REGİONLAR


Ümumdünya Şahmat Olimpiadasının iştirakçıları muxtar respublikanın mədəniyyət müəssisələri ilə tanış olublar

Naxçıvan, 5 oktyabr, AZƏRTAC

On altı yaşadək yeniyetmələr arasında Ümumdünya Şahmat Olimpiadası ilə əlaqədar muxtar respublikaya gələn xarici və yerli şahmatçılar, şahmat həvəskarları Heydər Əliyev Muzeyini ziyarət ediblər.

AZƏRTAC-ın Naxçıvan bürosu xəbər verir ki, bələdçi qonaqlara mədəniyyət ocağı barədə ingilis dilində ətraflı məlumat verib. Bildirilib ki, muzeyin fondunda ulu öndər Heydər Əliyevin həyat və fəaliyyətini əks etdirən 5 mindən çox eksponat toplanıb. Mədəniyyət müəssisəsi Naxçıvan Muxtar Respublikası Ali Məclisi Sədrinin 1999-cu il fevralın 18-də imzaladığı Sərəncam əsasında yaradılıb və 1999-cu il mayın 10-da fəaliyyətə başlayıb. Muzeydə 2023-cü ildə 100 illik yubileyini böyük təntənə ilə qeyd edəcəyimiz ümummilli lider Heydər Əliyevin uşaqlıq və gənclik illərinə həsr olunmuş stendlər, onun Naxçıvan Muxtar Respublikası Ali Məclisinin Sədri işlədiyi dövrə aid (1991-1993-cü illər) şəxsi sənəd və materiallar, imzaladığı sərəncamlar, qərarlar və digər tarixi sənədlər qorunub saxlanılır.

Şahmatçılar və həvəskarlar naxçıvanlı könüllülərin dəstəyi ilə müxtəlif xarici dillərdə müstəqil Azərbaycan dövlətinin banisi Ulu Öndərin muzeylərə sığmayan mənalı ömrü, fədakar siyasi fəaliyyəti barədə daha müfəssəl informasiyalar əldə edib, mədəniyyət ocağından zəngin təəssüratlarla ayrılıblar.

Heydər Əliyev Sarayında muzeytipli müəssisə kimi fəaliyyət göstərən Naxçıvan Dövlət Rəsm Qalereyasına gələn qonaqlara bildirilib ki, 1982-ci ildə ulu öndər Heydər Əliyevin təşəbbüsü ilə yaradılan qalereyanın əsas məqsədi rəssamların həyat və yaradıcılığını öyrənmək, eyni zamanda, gələcək nəsillərə çatdırmaqdır. Qalereyanın fondunda 70-ə yaxın rəssamın 400-dən çox əsəri var, hazırda ekspozisiya zalında natürmort, portret, peyzaj, qrafika, abstrakt və digər janrlarda çəkilmiş 52 rəsm əsəri, eləcə də dekorativ-tətbiqi sənət nümunələri nümayiş etdirilir. Xalq rəssamlarından Mikayıl Abdullayevin, Maral Rəhmanzadənin, Hüseyn Əliyevin, Azərbaycan Respublikasının Əməkdar rəssamı Ülviyyə Həmzəyevanın, Naxçıvan Muxtar Respublikasının Əməkdar rəssamı Cavid İsmayılovun və digərlərinin əsərləri Naxçıvan rəssamlıq məktəbinin zəngin ənənələrini əks etdirir.

Dövlət Bayrağı Muzeyinə ekskursiya zamanı qonaqlara məlumat verilib ki, qədim dövlətçiliyimizin simvollarını özündə əks etdirən bu məkan Naxçıvan Muxtar Respublikası Ali Məclisi Sədrinin “Naxçıvan şəhərində Dövlət Bayrağı Meydanı və Muzeyinin yaradılması haqqında” 2014-cü il 22 avqust tarixli Sərəncamına əsasən yaradılıb. Muzeydə ümummilli lider Heydər Əliyevin təşəbbüsü ilə 1990-cı il noyabrın 17-də Naxçıvan Muxtar Respublikasının ali qanunverici orqanında ölkəmizin müstəqilliyi və xalqımızın rifahı naminə verilən taleyüklü qərarları əks etdirən dəyərli nümunələr yer alıb. Ekspozisiyada, həmçinin qədim dövlətlərimizin bərpa olunmuş bayraqları, gerbləri və inzibati xəritələri, Naxçıvan zərbxanalarında kəsilmiş sikkələr, Naxçıvan xanlığının süvari dəstələrinə verilən bayraqlar, döyüşçü libasları, Naxçıvan Muxtar Respublikasının müxtəlif illərdə qəbul olunmuş dövlət rəmzləri və konstitusiyaları nümayiş etdirilir.

Monqolustan komandasının kapitanı Buyan Tsetseg AZƏRTAC-ın Naxçıvan bürosuna müsahibəsində deyib: “Olimpiadanın yüksək səviyyədə təşkil olunmasına görə komandamız adından təşəkkürlərimi bildirirəm. Həm yarış müddəti, həm də asudə vaxtımız yaddaqalan, maraqlı keçir. İlk görüşümüzü “Azərbaycan-Sumqayıta” qarşı keçirdik və istənilən nəticəni əldə etdik. İkinci oyunumuz olimpiadanın favoritlərindən sayılan Türkiyə komandası ilə oldu. Həmin yarışda məğlubiyyət yaşasaq da, növbəti oyunlara ümidimiz çoxdur. Komanda yoldaşlarıma güvənirəm”.

Buyan Tsetseg qeyd edib ki, Naxçıvanda olduqları müddətdə gözəl, maraqlı yerləri də gəzmək fürsəti yaranıb. “Heydər Əliyev Muzeyində, Dövlət Bayrağı Muzeyində Azərbaycanın dövlətçilik tarixi barədə dolğun informasiyalar əldə etdik. Eyni zamanda, Heydər Əliyev Sarayında maraqlı, rəngarəng sərgi-satışla tanış olduq, gözəl sənət nümunələrinə baxdıq. Qadınların zövqünə heyran qaldıq. Naxçıvan Rəsm Qalereyasında da bir-birindən maraqlı rəsm əsərləri diqqətimizi çəkdi, maraqlı, zəngin mədəniyyətə malik, milli-mənəvi dəyərlərinə bağlı bir diyarı tanıdığımız üçün çox şadıq. Fikirlərimi burada olduğum qısa zamanda Azərbaycan dilində öyrəndiyim bir cümlə ilə bitirmək istəyirəm: Mən Naxçıvanı çox sevirəm”, - deyə Monqolustan komandasının kapitanı söyləyib.

Misirli şahmatçı Mustafa Məhəmməd: “Naxçıvan qısa zamanda bizə gözəl, səmimi, xoş təsir bağışladı. Həm muzeylərə, turizm məkanlarına ekskursiyadan, həm də yüksək səviyyədə təşkil olunan olimpiadadan böyük zövq alırıq. İkinci tur komandamız üçün gərgin idman mübarizəsində keçdi. Rəqibimiz isə “Naxçıvan-Azərbaycan” komandası idi. Naxçıvanlı şahmatçılar çox diqqətcil və bacarıqlıdırlar. Oyunun gedişatını dəyişdirmək üçün düzgün analiz qabiliyyətinə malikdirlər. Məhz güclü strategiya ilə oynadıqları gözəl oyun onların qalib olmasına imkan verdi. Məğlubiyyətə baxmayaraq bizim üçün də mübarizə maraqlı idi, hər iki komanda üzvləri arasında səmimi ab-hava yarandı. Ümumiyyətlə Naxçıvanda olmaqdan çox məmnunam, gözəl, mehriban, ünsiyyətcil insanlarınız var, bizə gəzdiyimiz yerlər barədə zəngin məlumatlar verdilər, təşkilatçılığı çox bəyəndim”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.