Vyana, 13 aprel, AZƏRTAC

Vyanada fəaliyyət göstərən Azərbaycan Mədəniyyət Mərkəzində “Azərbaycan: Şərqlə Qərbi birləşdirən körpü” adlı məruzə axşamı təşkil olunub.

Sıralarında əsasən diplomatlar və onların ailə üzvlərini birləşdirən “Vyana Kosmopolitlər Klubu” ilə əməkdaşlıq şəraitində təşkil olunan tədbirdə Mədəniyyət Mərkəzinin rəhbəri Leyla Qasımova çıxış edib. O, Azərbaycan Mədəniyyət Mərkəzinin milli mədəniyyətimizi Avstriyada tanıtmaq üçün mütəmadi olaraq çeşidli formatlarda tədbirlər təşkil etdiyi və bu istiqamətdə bir sıra təşkilatlarla da uğurlu əməkdaşlıq qurduğunu bildirib.

Tanınmış aparıcı, “Bakının sirləri” verilişinin müəllifi və aparıcı Fuad Axundovu qonaqlara təqdim edən L.Qasımova onun Bakı şəhərinin tarixi, memarlığı, insanları barədə ən məlumatlı şəxslərdən biri olduğunu vurğulayıb.

Tədbirdə Fuad Axundov Azərbaycan və xüsusilə Bakı haqda məruzə ilə çıxış edib. Azərbaycanın və onun paytaxtı Bakının multikultural və multietnik xüsusiyyətinə toxunan F.Axundov əsrlərdən bəri ölkəmizdə müxtəlif millət və dinlərin dinc birgə yaşadığını, ölkəmizdə əsl kosmopolit mühitin hakim olduğunu bildirib. O qeyd edib ki, Bakı XIX əsrin əvvəlində əhalisi beş min nəfər təşkil edən kiçik liman şəhərindən neft bumu sayəsində həmin əsrin sonunda Qafqazın ən böyük şəhərinə çevrilib. Şərq həyat tərzi və memarlığını özündə qoruyub saxlayan “İçərişəhər”lə sürətlə inkişaf edən və sənayeləşən, Avropa memarlığı üslubunda binaları ilə şöhrət tapan “Bayır Şəhər” fenomenlərini müqayisəli şəkildə təqdim edən F.Axundov müasir dövrümüzdə də Bakıda Şərq və Qərb mədəniyyətinin və ab-havasının bir-biri ilə sıx inteqrasiya olunmuş şəkildə mövcud olduğunu diqqətə çatdırıb.

Bakı milyonçularının xeyriyyə fəaliyyətinə toxunan məruzəçi onların həyata keçirdiyi sosial-mədəni layihələr, avropalı memarlar sayəsində paytaxtın memarlıq görünüşünə bəxş etdikləri binalar barədə geniş məlumat verib. Müsəlman Şərqində mədəniyyət sahəsində bir çox ilklərin məhz Bakıda ərsəyə gəlməsi və xüsusilə də qadınların bu sahədə oynadığı rol qonaqlar tərəfindən maraqla qarşılanıb. Görkəmli Azərbaycan bəstəkarı Üzeyir Hacıbəylinin həyatından bəhs edən “Uzun ömrün akkordları” filmindən Şərqin ilk opera müğənnisi Şövkət Məmmədovanın 1912-ci ildə Bakıda opera səhnəsinə çıxması və buna görə qoçular tərəfindən ölümlə hədələnməsi fraqmentini tədbir iştirakçılarına təqdim edən F.Axundov həmin hadisədən tam 100 il sonra Bakı şəhərinin “Eurovision” mahnı müsabiqəsinə ev sahibliyi etməsini Azərbaycan cəmiyyətinin keçdiyi transformasiya prosesinə və ölkəmizin inkişaf etmiş müasir və dünyəvi dövlət olmasına ən bariz nümunələrdən biri olduğunu vurğulayıb.

Məruzədən sonra “Vyana Kosmopolitlər Klubu”nun rəhbəri Renate Tomas əməkdaşlıq və dəvət üçün təşəkkür edərək, klubda təmsil olunan üzvlərin ölkələrinə həsr olunmuş məlumatlandırıcı tədbirlərin hər zaman böyük maraq doğurduğunu qeyd edib. O, sıralarında əsasən qadınları bir araya gətirən “Vyana Kosmopolitlər Klubu”nun üzvləri üçün Azərbaycan və Bakı haqqında, xüsusilə də Azərbaycan qadınının uğurları və dünyaya verdiyi töhfələr barədə məruzə üçün təşəkkür edib.

Elgün Niftəliyev

AZƏRTAC-ın xüsusi müxbiri

Vyana