REGİONLAR
YAP Naxçıvan Şəhər Təşkilatı üzvlərinin sayı 17 min nəfəri ötüb
Naxçıvan, 26 iyul, AZƏRTAC
Müstəqil Azərbaycan Respublikasında dövlət quruculuğu prosesi bilavasitə Yeni Azərbaycan Partiyasının fəaliyyəti ilə bağlıdır. 26 il əvvəl Naxçıvanda ulu öndər Heydər Əliyev tərəfindən əsası qoyulan partiya dahi liderin milli dövlətçilik konsepsiyasını dönmədən həyata keçirib.
AZƏRTAC-ın Naxçıvan bürosu xəbər verir ki, bu fikirlər Yeni Azərbaycan Partiyası (YAP) Naxçıvan Şəhər Təşkilatı şurasının iclasında səsləndirilib.
İclasda 2018-ci ilin birinci yarısında görülmüş işlər və qarşıda duran vəzifələr barədə məruzəsində təşkilatın sədri, Naxçıvan Muxtar Respublikası Ali Məclisinin deputatı Elman Cəfərli bildirib ki, ötən müddətdə ölkəmiz, o cümlədən onun ayrılmaz tərkib hissəsi olan Naxçıvan Muxtar Respublikası sürətli inkişaf yolu ilə irəliləyib. Muxtar respublikanın paytaxtı Naxçıvan şəhəri müasirliklə qədimliyin, Şərq və Qərb mədəniyyətlərinin qovuşduğu məkana çevrilib. Şəhərimizin 2018-ci il üçün İslam Mədəniyyətinin Paytaxtı və Azərbaycanın Gənclər Paytaxtı elan edilməsi onun beynəlxalq tədbirlərin keçirildiyi məkan kimi nüfuzunu daha da artırıb. Bütün bu inkişaf proseslərində YAP-ın üzvləri də yaxından iştirak ediblər.
Elman Cəfərli qeyd edib ki, partiyanın Naxçıvan Şəhər Təşkilatı öz fəaliyyətini YAP-ın qurultayları, partiyanın Muxtar Respublika Təşkilatının 2014-cü ilin noyabrında keçirilən V Konfransı və Muxtar Respublika Təşkilatı Siyasi Şurasının 2017-ci il martın 16-da keçirilən iclasında qarşıya qoyulan vəzifələrin ardıcıl icrası istiqamətində quraraq, cəmiyyətin ümumi inkişaf tempinə adekvat fəaliyyət göstərib. Bu baxımdan təşkilatın 2018-ci il üçün iş planında nəzərdə tutulan tədbirlərin vaxtlı-vaxtında və yüksək səviyyədə həyata keçirilməsi, ilk təşkilatlarla işin gücləndirilməsi, siyasi-ideoloji işdə və partiyaya yeni üzvlərin cəlb edilməsi məsələsində keyfiyyət amili prioritet olub.
Ötən müddətdə təşkilatda 5 İdarə Heyəti, 2 şura yığıncağı, əlamətdar və tarixi hadisələrlə bağlı 5 elmi-praktik konfrans, 1 kütləvi idman yarışı, 1 “dəyirmi masa”, 2 treninq olmaqla, ümumilikdə, 10 kütləvi siyasi tədbir, partiyaya üzv qəbulu ilə bağlı müsahibələr keçirilib.
Elman Cəfərli deyib: 2018-ci ilin 6 ayı ərzində YAP-a üzv qəbul olmaq üçün müraciət edən 513 nəfərdən 485-i partiya sıralarına qəbul olunub ki, bunların da 474 nəfərini və ya 97,7 faizini 18-35 yaşlı gənclər, 283 nəfərini və ya 58,3 faizini qadınlar təşkil edir. Nəticədə, 2018-ci il iyulun 1-nə YAP Naxçıvan Şəhər Təşkilatı üzvlərinin sayı 17 min 484 nəfərə çatıb. Onlardan 9178 nəfəri, yaxud 52,5 faizi qadınlar, 10 min 487 nəfəri, yaxud 60 faizi 18-35 yaş arası gənclərdir. Üzvlərdən 2 nəfəri Azərbaycan Respublikası Milli Məclisinin, 19 nəfəri isə Naxçıvan Muxtar Respublikası Ali Məclisinin deputatıdır. Həmçinin təşkilatda 2 akademik, 6 AMEA-nın müxbir üzvü, 26 elmlər doktoru, 162 fəlsəfə doktoru təmsil olunur.
Sonra YAP Naxçıvan Şəhər Təşkilatı Gənclər Birliyinin sədri Cəbi Quliyev, ərazi ilk təşkilatı sədrlərindən şura üzvləri Rasim Bağırov, Çapay Quliyev və Orxan Bağırov çıxış ediblər.