Bakı, 8 yanvar, AZƏRTAC

İldən-ilə havanın temperaturu rekordlar vurur, təbii fəlakətlər isə daha tez-tez baş verir. AZƏRTAC BMT-nin Xəbərlər xidmətinə istinadla xəbər verir ki, hava proqnozunun dəqiqliyi əsas amil olduğu halda Ümumdünya Meteorologiya Təşkilatı (ÜMT), hava haqqında mühüm analitik informasiyanı daha əlçatan etmək üçün yeni veb-saytı işə salıb.

ÜMT-nin oktyabr ayında dərc edilmiş və 2021-ci ilin doqquz ayı üzrə məlumatlarına əsaslanan 2021-ci ildə qlobal iqlimin vəziyyəti haqqında ilkin məruzəsinə görə son yeddi il çox böyük ehtimalla müşahidələrin bütün tarixi üzrə ən isti illər olacaq.

Bununla belə okeanın davamlı istiləşməsi və turşulaşması fonunda dəniz səviyyəsinin qlobal yüksəlməsi sürətlənərək, 2021-ci ildə yenə maksimuma çatdı. Qasırğalar, leysanlar və digər ekstremal təbiət hadisələri daha tez-tez baş verir ki, bu da fəlakətli nəticələrə gətirib çıxarır. Belə vəziyyətdə hava proqnozunun və təhlükəli hava hadisələrinin əvvəlcədən aşkar edilməsinin dəqiqliyi əsasən alimlərdə olan informasiyanın həcmindən və keyfiyyətindən asılıdır.

ÜMT-nin bu yaxınlarda keçirilən növbədənkənar Konqresinin iştirakçıları beynəlxalq məlumat mübadiləsi üzrə Vahid siyasəti təsdiq ediblər. Yeni portalın yaradılması – təşkilatın üzv-ölkələri üçün yüksəkkeyfiyyətli analitik və proqnoz məhsullara çıxışın sadələşdirilməsi mərhələlərindən biridir.

Dünyada Qlobal Məlumatların Emalı və Proqnozlaşdırma Sistemi (QMEPS) fəaliyyətdədir. Bu, meteoroloji təhlillərin hazırlanması və təqdim edilməsi və meteoroloji proqnozların tərtib edilməsi üzrə üzv-ölkələrin imkanlarını koordinasiya edən beynəlxalq mexanizmdir. Bu hesablaşmalar müşahidələr və ən yeni elmi-texniki nailiyyətlərin məlumatları əsasında həyata keçirilir.

Yeni portal QMEPS-yə daxil olan mərkəzlər üçün universal səhifədir. Burada mühüm elmi və statistik informasiya, eləcə də əlavə resurslara istinadlar vahid formada yığılıb və təsnif edilib.

ÜMT əmindir ki, yeni veb-saytın istifadə edilməsi mərkəzlərin işini sadələşdirməyə, məlumat mübadiləsini yaxşılaşdırmağa və meteoroloji proqnozların dəqiqliyini yüksəltməyə imkan verəcək.