REGİONLAR
Xocalı faciəsi dinc əhaliyə qarşı törədilən soyqırımı cinayətlərinin ən dəhşətlisidir
Qax, 26 fevral, Mustafa Dadaşov, AZƏRTAC
Xocalı soyqırımının 26-cı ildönümü respublikamızın şimal-qərb bölgəsində anım mərasimləri ilə qeyd olunub.
AZƏRTAC-ın bölgə müxbiri xəbər verir ki, faciənin ildönümü ilə əlaqədar fevralın 26-da Qax şəhərində keçirilən anım tədbirinin iştirakçıları əvvəlcə Şəhidlər xiyabanına gələrək, Vətənimizin azadlığı uğrunda canlarından keçən igid həmvətənlərin məzarları üzərinə gül-çiçək düzüb, şəhidlərin xatirəsini ehtiramla yad ediblər.
Sonra tədbir iştirakçıları Yeni Azərbaycan Partiyası rayon təşkilatının inzibati binasının foyesində məktəblilərin Xocalı mövzusunda çəkdikləri rəsm əsərlərindən ibarət sərgiyə baxıblar.
Anım tədbirində rayon icra hakimiyyətinin başçısı Musa Şəkiliyev çıxış edərək, ermənilərin 1992-ci il fevralın 25-dən 26-na keçən gecə Xocalıda həyata keçirdikləri amansız qətliamın bəşəriyyətə, insanlığa qarşı törədilmiş ən dəhşətli cinayət olduğunu bildirib. Qeyd edib ki, bu faciə iki yüz ilə yaxın müddətdə erməni millətçiləri tərəfindən azərbaycanlılara qarşı davamlı olaraq həyata keçirilən etnik təmizləmə və soyqırımı siyasətinin ən qanlı səhifəsidir. Xocalı faciəsi Ermənistanın Dağlıq Qarabağı işğal etmək məqsədilə apardığı işğalçılıq müharibəsinin gedişində dinc azərbaycanlı əhaliyə qarşı törətdiyi soyqırımı cinayətlərinin ən dəhşətlisidir.
Rayon icra hakimiyyəti başçısının müavini Vəfa Heydərovanın “Xocalı qətliamı insanlığa qarşı yönəlmiş amansız cinayətdir” mövzusunda məruzəsində erməni millətçilərinin xalqımıza qarşı zaman-zaman həyata keçirdikləri soyqırımı siyasətindən ətraflı bəhs olunub, Xocalı faciəsinin acı nəticələri konkret faktlarla diqqətə çatdırılıb.
Çıxışlarda Xocalı soyqırımının acı nəticələrinin dünya ictimaiyyətinə çatdırılmasında, faciəyə hüquqi-siyasi qiymət verilməsində ümummilli lider Heydər Əliyevin tarixi xidmətləri önə çəkilib, hazırda bu istiqamətdə ölkə rəhbərliyi tərəfindən məqsədyönlü tədbirlərin həyata keçirildiyi xüsusi vurğulanıb.
Tədbirin sonunda Xocalı faciəsindən bəhs edən film nümayiş etdirilib.
X X X
Öz miqyasına və dəhşətlərinə görə heç bir tarixi hadisə ilə müqayisə olunmayan Xocalı soyqırımının törədilməsində əsas məqsəd Dağlıq Qarabağı və digər Azərbaycan torpaqlarını ələ keçirmək, xalqımızın müstəqillik uğrunda mübarizə əzmini qırmaq idi.
AZƏRTAC-ın bölgə müxbiri xəbər verir ki, bu barədə Xocalı faciəsinin iyirmi altıncı ildönümü ilə əlaqədar fevralın 26-da Zaqatala şəhərində keçirilən anım tədbirində danışılıb.
Rayon rəhbərliyi və ictimaiyyət nümayəndələri əvvəlcə soyqırımı qurbanlarının xatirəsinə ucaldılmış abidənin önünə gül dəstələri düzüb, faciə qurbanlarının xatirəsini ehtiramla yad ediblər.
Tədbirdə rayon icra hakimiyyəti başçısının birinci müavini Tofiq Əhmədov çıxış edərək, insanlığa qarşı ən qəddar və amansız kütləvi terror hadisələrindən olan Xocalı faciəsinin erməni millətçilərinin Azərbaycan xalqına qarşı yürütdüyü soyqırımı və etnik təmizləmə siyasətinin tərkib hissəsi olduğunu bildirib.
Rayon icra hakimiyyəti başçısının müavini Vəfa Süleymanovanın məruzəsində ərazilərimizin 20 faizinin düşmən tapdağı altında olduğu, bir milyondan artıq soydaşımızın qaçqın və məcburi köçkün həyatı yaşadığı bir dövrdə keçmişi unutmamağın ölkəmizin bu günü və gələcəyi üçün böyük əhəmiyyət daşıdığı qeyd olunub. Bildirilib ki, Azərbaycan xalqına qarşı törədilən vəhşiliklərlə bağlı tarixi hadisələrin ölkə daxilində və ölkədən kənarda tanıdılması məqsədi ilə görülən işlər dövlətimizin həyata keçirdiyi siyasətin mühüm tərkib hissəsidir. Artıq dünyanın bir sıra ölkələrində erməni millətçilərinin törətdikləri faciələr soyqırımı aktı kimi tanınır.
Çıxış edənlər soyqırımı ilə bağlı həqiqətlərin dünya ictimaiyyətinə çatdırılması və Xocalı faciəsinə hüquqi-siyasi qiymət verilməsi istiqamətində ümummilli lider Heydər Əliyevin atdığı qətiyyətli addımları yüksək qiymətləndiriblər. Vurğulanıb ki, məhz Ulu Öndərin sarsılmaz iradəsi və müdrik siyasəti nəticəsində Qarabağ problemi, o cümlədən Xocalı faciəsi ətrafında yaradılan informasiya blokadasına son qoyulub.
Həmin gün Zaqatalada məskunlaşan Xocalıdan olan məcburi köçkün ailələrinə rayon icra hakimiyyəti tərəfindən ərzaq yardımı göstərilib.
X X X
Tariximizin ən qanlı səhifələrindən olan Xocalı faciəsinin 26-cı ildönümü ilə əlaqədar Balakən rayonunda anım tədbirləri bir neçə gündür davam edir.
AZƏRTAC-ın bölgə müxbiri xəbər verir ki, faciənin ildönümü ilə bağlı rayon icra hakimiyyətində Balakəndə məskunlaşan Xocalı sakinləri ilə görüş olub. Tədbirdə rayon icra hakimiyyətinin başçısı İslam Rzayev ermənilərin zaman-zaman azərbaycanlılara qarşı törətdikləri vəhşiliklər, xalqımızın tarixinə qanla yazılan Xocalı faciəsinin acı nəticələri, Xocalı soyqırımı ilə bağlı həqiqətlərin dünya ictimaiyyətinin çatdırılması istiqamətində görülən işlər barədə ətraflı məlumat verib.
Tədbirdə çıxış edən xocalılılar doğma şəhərlərinin mənfur düşməndən azad olunacağı günü səbirsizliklə gözlədiklərini və bu günün tezliklə gələcəyinə əmin olduqlarını vurğulayıb, məcburi köçkünlərə göstərilən diqqət və qayğıya görə dövlətimizin başçısına minnətdarlıqlarını bildiriblər.
Fevralın 26-da rayon rəhbərliyi və ictimaiyyət nümayəndələri Şəhidlər xiyabanına gələrək, Qarabağ müharibəsində şəhid olan igid həmyerlilərin xatirəsinə ucaldılan abidənin önünə gül-çiçək düzüblər.
Sonra tədbir iştirakçıları rayon Mədəniyyət Mərkəzinin foyesində Xocalı faciəsindən bəhs edən rəsm sərgisi ilə tanış olub, mədəniyyət işçilərinin hazırladıqları ədəbi-bədii kompozisiyaya baxıblar.
X X X
Xocalı faciəsinin ildönümü Oğuz rayonunda da silsilə tədbirlərlə qeyd olunub. Tədbirlər planına uyğun olaraq, rayonun müəssisə və təşkilatlarında, ümumtəhsil məktəblərində, mədəniyyət ocaqlarında anım tədbirləri, konfranslar, müsabiqələr keçirilib, sərgi və guşələr təşkil edilib.
AZƏRTAC-ın bölgə müxbiri xəbər verir ki, fevralın 26-da rayon ictimaiyyətinin nümayəndələri Şəhidlər xiyabanına gələrək, torpaqlarımızın bütövlüyü uğrunda mübarizədə şəhid olan həmvətənlərimizin xatirəsini ehtiramla yad ediblər.
Rayon icra hakimiyyətində keçirilən toplantıda çıxış edənlər erməni millətçilərinin keçmiş sovet ordusunun 366-cı alayının köməyi ilə 26 il əvvəl Xocalıda törətdikləri qırğının acı nəticələrindən danışıb, faciəni törədənləri lənətləyiblər. Bildirilib ki, Xocalı haqqında həqiqətlərin üzə çıxarılması, bu faciənin xalqımıza qarşı soyqırımı aktı kimi tanınması üçün Azərbaycan dövləti tərəfindən bütün zəruri addımlar atılır. Bu istiqamətdə görülən işlər artıq öz bəhrəsini verməkdədir. Dünyanın bir sıra dövlətlərinin parlamentləri, beynəlxalq təşkilatlar Xocalı qətliamını soyqırımı kimi tanıyıb və onu törədənləri kəskin pisləyiblər.