İstanbul, 15 sentyabr, AZƏRTAC

Vətən uğrunda döyüşlər başlamazdan əvvəl mən Dövlət Sosial Müdafiə Fondunun Kəlbəcər Rayon Şöbəsinin Sosial müavinətlər bölməsinin müdiri vəzifəsində işləyirdim, eyni zamanda ehtiyatda olan zabit, leytenant idim. Sentyabrın 21-də, hələ döyüşlər başlamadan könüllü olaraq hərbi xidmətə yazıldım. Bununla bağlı Səfərbərlik və Hərbi Xidmətə Çağırış üzrə Dövlət Xidmətinin Kəlbəcər Rayon Şöbəsinə müraciət etdim və oradan da hərbi hissəyə yollandım. Dörd gün orada hazırlıq prosesini keçdim və sonra təyinat üzrə göndərildim. Qismətdən həmlə taboruna düşdüm və buna çox şad idim. Gözümdə kiçik bir problem olduğu üçün həkimlər döyüşə qatılmağımı məsləhət görmədilər. Lakin, bu Vətən müharibəsi idi və mən də bir azərbaycanlı olaraq döyüşdə iştirak etməli idim. Bunu özümə borc bilirdim. Hər bir azərbaycanlı kimi mən də o günü gözləyirdim. Həm də döyüş zamanı artıq bir zabit də çox böyük əhəmiyyət kəsb edir. Allah şəhidlərimizə rəhmət eləsin. Mən də şəhid ola bilərdim, lakin, buna baxmayaraq indi “nə yaxşı ki, getmişəm, nə yaxşı ki, orada olmuşam” deyirəm. Döyüş bölgəsindən yaralandığımda gözümün önündə oğlum Məsud var idi. Onu bir daha görmək üçün mən sağ qalmalı idim.

Bu fikirləri AZƏRTAC-a müsahibəsində “YAŞAT” Fondunun dəstəyi ilə Türkiyədə müalicə alan qazimiz Aqil Süleymanlı deyib.

Döyüşlərə ehtiyatda olan leytenant kimi qatılan A.Süleymanlı Azərbaycan Respublikasının müdafiə naziri general-polkovnik Zakir Həsənovun müvafiq əmri ilə baş leytenant kimi hərbidən təxris edilib: “Ölkə başçımız İlham Əliyevin Sərəncamı ilə beş medalla təltif olunmuşam. Onlardan dördü Kəlbəcər, Xocavənd, Cəbrayıl və Füzulinin işğaldan azad edilməsinə görə, biri isə “Vətən uğrunda” medalıdır. Bizim ilk tapşırığımız Kəlbəcər, Murov istiqamətində idi. Sonra isə Xocavənd, Füzuli və Cəbrayıl istiqamətində döyüşlərdə oldum. Oktyabrın 30-da Xocavənd rayonuna girişdə qırmızı bazar adlanan bölgədə ayağımdan yaralandım. Yanımda bir çavuş var idi. Ondan bölgədən uzaqlaşmasını istəsəm də, o, “ya birgə çıxacağıq burdan, ya da birgə öləcəyik” deyərək məni qoyub getmədi. Elə də oldu, biz birgə çıxdıq”.

Ermənilərin əsasən qadağan olunmuş güllələrdən istifadə etdiklərini qeyd edən qazimiz deyib: “Bu güllələr dəydiyi yeri parçalamaqla yanaşı, həm də yandırır. Elə bu səbəbdən də aldığım yara ayağımda sümük itkisinə səbəb oldu. Bəzi bölgələrdən dəri köçürülmələri də etdilər. Yaralandıqdan sonra təxminən üç kilometrlik yolu sürünərək geri qayıtdım, yanımdaki çavuşla birlikdə. Artıq getməyə taqətim qalmamışdı. Torpağı qazdıq və yatılı vəziyyətdə təxminən on saat orada gözlədikdən sonra bizi xilas etdilər. Bu on saatlıq müddət ərzində Azərbaycan dilində səslər gəlsə belə özümüzü göstərmək istəmirdik. Çünki, ermənilər döyüş bölgəsində də həddindən artıq çox provokasiya aparırdılar. Mərdcə döyüşə bilmirdilər. Azərbaycan dilində müxtəlif sözlər öyrənib bizi səhv istiqamətə yönləndirir, pusquya düşürməyə çalışırdılar”.

İlk əməliyyatı Ağcabədi Rayon Xəstəxanasında olan qazimiz sonra Azərbaycanda daha üç əməliyyat keçirib: “Müalicəm Azərbaycanda özəl bir klinikada aparılırdı. Prezidentimiz tərəfindən yaradılan “YAŞAT” Fondu orada məni bütün lazimi dərmanlarla təmin etdi. Sonra artıq yaramın bitişməməsi səbəbindən mənim müalicəmin Türkiyədə davam etdirilməsinə qərar verildi. Avqustun 17-si qardaş ölkəyə gətirildim. Gələn gündən Türkiyədə də üç əməliyyat keçirmişəm. Hər əməliyyatdan çıxdığımda bütün döyüş səhnələri gözümün önündə canlanır. Yəqin ki, narkozun təsirindəndir. Hər dəfə o anları yenidən yaşayıram. İndi həkimlər vəziyyətimin yaxşı olduğunu deyirlər”.

“Belə bir fondun yaradılması və bizlərə göstərilən dövlət qayğısı üçün Prezidentimiz İlham Əliyevə minnətdaram. Fondda mənimlə çox yaxından maraqlandılar. Hətta bir kredit məsələm də var idi. Onun ödənilməsində də köməklik göstərdilər. Fondun rəhbəri Qarabağ qazisi Elvin Hüseynov və bir sıra məsul şəxsləri mənimlə onlayn formatda görüşdülər”, - deyən A.Süleymanlı davam edib: “Hazırda istər mənəvi, istərsə də fiziki baxımdan özümü yaxşı hiss edirəm. Çalışırıq ruh yüksəkliyimizi itirməyək. Əsas məsələ o oldu ki, biz Prezidentimizin dəmir yumruğunu ermənilərin başına endirdik, Xocalıda, Kəlbəcərdə və digər işğal olunmuş ərazilərimizdə qətliama məruz qalan soydaşlarımızın qisasını aldıq. Başda Ali Baş Komandanımız İlham Əliyev olmaqla, Vətənimizin düşmən işğalından azad edilməsində iştirak edən, eləcə də qalibiyyətin verdiyi qürur hissini bizə yaşadan hər bir kəsə minnətdaram”.

Günel Məlikova

AZƏRTAC-ın xüsusi müxbiri

İstanbul