MƏDƏNİYYƏT
“XAKİ-PAYİN TACI-SƏRİM” KİTABININ TƏQDİMAT MƏRASİMİ OLMUŞDUR
Tədbiri Seyid Nigarinin mənəvi varislərindən biri Şahlıq Çələbi Əhməd Çələbi qızı açaraq bildirdi ki, Azərbaycan müstəqillik qazandıqdan sonra istər çar Rusiyası, istərsə də sovet imperiyası dövründə repressiyalara, sürgünlərə məruz qalmış neçə-neçə vətən övladımızın adı, qiyməti, ləyaqəti özünə qaytarıldı. Onlardan biri də uzun illər hətta adının çəkilməsinə qadağa qoyulmuş, təriqət şairi Mir Həmzə Seyid Nigari olmuşdur.
Natiq belə adamların ruhən doğma vətəninə qaytarılmasında müstəqil Azərbaycan dövlətinin yaradıcısı, ümummilli liderimiz Heydər Əliyevin əvəzsiz xidmətlərini xüsusi vurğuladı. Dahi öndərimizin xatirəsinin bir dəqiqəlik sükutla yad olunmasını mərasim iştirakçlarından xahiş etdi.
Ş.Çələbi kitabın çapı ilə bağlı bildirdi ki, həyat yoldaşım mərhum Yəhya Çələbi Seyid Nigarinin “Divan”ını öz əli ilə köçürüb çapa hazırlamışdı. Lakin faciəli ölüm ona bu arzusunu gerçəkləşdirməyə imkan vermədi. Mən özümə borc bildim ki, həmin əlyazmanı çap etdirməklə onun arzusunu yerinə yetirim.
Kitabın redaktoru, şair-publisist Əli Rza Xələfli Seyid Nigarinin həyat və yaradıcılığı barədə tədbir iştirakçılarına ətraflı məlumat verdi. Dedi ki, şair 1795-ci ildə Qarabağın Çijimli kəndində, Mir Paşa təxəllüsü ilə məşhur olan Mir Püknəddin Əfəndinin ailəsində dünyaya göz açmışdır. Şairin şerlərindən və əldə edilən tarixi sənədlərdən məlum olur ki, Seyid Nigari nəsli ilə Məhəmməd (ə.s.) peyğəmbərin qohumluq əlaqəsi varmış. Şairin çar Rusiyasının işğalçılıq siyasətinə qarşı yönəldilmiş müridizm azadlıq hərəkatının rəhbərlərindən biri kimi Sibirə sürgün edilməsi qərara alınmışdır. Sürgündən yayınmaq üçün o, Anadoluya gedərək orada yaşamış, 1886-cı ildə vəfat edərək vəsiyyətinə əsasən, Amasiya şəhərində dəfn olunmuşdur. Zəngin ədəbi irsə malik şair Nəqşibəndi təriqətinin görkəmli simalarından olmuşdur.
Azərbaycan Milli Elmlər Akademiyasının müxbir üzvü Tofiq Hacıyev, Cəbrayıl rayon tarix-diyarşünaslıq muzeyinin direktoru Tariyel Abbasov, Milli Məclisin deputatları, AMEA-nın müxbir üzvü Novruz Quliyev, Kərəm Əliyev və başqaları mərasimdə çıxış edərək bildirdilər ki, Seyid Nigarinin yaradıcılığının tam açılması üçün onun əsərləri geniş tədqiqata cəlb olunmalı, hərtərəfli araşdırmalar aparılmalıdır.