DÜNYA


ÜST: Ötən bir həftə ərzində yoluxmalar rekord həddə çatıb

Cenevrə, 20 aprel, AZƏRTAC

Ötən bir həftə ərzində dünya üzrə koronavirusa yoluxma halları rekord həddə çatıb.

AZƏRTAC xəbər verir ki, Ümumdünya Səhiyyə Təşkilatının (ÜST) məlumatına əsasən, ötən həftə yeni yoluxma hallarının sayı 5,2 milyon olub. Beynəlxalq qurumun baş direktoru Tedros Qebreyesus bildirib ki, artıq səkkiz həftədən bəri yoluxmaların, beş həftədən bəri isə ölüm hallarının sayı artmaqdadır.

Beynəlxalq ekspertlər artım statistikası ilə yanaşı infeksiyaya yoluxan və xəstəxanaya yerləşdirilən xəstələrin arasında 25-59 yaşlı şəxslərin sayının çoxalmasından narahatdırlar. Bu bir tərəfdən virusun daha yoluxucu mutasiyaları, digər tərəfdən isə bu yaş qrupundakı insanların daha çox sosial təmaslarda olması ilə izah olunur.

T. Qebreyesus həmçinin bildirib ki, pandemiya bir neçə ay içində nəzarət altına alına bilər. Bunun üçün isə ilk növbədə bütün mümkün tədbirlər qətiyyətlə həyata keçirilməli və bütün dünyanı əhatə etməlidir. Buraya əlləri təmiz yumaq kimi adi gigiyenik qaydalar, məsafə saxlanması və maskadan istifadə etməklə yanaşı vaksinasiya kampaniyasının genişləndirilməsi daxildir.

ÜST rəhbəri dünyanın zəngin ölkələrini həmrəylik göstərməyə və peyvəndlə təminatda yoxsul ölkələri dəstəkləməyə çağırıb. Qeyd edilib ki, bəzi zəngin ölkələrdə əhali arasında hər dörd nəfərdən biri artıq peyvənd olunduğu halda, yoxsul ölkələrdə hər 500 nəfərdən biri bu imkandan yararlana bilib.

Elgün Niftəli

AZƏRTAC-ın xüsusi müxbiri

Cenevrə 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.