CƏMİYYƏT


YAP Səbail rayon təşkilatının “Botanik” ərazi ilk partiya təşkilatında Müstəqillik Günü münasibətilə yığıncaq keçirilib

Bakı, 8 oktyabr, AZƏRTAC

Oktyabrın 8-də Yeni Azərbaycan Partiyası (YAP) Səbail rayon təşkilatının “Botanik” ərazi ilk partiya təşkilatında (AMEA-nın Botanika İnstitutu) 18 oktyabr – Dövlət Müstəqilliyi Günü münasibətilə yığıncaq keçirilib.

YAP Səbail rayon təşkilatından AZƏRTAC-a bildiriblər ki, yığıncaqda Milli Məclisin deputatı, YAP Səbail rayon təşkilatının sədri, iqtisad elmləri doktoru, professor Şəmsəddin Hacıyev və Botanika İnstitutunun direktoru akademik Validə Əlizadə iştirak ediblər.

Əvvəlcə Azərbaycanın dövlət müstəqilliyinin bərpasının 27-ci ildönümünə həsr olunmuş videofilm nümayiş olunub.

Akademik Validə Əlizadə XX əsrin 90-cı illərində Azərbaycanın dövlət müstəqilliyinin bərpasını yeni siyasi tariximizin ən əlamətdar və mühüm hadisəsi olaraq qiymətləndirib. O, dövlət müstəqilliyimizin möhkəmləndirilməsində və əbədiləşdirilməsində ulu öndər Heydər Əliyevin misilsiz xidmətləri və əvəzolunmaz rolu haqqında danışıb. Qeyd edib ki, Ümummilli Liderin əsasını qoyduğu uzaqgörən siyasət və bu siyasi kursu uğurla davam etdirən Prezident İlham Əliyevin praqmatik idarəçiliyi nəticəsində bu gün müasir və müstəqil Azərbaycan dövləti dinamik şəkildə inkişaf edir, xalqımızın rifahı ildən-ilə daha da yaxşılaşır. Bildirilib ki, Azərbaycan xalqının milli maraqlarına xidmət edən bu siyasəti dəstəkləmək və ölkəmizdə mövcud olan xalq-iqtidar birliyinin daimiliyini təmin etmək hər birimizin vətənpərvərlik borcumuzdur.

Professor Şəmsəddin Hacıyev çıxış edərək XX əsrin sonlarında respublikamızda milli özünəqayıdış hərəkatının başlanması, SSRİ kimi fövqəldövlətin dağılması nəticəsində dövlət müstəqilliyimizin bərpa olunmasının ilk illərində Azərbaycanda gedən son dərəcə gərgin, mürəkkəb və ziddiyyətli proseslər, ictimai-siyasi həyatın bütün sahələrini əhatə edən dərin siyasi-iqtisadi böhran, torpaqlarımızın bir hissəsinin işğal olunmasının respublikadakı vəziyyəti daha da acınacaqlı etməsi, ulu öndər Heydər Əliyevin belə bir çətin anda xalqın təkidi ilə ölkə rəhbərliyinə gəlməsi, Azərbaycanı tənəzzüldən qurtuluş yoluna çıxarması və respublika üçün ən taleyüklü məqamlarda müstəqilliyimizi qoruyub saxlayaraq xilaskarlıq missiyasını böyük cəsarət və fədakarlıqla yerinə yetirməsi haqqında ətraflı danışıb.

Müstəqilliyin hər bir insan və hər bir dövlət üçün ən böyük dəyər olduğunu vurğulayan Milli Məclisin deputatı diqqətə çatdırıb ki, bu gün dünyada 5 minə yaxın millət olsa da, BMT-nin üzvü olan sadəcə 195 dövlət var. Bu dövlətlərin də müasir qloballaşan dünyada müstəqilliyi bir qədər nisbi xarakter daşıyır. Çünki bütün dövlətlər istər siyasi, istərsə iqtisadi cəhətdən bir-birindən ciddi şəkildə asılıdırlar. Qeyd olunub ki, müstəqillik hər dövlətə nəsib olmur, çünki siyasi cəhətdən müstəqil olmaq üçün dövlət hər şeydən əvvəl iqtisadi cəhətdən müstəqil olmalıdır. Dövlətin ərazisinin və əhalisinin təhlükəsizliyini təmin etmək üçün güclü ordusu olmalıdır. Dövlət müstəqil siyasət yürütməyə qadir olmalıdır. Ulu Öndər Heydər Əliyev Azərbaycanın məhz bu mənalarda müstəqil olması üçün ölkəyə rəhbərlik etdiyi 1993-2003-cü illərdə möhkəm siyasi və iqtisadi təməllər formalaşdırıb, Azərbaycanın müstəqilliyinin əbədi və dönməz olması üçün davamlı və dayanıqlı inkişafı təmin edən siyasi kurs müəyyənləşdirib, bütün sosial-iqtisadi sahələrdə əsaslı və sistemli islahatlar həyata keçirib, keçid dövrünün problemlərini həll edib və Azərbaycan tənəzzüldən inkişaf, tərəqqi yoluna qədəm qoyub.

Azərbaycanın müstəqil dövlətçiliyinin bu gün də etibarlı əllərdə olduğunu qeyd edən Ş.Hacıyev Prezident İlham Əliyevin rəhbərliyi ilə son 15 ildə ölkə daxilində və beynəlxalq səviyyədə qazanılan uğurlar, Azərbaycanda müşahidə olunan dinamik iqtisadi tərəqqi, ölkədə yüksək səviyyədə təmin olunmuş ictimai-siyasi sabitlik və gündən-günə daha möhkəmlənən xalq-iqtidar-ordu birliyi haqqında geniş məlumat verib. Deputat diqqətə çatdırıb ki, hazırda dünyada fərqli inkişaf səviyyəsinə malik ölkələr arasında yüzlərlə problem mövcuddur. Avropa kimi nəhəng qitə BREXIT məsələsi və miqrantlarla bağlı problemlər qarşısında aciz qalıb, ABŞ-ın Azərbaycanın yaxın qonşusu olan dövlətlərə – İrana, Türkiyəyə, Rusiyaya qarşı gündən-günə sərtləşdirdiyi sanksiyalar nəticəsində bu ölkələrdə gedən devalvasiya prosesləri, ticarət müharibələri yaxın coğrafiyamızda geoiqtisadi vəziyyəti ildən-ilə daha da mürəkkəbləşdirir. Bütün bunlara baxmayaraq, Azərbaycan inkişaf yolunu uğurla davam etdirir və iqtisadi, hərbi gücünü artırır. Vurğulanıb ki, müstəqil dövlətçiliyimiz əbədidir, dönməzdir, etibarlı əllərdədir və Azərbaycanı gələcəkdə daha böyük uğurlar, qələbələr gözləyir.

Sonda Yeni Azərbaycan Partiyasının sıralarına yeni qəbul olunmuş AMEA-nın Botanika İnstitutunun bir qrup əməkdaşına partiya üzvlük vəsiqələri təqdim olunub.

Vəsiqə alan institut əməkdaşlarını təbrik edən Ş.Hacıyev deyib ki, Azərbaycan xalqı üçün xüsusi əhəmiyyət kəsb edən əlamətdar və tarixi gün – 18 oktyabr ərəfəsində YAP üzvlük vəsiqəsini almaq partiya üzvü üçün böyük və yaddaqalan hadisədir. Deputat hazırda sıralarında 710 mindən çox üzvü birləşdirən YAP-ın respublikamızda həyata keçirilən bütün işlərdə özünəməxsus yeri və rolu olduğunu diqqətə çatdırıb. O, əminliyini bildirib ki, partiyamızın lideri, dövlətimizin başçısı İlham Əliyevin rəhbərliyi ilə qələbələr partiyası olan YAP bundan sonra da böyük uğurlara imza atacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.