QAN YADDAŞI
Xocalı soyqırımı qurbanlarının xatirəsi İordaniyada da anılıb
Bakı, 25 fevral, AZƏRTAC
Azərbaycanın İordaniyadakı səfirliyinin təşəbbüsü ilə fevralın 25-də Xocalı soyqırımının 29-cu ildönümü ilə əlaqədar paytaxt Əmman şəhərinin Yeni Bədr rayonunda ümummilli lider Heydər Əliyevin adını daşıyan küçənin üzərində yerləşən İordaniya-Azərbaycan dostluq rəmzini bildirən dairədə anım mərasimi keçirilib.
Səfirlikdən AZƏRTAC-a bildiriblər ki, həmin dairənin hər iki tərəfdən keçən, Ulu Öndərin adını daşıyan küçə nəqliyyat vasitələrinin intensiv hərəkəti ilə fərqlənir. Fevralın 24-də dairənin hər iki tərəfində səfirlik tərəfindən ərəb dilində hazırlanmış dayağı iki metrə olan və üzərində “Azərbaycan xalqına qarşı Xocalı soyqırımı. 106-sı qadın, 70-i qoca və 63-2 uşaq olmaqla, 613 nəfər qətlə yetirilib. Xocalıya Ədalət. 26 fevral 1992-ci il” yazısı olan şəkilli lövhə quraşdırılıb.
Ölkədə COVID-19 pandemiyası ilə əlaqədar tətbiq edilmiş qaydalara riayət edilməklə, Əmman şəhər Böyük Bələdiyyəsinin nümayəndələri və Yeni Bədr Bələdiyyəsinin rəhbər heyətinin, eləcə də İordaniyada Azərbaycan Diaspora cəmiyyətinin rəhbəri Zümrüd Dadaşovanın və səfirliyin əməkdaşlarının iştirakı ilə təşkil edilən tədbirdə çıxış edən səfirliyin müvəqqəti işlər vəkili Elnur Şahhüseynov Azərbaycan xalqının ümummilli lideri Heydər Əliyevin adını daşıyan küçənin salınmasına və dostluğumuzun rəmzi olan dairənin inşasına, habelə ölkəmizə aid bütün məsələlərdə davamlı diqqət və maraq göstərdiklərinə görə, İordaniya rəsmilərinə dərin təşəkkürünü bildirib.
Xocalı soyqırımı barəsində dolğun məlumat verən E.Şahhüseynov dinc əhalimizə qarşı törədilmiş vəhşiliklərin, onların amansızcasına qətlə yetirilməsinin bütün bəşəriyyətə qarşı cinayət olduğunu xüsusi qeyd edib, İordaniya Senatının 2013-cü ilin 19 iyun tarixində Xocalı qətliamını pisləyən bəyanat qəbul etdiyini söyləyib və bu bəyanatın bütün Azərbaycan xalqı tərəfindən yüksək təqdir edildiyini vurğulayıb.
Sonra o, ümummilli lider Heydər Əliyevin Azərbaycanda siyasi hakimiyyətə qayıdışından sonra Xocalı faciəsinə dair reallıqların qlobal səviyyədə təbliğ edilməsinə başlandığını qeyd edib. E.Şahhüseynov Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildə başladılan "Xocalıya Ədalət!" beynəlxalq kampaniyasının Xocalı həqiqətlərinin dünya ictimaiyyətinə çatdırılması işinə mühüm töhfə verdiyini söyləyib.
Tədbirdə çıxış edən İordaniyada Azərbaycan Diaspora cəmiyyətinin rəhbəri Z.Dadaşova Xocalı faciəsinə dair öz fikirlərini bölüşüb, rəhbərlik etdiyi cəmiyyət tərəfindən bu illər ərzində görülmüş işlər barədə qısa danışıb.
Daha sonra Yeni Bədr Bələdiyyəsinin sədri Ratib əl-Abbadi fikirlərini bölüşüb, erməni təcavüzünü qətiyyətlə pisləyib, Xocalıda kütləvi qırğının bəşəriyyətə qarşı vəhşilik olduğunu qeyd edib.
İordaniya rəsmiləri Vətən müharibəsində qazanılan Zəfər münasibətilə xalqımıza təbriklərini çatdırıblar, bu Zəfərin bütün İslam dünyası üçün əhəmiyyətini qeyd ediblər.
Tədbirdə Xocalı və Vətən müharibəsi qurbanları üçün dualar da edilib.
Yekunda İordaniya-Azərbaycan dostluq rəmzini bildirən dairədə Xocalı qurbanlarının xatirəsinə ağaclar əkilib.