İsmayıllı, 13 sentyabr, R.Türkoğlu, AZƏRTAC

Yunan-Roma güləşçimiz Eldəniz Əzizli bu günlərdə Serbiyanın paytaxtı Belqradda dünya çempionatında qızıl medal qazanıb. O, qələbəsini Vətən müharibəsinin iştirakçısı, polkovnik-leytenant Seymur Zülfüqarova həsr etməklə hər kəsi qürurlandırıb. Qeyd edək ki, Seymur Zülfüqarov avqustun 19-da ürəktutmasından vəfat edib.

AZƏRTAC-ın müxbiri Seymur Zülfüqarovun doğulub boya-başa çatdığı İsmayıllıda ailəsi ilə görüşüb.

Eldənizin qələbəsini Seymur Zülfüqarova həsr etməsi, hamıdan çox qəhrəmanımızın ailəsini kövrəldib. Övladlarının vaxtsız həyatdan köçməsinə üzülən ailə bu xəbərlə bir qədər təskinlik tapdığını deyir. “Eldəniz nə qədər idmanla məşğuldur, elə bilirəm, oğlum da sağdır. Əminəm ki, Eldəniz bayrağımızı bundan sonra da daim ucalarda dalğalandıracaq”, - deyən Seymurun atası Ənvər Zülfüqarov bildirib ki, oğlu 1983-cü ildə İsmayıllı rayonunda anadan olub. Ali hərbi məktəbi bitirdikdən sonra müxtəlif vəzifələrdə xidmətə başlayıb. 2020-ci ildə zəfərlə başa çatan Vətən müharibəsində iştirak edən Seymur Ali Baş Komandan tərəfindən müxtəlif medallara layiq görülüb. O, ötən ay ordu sıralarından ehtiyata buraxıldıqdan bir neçə gün sonra ürək çatışmazlığından vəfat edib.

Seymurun anası Aliyə Zülfüqarova isə oğlunu uşaq yaşlarından vətənpərvər övlad kimi böyütdüyünü deyir. “Orta məktəbi bitirdikdən sonra ali hərbi məktəbi oxuyacağını dedi. Biz də dəstək olduq. Hərbi məktəbi başa vurduqdan sonra Vətənə 20 ildən artıq qüsursuz xidmət etdi. Düzdür, indi mənə danışmaq çətindir, amma mən oğlumla fəxr edirəm. Fəxr edirəm ki, belə bir müqəddəs peşəyə sahib olub, Vətənə xidmət edib. Seymuru yaddan çıxarmayan, qələbəsini ona həsr edən Eldəniz balamızı Allah qorusun. Bütün şəhidlərimizin ruhu şad olsun”, - deyə Aliyə Zülfüqarova bildirib.

Güləşçimiz Eldəniz Əzizli qələbəsini müharibə iştirakçısına həsr etməklə bir daha sübut etdi ki, xalqımız torpaq uğrunda döyüşüb, bayrağımızı zirvələrdə dalğalandıranların adı və xatirəsini daim uca tutur. Bu qələbə həm də bayrağımızı Qarabağda dalğalandıran şəhidlərimizin ruhuna bir minnətdarlıq borcudur...

Qeyd edək ki, Eldəniz Əzizli 55 kq çəki dərəcəsində ikiqat dünya çempionu olduqdan sonra göz yaşlarına hakim ola bilməyib. Əzizli emosional durumunun səbəbini izah edərkən deyib: “Bu qələbəmi çox önəmli şəxsə həsr etmək istəyirəm. Hansı ki, Müzəffər Ordumuzun qalib komandiri idi. Mən yarışa gəlməmişdən 15 gün əvvəl qucağımda dünyasını dəyişdi... Polkovnik-leytenant Seymur Zülfüqarov da çempion olmağımı çox istəyirdi. Düşünürəm ki, sağ olsaydı, ən azı mənim qədər duyğulanar və fəxr edərdi...".