SİYASƏT
Xorvatiya ictimaiyyəti Ermənistanın ölkəmizə qarşı hərbi təxribatı barədə məlumatlandırılıb
Zaqreb, 8 oktyabr, AZƏRTAC
Azərbaycanın Xorvatiyadakı səfiri Fəxrəddin Qurbanov Xorvatiyada milli azlıqları təmsil edən “Kali Sara” Birliyinin mərkəzi ofisində Ermənistanın ölkəmizə qarşı hərbi təxribatı barədə təqdimatla çıxış edib.
AZƏRTAC xəbər verir ki, səfir əvvəlcə sentyabrın 27-dən başlayan döyüşlərdə Ermənistan Azərbaycanın xüsusilə mülki əhalisini və mülki infrastrukturlarını hədəfə aldığını qeyd edib. Bildirib ki, Ermənistan silahlı qüvvələri Azərbaycanın Dağlıq Qarabağdan uzaqda yerləşən Gəncə, Mingəçevir, Beyləqan, Bərdə və digər şəhərlərini atəşə tutublar.
Tədbir iştirakçılarına Ermənistan-Azərbaycan Dağlıq Qarabağ münaqişəsinin tarixi və hüquqi aspektləri, Azərbaycanın Dağlıq Qarabağ bölgəsi və onun ətrafındakı 7 rayonun 30 ildir Ermənistan silahlı qüvvələrinin işğalı altında saxlanması, bir milyondan çox azərbaycanlının doğma yurdundan didərgin düşməsi, BMT Təhlükəsizlik Şurasının Azərbaycanın işğal olunmuş torpaqlarından erməni silahlı qüvvələrinin dərhal, tam və qeyd-şərtsiz çıxmasını tələb edən 4 qətnaməsinə işğalçı tərəfin riayət etməməsi haqqında ətraflı məlumat verilib.
Diplomat mətbuatda, sosial şəbəkələrdə Ermənistanın Azərbaycanın guya Suriyadan gələn muzdlu döyüşçülərdən istifadə etməsi ilə bağlı yaydığı əsassız iddiaları təkzib edib, ölkəmizin müasir standartlara uğun komplektləşmiş ordusunun torpaqlarımızı qorumağa hər zaman qadir olduğunu vurğulayıb. Qeyd edib ki, əksinə, Ermənistan açıq şəkildə PKK terror təşkilatının üzvlərini, Suriya və Livandan erməni mənşəli könüllülər adı altında muzdluları qeyri-qanuni şəkildə Azərbaycanın işğal altında olan ərazilərində yerləşdirib.
F.Qurbanov Xorvatiyanın bəzi KİV-lərində yayımlanan xəbərlərə də toxunub. Bildirib ki, Ermənistan tərəfindən ortaya atılan “guya Qarabağ uğrunda müharibə dini zəmində baş verir”, “xristian və İslam qarşıdurmasıdır” kimi iddiaların tamamilə əsassız olduğunu vurğulayıb. Xorvatiyada dini inanca olan həssaslığı nəzərə alaraq, belə məlumatların əhali arasında çaşqınlıq yaratmaq və Azərbaycan xalqının haqqı olan öz torpaqlarına qayıtmaq hüququna kölgə salmaq məqsədi güddüyünü deyib. Səfir Azərbaycanda uzun illərdir multikonfessional və tolerant mühitin hökm sürdüyünü qeyd edib.
Həmçinin bildirilib ki, Ermənistanın baş naziri N.Paşinyanın danışıqlar prosesini mənasız edən bəyanatları, müdafiə nazirinin “yeni torpaqlar üçün yeni müharibə” hərbi doktrinasını elan etməsi ölkəmizi təxribata çəkmək məqsədi daşıyıb.
Tədbirdə Xorvatiya parlamentinin üzvü V.Kaytazi, “Kali Sara” Birliyinin rəhbərlər üzvləri və ictimaiyyətin nümayəndələri iştirak ediblər.
İqbal Hacıyev
AZƏRTAC-ın xüsusi müxbiri
Zaqreb