Bakı, 7 oktyabr AZƏRTAC

Bolqarıstanla Azərbaycanın diplomatik əlaqələri 30 il bundan əvvəl qurulub və tərəflər arasında 2015-ci ildə imzalanan razılaşmaya görə, bu münasibətlər strateji tərəfdaşlıq səviyyəsinə çatıb. Nəzərə alsaq ki, Bolqarıstan Avropa İttifaqının (Aİ) və NATO-nun kifayət qədər ciddi söz və güc sahibi olan üzvüdür, bu münasibətlərin əhəmiyyətini daha aydın izah etmək olar. Çünki Bolqarıstanla münasibətlərimizin inkişafı, əlaqələrin gücləndirilməsi, həmçinin onun üzv olduğu təşkilatlarla da Azərbaycanın əlaqələrinin yaranmasına, ölkəmizin də həmin təşkilatların yanında əhəmiyyətinin artmasına səbəb olur.

Bu fikirləri AZƏRTAC-a açıqlamasında Ana Vətən Partiyası sədrinin müavini Yalçın Hacızadə söyləyib.

“Hazırda Avropa qitəsi enerji təhlükəsi ilə qarşı-qarşıyadır və görünən odur ki, bu, böyük böhrana çevriləcək. Burada əsas məsələ qitənin qaz tədarükçüsü olan ölkələrinin enerji resurslarından siyasi təzyiq vasitəsi kimi istifadə edərək Avropaya enerji verilməsini dayandırmasıdır. Eyni zamanda, Rusiyadan Avropaya Baltik dənizi vasitəsilə çəkilmiş boru xətlərinin partladılmasıdır. Bu kontekstdə Azərbaycan qazının Şərqi və Mərkəzi Avropa ölkələrinə çatdırılması və bunun gələcəkdə 2 dəfədən çox artırılması həmin dövlətlər üçün enerji təhlükəsizliyini təmin etməsi, ölkəmiz üçün də bazarların genişləndirilməsidir. Enerji resurslarının Avropaya çatdırılmasında yaranan problem təkcə həmin ölkələrdə yaşayan insanların məişət imkanlarını məhdudlaşdırmır, həmçinin iqtisadiyyat, sənaye sahələrinə mənfi təsir etmiş olur”, - deyə politoloq qeyd edib.

O bildirib ki, Azərbaycan bu il Bolqarıstana 500 milyon kubmetr, gələcəkdə isə 2 milyard kubmetrə qədər qaz nəql edəcək. Bu da Bolqarıstanın istifadə etdiyi qazın 50 faizidir. Əlbəttə, bu da Bolqarıstanın enerji təhlükəsizliyinin təmin olunması baxımından onlar üçün vacibdir.

Azərbaycanın enerji siyasəti nəqliyyat yollarının şaxələndirilməsi üzərində qurulub ki, bu da indiki zamanda böyük əhəmiyyətini göstərmiş olur. Bakı-Tbilisi-Ceyhan, TAP və TANAP kimi layihələrin icrası zamanı ermənipərəst qüvvələrin təsiri altına düşərək layihələrə mane olan və ya dəstək vermək istəməyən bəzi qüvvələr və dövlətlər indi düşdükləri böhrandan çıxmaq üçün həmin kəmərlərdən pay almaq məqsədilə əməkdaşlığın yollarını axtarırlar.

Y.Hacızadə deyib: “Azərbaycan-Bolqarıstan münasibətləri təkcə enerji sahəsini əhatə etmir. Ümumiyyətlə, Azərbaycan enerji sektoru ilə yanaşı, qeyri-neft sahəsinin də inkişafında və bu istiqamətdə əməkdaşlıqda maraqlıdır. Elə ona görə də Bolqarıstanla qurulan münasibətlərimizə innovasiya, yüksək texnologiyalar, ticarət, sərmayə qoyuluşu, mədəniyyət və elm sahələri də daxildir.

Azərbaycan “Şərq-Qərb dəhlizi”nin birləşdirilməsində, Xəzər dənizinin enerji resurslarının qısa yollarla Avropaya ötürülməsində coğrafi mövqeyə malikdir. Eyni zamanda, Azərbaycan Xəzər dənizinin sahilində Ələt iqtisadi zonası yaradıb ki, burada tətbiq olunan qanunvericilik, iqtisadi normalar və kommunikasiya beynəlxalq standartlara yüksək səviyyədə cavab verir, həmçinin Asiya və Avropanın birləşməsində böyük imkanlara malikdir. Bundan əlavə, Bolqarıstan da Qara dəniz hövzəsində yerləşən və böyük limanlara malik olan ölkədir. Bizim Qara dəniz ölkələri ilə geniş əlaqələrimiz var. Biz də 1992-ci ildə yaradılmış Qara Dəniz İqtisadi Əməkdaşlıq Təşkilatının üzvüyük. Ölkəmizin artan tranzit imkanları bizə dünya okeanlarına çıxmaq üçün Bolqarıstan da daxil, digər liman ölkələri ilə əlaqələrimizin inkişafına şərait yaradır”.

O əlavə edib ki, bütün bu hadisələrin və imkanların fonunda Prezident İlham Əliyevin Bolqarıstana səfəri, orada biznes sahibləri, digər ölkələrin rəhbərləri ilə keçirdiyi təktərəfli və çoxtərəfli görüşlər, eləcə də Yunanıstan-Bolqarıstan interkonnektorunun açılışı ölkəmizin Avropa İttifaqı üçün əhəmiyyətinin göstəricisi, eyni zamanda, Azərbaycan dövlətinin uzun müddətdir eyni xətt üzrə apardığı uğurlu siyasətin bəhrəsidir.