QAN YADDAŞI
Xocalı soyqırımı qurbanlarının xatirəsi Neapolda anılıb
Roma, 1 mart, AZƏRTAC
Xocalı soyqırımının 25-ci ildönümü ilə əlaqədar Azərbaycanın İtaliyadakı səfirliyi, Neapol-Bakı Assosiasiyası və Avropa Azərbaycan Cəmiyyətinin (TEAS) təşkilatçılığı ilə Neapol şəhərində anım tədbiri keçirilib.
Neapol şəhəri və Kampaniya regionu rəsmilərinin, elmi-akademik, işgüzar dairələrin, KİV nümayəndələrinin iştirakı ilə keçirilən tədbiri Neapol-Bakı Assosiasiyasının prezidenti Cüzeppe Kaniliya açaraq iştirakçıları erməni vəhşiliyinin bariz nümunəsi olan Xocalı soyqırımı haqda çəkilmiş “Sonsuz dəhliz” filminə baxmağa dəvət edib.
Film Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində çəkilib və Avropa Azərbaycan Cəmiyyətinin dəstəyi ilə hər il dünyanın müxtəlif şəhərlərində təqdim olunur.
Bu film tanınmış prodüser Aleksandras Brokas və nüfuzlu “Grammy Award” mükafatçısı Cerald Rafşun Xocalı dəhşətlərinin şahidi olan iki xarici jurnalistin faciədən 20 il sonra yenidən Azərbaycana səfər edərək qətliamdan xilas olmuş hadisə şahidləri ilə görüşməsi və onların bölüşdüyü xatirələr, eləcə də Ermənistan tərəfindən faciənin təşkilində birbaşa iştirak etmiş şəxslərlə müsahibələri əsasında çəkilib.
Filmin təqdimatından sonra Azərbaycanın İtaliyadakı səfiri Məmməd Əhmədzadə 1992-ci il fevralın 25-dən 26-na keçən gecə Xocalıda Ermənistan silahlı qüvvələri tərəfindən dinc azərbaycanlı əhaliyə qarşı törədilmiş qətliam barədə danışıb.
Səfir Azərbaycanın erməni qəsbkarları tərəfindən zəbt olunmuş ərazilərinin – Dağlıq Qarabağ regionunun və ətraf rayonların hələ də işğal altında qaldığını, həmin ərazilərdə mədəni-tarixi irsimizin məhv edildiyini, etnik təmizləməyə məruz qalmış 1 milyondan artıq azərbaycanlının öz doğma yurd-yuvalarından didərgin düşdüyünü, beynəlxalq təşkilatlar tərəfindən münaqişə ilə bağlı qəbul edilmiş çoxsaylı sənədlərə Ermənistanın məhəl qoymadığını vurğulayıb.
Xocalıda baş verənlərlə bağlı beynəlxalq səviyyədə məlumatlandırmanın daha da genişləndirilməsinin vacibliyini bildirən səfir bu xüsusda İtaliyanın müxtəlif şəhərlərində tədbirlərin təşkil olunduğu barədə məlumat verib. O, Ermənistanın Azərbaycana qarşı hərbi təcavüz siyasətindən əl çəkməsi üçün beynəlxalq ictimaiyyətin qətiyyətli mövqe nümayiş etdirməsinin vacibliyini vurğulayıb.
Tədbirdə iştirak edən Milli Məclisin deputatı Qənirə Paşayeva bu soyqırımı zamanı dinc azərbaycanlı əhaliyə qarşı törədilmiş vəhşiliklər, o cümlədən uşaqların, qadınların, yaşlıların vəhşicəsinə, ağlasığmaz qəddarlıqla qətlə yetirilməsi barədə məlumat verib. Ədalətin bərqərar olması üçün Xocalıda törədilmiş qətliamın günahkarlarının mühakimə olunmasının və beynəlxalq ictimaiyyətin bu soyqırımına siyasi-hüquqi qiymət verməsinin zəruriliyini bildirən deputat İtaliya Senatında Xocalı soyqırımının 25-ci ildönümünün anılması ilə bağlı verdikləri bəyanatlara görə senatorlara təşəkkürünü ifadə edib. O vurğulayıb ki, erməni tərəfinin baş verənlərin müharibə olması iddiasına italiyalı senator Sercio Divina tutarlı cavab verərək, Xocalıda qətlə yetirilənlərin dinc əhali olduğunu və dinc əhaliyə qarşı müharibə aparılmasının heç bir məntiqə sığmadığını bildirib.
Neapol-Bakı Assosiasiyasının vitse-prezidenti Elnur Camalxanov Xocalı qətliamını ermənilər tərəfindən XIX əsrdən başlayaraq azərbaycanlılara qarşı yürüdülən soyqırımı və torpaqlarımızın işğalı siyasəti prizmasından təqdim edib.
Tədbirdə yerli kütləvi informasiya vasitələrinə müsahibələr verilib.
Asiman Əsədov
AZƏRTAC-ın xüsusi müxbiri
Roma