MƏDƏNİYYƏT
Üzeyir Hacıbəyli VI Beynəlxalq Musiqi Festivalının təntənəli açılış mərasimi olub
AZƏRTAC xəbər verir ki, Üzeyir Hacıbəyli milli musiqi xəzinəsini yeni janr və formalarla zənginləşdirən bir sıra əsərlər, o cümlədən Azərbaycan peşəkar musiqi sənətinin şah əsəri, dünya musiqi xəzinəsinin incilərindən olan “Koroğlu” operasını bəstələyib. Üzeyir bəy elmi musiqişünaslığın, musiqi təhsilinin əsasını qoyub və ömrünün sonunadək musiqi mədəniyyətinin inkişafına rəhbərlik edib. O, müasir bəstəkarlıq məktəbinin beşiyi başında dayanıb, onun qabaqcıl dünya bəstəkarlıq məktəbləri ilə yanaşı ola bilməsi üçün fədakarcasına çalışıb. Dahi bəstəkarın yaratdığı musiqi inciləri dünya şöhrəti qazanıb, dünya musiqi mədəniyyətinin qızıl fonduna daxil olub.
Bildirilib ki, Üzeyir Hacıbəyli Tanrının Azərbaycan xalqına bəxş etdiyi misilsiz bir töhfədir. Onun yaradıcı irsi təkcə öz xalqı üçün deyil, bütün bəşəriyyət üçün çox dəyərli mənəvi sərvətdir. Zaman keçdikcə Üzeyir sənəti dünya xalqları tərəfindən daha çox sevilir, onun əsərləri heç bir sərhəd tanımır. Dünyanın ən möhtəşəm teatrlarının səhnəsində bu əsərlər dönə-dönə tamaşaya qoyulur, ekranlaşdırılır, məşhur müğənnilər tərəfindən sevilə-sevilə ifa olunur. Üzeyir Hacıbəylinin əsərləri milli olduğu qədər də bəşəridir.
2009-cu ildən başlayaraq ölkəmizdə hər il keçirilən və dahi bəstəkar, Azərbaycan professional musiqisinin banisi Üzeyir Hacıbəyliyə həsr olunmuş beynəlxalq musiqi festivalları böyük əks-səda doğurub. Festival konsertlərində görkəmli musiqiçilər, bədii kollektivlər, solistlər, dirijorlar iştirak edirlər.
Festival, Üzeyir Hacıbəyli adına Dövlət simfonik orkestrinin ifasında dahi bəstəkarın “Koroğlu” operasından uvertüranın səslənməsi ilə açıq elan edilib. Orkestrin bədii rəhbər və baş dirijoru, Xalq Artisti Rauf Abdullayev, solistləri Ceyhun Allahverdiyev (piano, Azərbaycan) və İlya Qrubert (violin, Hollandiya) olublar.
Konsertdə İ.Bramsın violin və orkestr üçün konserti, həmçinin Azərbaycanın Xalq Artisti Arif Məlikovun fortepiano və orkestr üçün konserti səsləndirilib.
Qeyd edək ki, A.Məlikovun bir aya yazdığı və konsertdə ilk dəfə səsləndirilən bu əsəri sevimli qızı Şirin Məlikovaya həsr edib. Əsərdə bəstəkar bütün həyatı, bədii-estetik və fəlsəfi düşüncələrini əks etdirərək, dünya musiqi xəzinəsinə bir daha dəyərli töhfə bəxş edib.
Festival sentyabrın 28-dək davam edəcəkdir.