki dövlət olan Türkiyə və Azərbaycan arasında bütün sahələrdə olduğu kimi, kütləvi informasiya vasitələri arasında da əməkdaşlıq inkişaf etdirilməli, Şərqi Anadolu insanı Naxçıvanı, naxçıvanlılar isə Şərqi Anadolunu yaxından tanımalıdırlar. Düşünürəm ki, bu sahədə hər iki tərəfin böyük potensialı var. Eyni zamanda, dərin tarixi, dini, mədəniyyət bağlılığımız var. Biz bütün bu imkanlardan yararlanaraq hər iki tərəfin zəngin mədəni-iqtisadi, turizm potensialını tanıda, ölkələrimiz arasındakı əməkdaşlığa yeni töhfə verə bilərik. İnanıram ki, bu məqsədlərimizə birgə nail olacağıq”.
Malatya Jurnalistləri Cəmiyyətinin sədri, “Son söz” qəzetinin təsisçisi Əli Er isə qeyd edib ki, Naxçıvan Türkiyə ilə birbaşa sərhədi olan yeganə qədim türk yurdudur.
“Bu diyarın qədim tarixə və mədəniyyətə malik olduğunu bilirdim. Bu gün isə bu zənginliyi öz gözlərimlə gördüm. Vaxtımızın az olmasına baxmayaraq, şəhərlə qısa da olsa, tanış olduq, burada keçirilən “Arıçılıq məhsulları – bal festivalı”nda iştirak etdik”, - deyən Əli Er bildirib ki, Naxçıvan bu gün tarixlə, mədəniyyətlə nəfəs alan bir şəhərdir. Onun gözəlliyi isə insana ayrı bir zövq verir. Naxçıvanın təmizliyi, sakinlərinin qonaqpərvərliyi hər kəsi valeh edir. Çalışacağıq ki, bütün bu gördüklərimizi oxucularımıza da çatdıraq.
Ərzincan Jurnalistləri Cəmiyyətinin sədr müavini, “Doğu” qəzetinin təsisçisi Mücahit Özdəmir Naxçıvanda zəngin təəssüratlarla ayrıldığını bildirərək deyib: “Naxçıvana ilk dəfədir ki, səfər edirəm. Azərbaycanın Türkiyə ilə qonşu olan bu qədim diyarına səfər etmək bizim üçün çox qürurvericidir. Ona görə ki, Naxçıvan türkün qədim tarixini özündə yaşadan bir diyardır. Şəhəri gəzərkən burada türk və İslam mədəniyyətinin incilərini yaşadan möhtəşəm tarixi abidələrlə tanış olduq. Məsələn, Möminə xatın türbəsi mənə çox ecazkar təsir bağışladı. Təəssüf ki, mənim yaşadığım bölgə aktiv seysmik zona olduğundan qədim dövrlərin yadigarları olan abidələrin çoxu zəlzələlər zamanı dağılaraq məhv olub. Ancaq Naxçıvan belə tarixi abidələri özündə yaşatmaqla bu mədəni zənginliyi hər kəsə təqdim etməyi bacarır”.
Mücahit Özdəmir Naxçıvandakı təmizliyin, yolların rahatlığının, yaşıllıqların onun diqqətini cəlb etdiyini vurğulayıb. Bildirib ki, qarşılıqlı fəaliyyət nəticəsində Türkiyədən Naxçıvana daha çox turistin gəlməsi mümkündür.