REGİONLAR
Ulu Öndərin xilaskarlıq missiyası Azərbaycanı məhv olmaqdan, parçalanmaqdan xilas edib
Şəki, 29 aprel, Mustafa Dadaşov, AZƏRTAC
Ümummilli Lider Heydər Əliyev Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi əbədilik qazanıb. Ölkəmiz dünyada layiq olduğu mərtəbəyə məhz Ulu Öndərin uzaqgörənliyi, müdrikliyi, qətiyyəti, dəmir iradəsi, zəngin dövlətçilik təcrübəsi sayəsində yüksələ bilib.
AZƏRTAC-ın bölgə müxbiri xəbər verir ki, bu fikirlər “Heydər Əliyev İli” çərçivəsində Şəki Şəhər İcra Hakimiyyəti və Yeni Azərbaycan Partiyası (YAP) Şəki rayon təşkilatının birgə təşkilatçılığı ilə “Azərbaycanın dövlət müstəqilliyi əbədidir, sarsılmazdır, dönməzdir!” mövzusunda keçirilən tədbirdə səsləndirilib.
Şəki Heydər Əliyev Mərkəzində keçirilən tədbirdə şəhər icra hakimiyyətinin, YAP rayon təşkilatının nümayəndələri, ziyalılar, partiya fəalları və gənclər iştirak ediblər.
Tədbirdə əvvəlcə Azərbaycanın Dövlət Himni səsləndirilib, Ulu Öndər Heydər Əliyevin, akademik Zərifə xanım Əliyevanın və Azərbaycanın ərazi bütövlüyü, torpaqlarımızın azadlığı uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Çıxış edənlər Ulu Öndər Heydər Əliyevin dövlətimiz və xalqımız qarşısındakı misilsiz xidmətlərindən, müstəqilliyini itirmək təhlükəsi ilə üz-üzə qalan xalqın təkidi ilə Heydər Əliyevin hakimiyyətə qayıdışından, Yeni Azərbaycan Partiyasının yaranmasından, qısa müddətdə ictimai-siyasi sabitliyin formalaşmasından, atəşkəsin elan olunmasından bəhs ediblər.
Vurğulanıb ki, Ulu Öndər Heydər Əliyevin xilaskarlıq missiyası Azərbaycanı məhv olmaqdan, parçalanmaqdan xilas edib. Heydər Əliyevin ikinci dəfə hakimiyyətə qayıdışından sonra ölkəmiz böhrandan çıxıb, həmin dövrdə Ulu Öndərin həyata keçirdiyi mühüm işlər nəticəsində Azərbaycan inkişaf yoluna qədəm qoyub və dünyada tanınmağa başlayıb.
Vurğulanıb ki, Ulu Öndərin daxili və xarici siyasət kursu, dövlət quruculuğu konsepsiyası Prezident İlham Əliyev tərəfindən bu gün uğurla davam etdirilir və yeni çalarlarla zənginləşdirilir.
Tədbirin sonunda Ulu Öndər Heydər Əliyevə həsr edilmiş sənədli film nümayiş olunub.