CƏMİYYƏT


Yardımlı və Cəlilabadda Ağsaqqallar Şurasının rayon təşkilatlarının hesabat-seçki konfransları keçirilib

Bakı, 30 aprel, AZƏRTAC

Azərbaycan Ağsaqqallar Şurası ölkəmizin şəhər və rayonlarında tədbirlərini davam etdirir. Aprelin 29-da Şuranın sədr müavini, professor Elmira Süleymanovanın iştirakı ilə Yardımlı və Cəlilabad rayon təşkilatlarının hesabat-seçki konfransları keçirilib.

Şuranın mətbuat xidmətindən AZƏRTAC-a bildiriblər ki, Nazirlər Kabineti yanında Operativ Qərargahın xüsusi karantin rejimi qaydalarına riayət olunmaqla məhdud tərkibdə keçirilən tədbirlərdə ağsaqqallarla yanaşı, rayon icra hakimiyyətlərinin rəhbərləri də iştirak ediblər.

Hər iki rayonda tədbir iştirakçıları əvvəlcə ulu öndər Heydər Əliyevin abidəsi önünə gül dəstələri qoyaraq xatirəsini ehtiramla yad ediblər.

Konfranslarda torpaqlarımızın azadlığı uğrunda həlak olmuş şəhidlərin və dünyasını dəyişmiş ağsaqqalların xatirəsi bir dəqiqəlik sükutla yad olunduqdan sonra çıxış edən Azərbaycan Ağsaqqallar Şurasının sədr müavini, professor Elmira Süleymanova Yardımlı və Cəlilabad ağsaqqalları ilə görüşməsindən məmnunluğunu bildirib, Azərbaycan Ağsaqqallar Şurası sədrinin salamlarını onlara çatdırıb.

Tədbirlərin müqəddəs Ramazan ayına təsadüf etməsini gözəl əlamət hesab edən Elmira Süleymanova ayların şahı olan Ramazanın Azərbaycanda böyük ruh yüksəkliyi ilə qarşılandığını, ümumiyyətlə, xalqımızın dinimizə, imanımıza, müqəddəs “Qurani-Kərim”ə olan sədaqətini və inancını yüksək qiymətləndirib.

Elmira Süleymanova böyük qürur hissi ilə qeyd edib ki, Prezident, Müzəffər Ali Baş Komandan İlham Əliyevin rəhbərliyi ilə rəşadətli Ordumuzun apardığı 44 günlük Vətən müharibəsi Azərbaycanın şanlı Qələbəsi və Ermənistanın tam təslim olması ilə nəticələnib. Əzəli və əbədi torpaqlarımız 30 illik erməni işğalından azad edilərək, ölkəmizin tarixi ərazi bütövlüyü bərpa olunub. Bildirilib ki, şanlı Ordumuzun zəfər yürüşü, düşmənin bütün torpaqlarımızdan qovulması, Qarabağ münaqişəsinin uğurla və ədalətli şəkillə həlli yaşadığımız bütün bölgədə sülhə və təhlükəsizliyə əvəzsiz töhfə olub. Bu gün savaş meydanında qazandığımız bu tarixi Qələbənin ardından Azərbaycanı daha firavan həyat gözləyir. Elmira Süleymanova, xüsusi olaraq vurğulayıb ki, ümummilli lider Heydər Əliyev tərəfindən əsası qoyulmuş ağsaqqallara və ahıl vətəndaşlara dövlətin diqqət və qayğı siyasəti bu gün Prezident İlham Əliyev tərəfindən uğurla davam etdirilir.

Azərbaycan Ağsaqqallar Şurasının fəaliyyət istiqamətləri, məqsəd və vəzifələri barədə fikirlərini bölüşən E.Süleymanova qeyd edib ki, onların Yardımlı və Cəlilabada gəlməkdə əsas məqsədləri Ağsaqqallar Şurasının rayon təşkilatlarına sədr, həmçinin İdarə Heyəti və Təftiş Komissiyasının üzvlərinin seçkisində iştirak etməkdir. Sevindirici haldır ki, hazırda Respublika Ağsaqqallar Şurası daha intensiv fəaliyyət göstərərək cəmiyyətimizin və dövlətimizin inkişafında özünəməxsus rol oynayır.

Konfranslarda çıxış edən rayon icra hakimiyyətlərinin nümayəndələri bildiriblər ki, ağsaqqallar ölkəmizin ictimai-mədəni həyatında həmişə mühüm rol oynayıblar və Azərbaycanda ağsaqqal sözü hər zaman böyük məna daşıyıb, xüsusi əhəmiyyət kəsb edib. Qeyd edilib ki, dövlətimizin başçısı İlham Əliyevin rəhbərliyi ilə həyata keçirilən dinamik inkişaf prosesində ağsaqqalların fəaliyyəti danılmazdır. Həmçinin rayonların sosial-iqtisadi inkişafında da ağsaqqalların böyük əməyi var.

Daha sonra təşkilati məsələlərə baxılıb - yeni əsasnamələr qəbul edilib, Məzlum Mənsimov Yardımlı Rayon Ağsaqqallar Şurasının, Ədalət Əsgərov isə Cəlilabad Rayon Ağsaqqallar Şurasının sədri seçiliblər. Həmçinin hər iki rayon təşkilatının İdarə Heyətinin və Təftiş Komissiyasının yeni tərkibi formalaşdırılıb.

Sonda Şuranın rayon təşkilatlarının yeni seçilmiş sədrləri, İdarə Heyətinin və Təftiş Komissiyasının üzvləri onlara göstərilmiş yüksək etimada görə tədbir iştirakçılarına təşəkkürlərini ifadə edib, bu etimadı doğrultmaq üçün var qüvvələrini əsirgəməyəcəklərini bildiriblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.