MƏDƏNİYYƏT


Xanəndə və instrumental muğam ifaçılarının V Respublika müsabiqəsi öz işinə başlayıb

Bakı, 20 fevral, AZƏRTAC

Təhsil Nazirliyi və Azərbaycan Milli Konservatoriyasının (AMK) birgə təşkilatçılığı ilə Xanəndə və instrumental muğam ifaçılarının V Respublika müsabiqəsi öz işinə başlayıb.

Konservatoriyanın mətbuat xidmətindən AZƏRTAC-a bildirilib ki, müsabiqənin ilk turunun birinci hissəsi baş tutub.

Müsabiqənin açılış mərasimində AMK-nın rektoru, Xalq Artisti Siyavuş Kərimi çıxış edərək bildirib ki, respublika muğam müsabiqələri mədəniyyətimizi bəzəyən qədim muğamı qorumaq adına böyük əhəmiyyət daşıyır və eyni zamanda, gənc istedadlı muğam ifaçılarının özünü göstərə bilməsi üçün əla imkanlar yaradır. Müsabiqənin keçiriləcəyi günləri musiqi bayramı adlandıran rektor S. Kərimi, bu günlər ərzində səmərəli iş aparılacağından və milli muğamımızın gələcəyi naminə ədalətli qərarlar qəbul olunacağından əmin olduğunu dilə gətirib.

Daha sonra iştirakçıların sıra nömrələrinin təyin olunması üçün püşk atılıb və ardından instrumental muğam ifaçılarının çıxışlarına start verilib. İlk gündə 7 xanəndə və 10 instrumental ifaçı, münsiflər heyəti tərəfindən dinlənilib.

Qeyd edək ki, ümumilikdə 36 iştirakçı müsabiqədə iştirak edir. Onlardan 15-i xanəndə, 21-i isə instrumental muğam ifaçısıdır.

Müsabiqənin ilk turunun ikinci hissəsi fevralın 21-də keçiriləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.