İDMAN
Vyanada ümummilli lider Heydər Əliyevin 90 illik yubileyinə həsr olunmuş beynəlxalq kikboksinq turniri keçirilmişdir
Vyana, 11 may (AZƏRTAC). Avstriyanın paytaxtı Vyana şəhərində ümummilli Heydər Əliyevin 90 illik yubileyinə həsr olunmuş “Azərbaycan və Avropa” kikboksinq üzrə böyük K-1 turniri keçirilmişdir.
Avstriyada fəaliyyət göstərən Azərbaycan Akademik Birliyinin və “İron Fist” İdman Mərkəzinin birgə təşkil etdiyi turnir Azərbaycanın Avstriyadakı səfirliyinin, baş sponsorlar “Gilan Holdinq” və “Garant Holdinq“ şirkətlərinin dəstəyi ilə reallaşdırılmışdır.
Turnirin keçirilməsinə Azərbaycan Kingboksinq Federasiyası, ARDNŞ-nin Avstriyadakı nümayəndəliyi və digər təşkilatlar maliyyə və təşkilati dəstək göstərmişlər.
Turnirdə Azərbaycanın tanınmış K-1 kikboksinq ustaları Avropanın 10 ölkəsini (Avstriya, İtaliya, Türkiyə, Macarıstan, İsveçrə, Serbiya, Hollandiya, Rumıniya, Polşa, Bosniya və Herseqovina) təmsil edən idmançılarla qarşılaşmışlar. K1 turniri çərçivəsində 12 döyüş keçirilmişdir.
Azərbaycan Kikboksinq Federasiyasının prezidenti, Milli Məclisin deputatı Adil Əliyev və Azərbaycan Akademik Cəmiyyətinin sədri Elvin Süleymanov tədbirin açılış mərasimində çıxış edərək ümummilli lider Heydər Əliyevin xatirəsinə həsr olunmuş mötəbər yarışın belə böyük formatda ilk dəfə keçirildiyini bildirmiş, idmançılara uğurlar arzulamışlar.
Turnirin ilk görüşü Azərbaycan təmsilçisi Turan Qafarov (64 kq) ilə italiyalı Alessandro Ramazotti arasında olmuşdur. T.Qafarov rəqibi üzərində inamlı qələbə qazanmışdır.
Digər idmançımız Vüqar Kazımov da (91 kq) Macarıstan döyüşçüsü Andras Çorar ilə qarşılaşmadan qalib ayrılmışdır.
Həmin çəki dərəcəsində isveçrəli Yanoş Nitlispax ilə qarşılaşan azərbaycanlı Anar Məmmədov döyüşdən məğlub ayrılmışdır.
Daha bir idmançımız Etiram Rzayev (86 kq) zədə aldığı üçün Serbiya idmançısı Uros Boqoyeviçlə mübarizədə tam gücü ilə mübarizə apara bilməmişdir. İdmançımız Tural Bayramov da Hüsnü Sarı (Türkiyə) ilə qarşılaşmadan məğlub ayrılmışdır.
Ramal Aslanov (Azərbaycan) isə rumıniyalı Kristian Mileanı məğlub etmişdir.
Yarışın əsas döyüşlərindən biri – “Heydər Əliyev” kəməri uğrunda qarşılaşma Zabit Səmədov (Azərbaycan) və Vieslav Kvaşiniyevski (Polşa) arasında baş tutmuşdur. Azərbaycan idmançısı elə ilk raundda rəqibini nokauta salaraq, parlaq qələbə qazanmışdır.
Pərviz Abdullayev (Azərbaycan) və Qabriel Bozan (Avstriya) qarşılaşmasında da P.Abdullayev rinqdən qalib ayrılmışdır.
Daha bir maraqlı qarşılaşma “Heydər Əliyev” kəməri uğrunda 72,5 kq çəki dərəcəsində olmuşdur. Kamil Şərifov (Azərbaycan) və Nils Vilmink (Hollandiya) qarşılaşması holland kikboksçunun qələbəsi ilə başa çatmışdır.
Azərbaycan idmançısı (91 kq) Zamiq Atakişiyev də rəqibi Sam Tevetteyə (Hollandiya) məğlub olmuşdur.
Azərbaycanlı idmançı Alim Nəbiyev isə (72,5 kq) Adem Bozkurtu (Türkiyə) nokauta salmışdır.
Ağır çəki dərəcəsində Ağalar Sadıxzadə (Azərbaycan) və Muamer Tüfəkçik (Bosniya və Herseqovina) qarşılaşmasında bosniyalı idmançı xal hesabı ilə qalib gəlmişdir.
Komanda hesabında Azərbaycanın və Avropanın kikboksçuları xalları yarı bölmüşlər və qarşılaşma 6:6 hesab ilə başa çatmışdır.
Turnir başa çatdıqdan sonra Azərbaycanın Avstriyadakı səfiri Qalib İsrafilov qalibləri təbrik etmiş, onlara uğurlar arzulamışdır.
Elgün Niftəliyev
AZƏRTAC-ın xüsusi müxbiri
Vyana