Bakı, 13 iyun, AZƏRTAC

İyunun 13-də Yeni Azərbaycan Partiyası (YAP) Goranboy rayon təşkilatının IX konfransı keçirilib.

Konfransda YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, “Səs” qəzetinin baş redaktoru Bəhruz Quliyev, YAP Mərkəzi Aparatının məsul işçisi Araz Xudadanov, Goranboy Rayon İcra Hakimiyyətinin başçısı Nizaməddin Quliyev iştirak ediblər.

AZƏRTAC xəbər verir ki, YAP Goranboy rayon təşkilatının sədri Elçin İsmayılov konfransda hesabat məruzəsi ilə çıxış edib. Qeyd olunub ki, rayon təşkilatı 87 ərazi ilk partiya təşkilatında 7200 nəfəri öz ətrafında birləşdirir. Üzvlərin 3847 nəfəri qadınlar, 2085 nəfəri isə gənclərdən ibarətdir.

Sonra YAP Goranboy rayon təşkilatının nəzarət-təftiş qrupunun sədr müavini Maksim Bayramov hesabat məruzəsi ilə çıxış edib.

Konfransda çıxış edən rayon təşkilatının Şura üzvü Rüstəm Budaqov, mədəniyyət və turizm şöbəsi ərazi ilk partiya təşkilatının sədri Gündüz Hacıyev, YAP Goranboy rayon təşkilatı Qadınlar Şurasının sədr müavini Yeganə Məmmədova partiyanın yaranması və fəaliyyəti barədə danışıb, təşkilatın hesabat dövründəki fəaliyyətini qənaətbəxş qiymətləndiriblər.

YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə Yeni Azərbaycan Partiyasının yarandığı dövrə nəzər salıb. Bildirib ki, Yeni Azərbaycan Partiyası tarixi zərurətdən yaranan partiyadır: “1992-ci il noyabrın 21-də Azərbaycanın əksər bölgələrindən cəmiyyətin bütün təbəqələrini təmsil edən 550 nümayəndənin iştirakı ilə keçirilən təsis konfransında ulu öndər Heydər Əliyev YAP-ın Sədri seçildi. Bununla da ölkəmizin ictimai-siyasi həyatına Yeni Azərbaycan Partiyası adı altında qüdrətli bir təşkilat daxil oldu. Qısa zamanda partiyanın şəhər və rayon təşkilatları təsis olundu. Ulu öndər Heydər Əliyevin yaradıcısı olduğu Yeni Azərbaycan Partiyası bu gün Prezident İlham Əliyevin rəhbərliyi ilə uğurla inkişaf edir, sıralarını kəmiyyət və keyfiyyət baxımından daha da möhkəmləndirir. Ulu öndər Heydər Əliyev bildirirdi ki, Yeni Azərbaycan Partiyasına xidmət etmək dövlətə, xalqa xidmət etmək deməkdir. Bu fikrin davamı olaraq isə Prezident İlham Əliyev bildirir ki, Yeni Azərbaycan Partiyasının üzvü olmaq böyük məsuliyyətdir. Bu gün partiyanın 700 minə yaxın üzvü ölkənin inkişafına, tərəqqisinə öz töhfələrini verirlər. Onlar ölkənin ictimai-siyasi həyatında fəal iştirakları ilə həyata keçirilən siyasətə dəstək olduqlarını nümayiş etdirirlər.”

V.Rəhimzadə Azərbaycanın inkişafından söz açaraq vurğulayıb ki, bu tərəqqi ölkənin hər bir vətəndaşında qürur hissi yaratmalıdır. Azərbaycanı qarşıdakı illərdə daha möhtəşəm uğurlar gözləyir. Yeni Azərbaycan Partiyası uğurlu fəaliyyəti ilə dövlətin modernləşmə, yeniləşmə siyasətini dəstəkləyir.

Bildirilib ki, ötən əsrin 90-cı illərinin əvvəllərində insanların hansı durumda olduqları yaddaşlardadır. Onlar sabahla bağlı ümidlərini açıq şəkildə ifadə edə bilmirdilər. Bu gün isə insanların gələcəklə bağlı ümidləri böyükdür. Bunların hamısı Yeni Azərbaycan Partiyasının ulu öndər Heydər Əliyevin və Prezident İlham Əliyevin rəhbərliyi ilə ölkəmizdə həyata keçirdiyi böyük inkişaf proqramlarının nəticələridir.

“Səs” qəzetinin baş redaktoru Bəhruz Quliyev Yeni Azərbaycan Partiyasının yaranma zərurətindən, keçdiyi inkişaf yolundan danışıb. Bildirib ki, partiya zamanın tələbi, xalqın istəyi ilə yaranan partiyadır: “YAP-ın qısa müddətdə ümumxalq partiyasına çevrilməsi uğurlu siyasətə əsaslanır. Yarandığı gündən dövlətə, xalqa xidməti fəaliyyətinin əsasında saxlayan YAP bu gün nəinki ölkənin, regionun aparıcı siyasi təşkilatıdır. 1992-ci il noyabrın 21-də təsis konfransını 550-dən çox nümayəndənin iştirakı ilə keçirən Yeni Azərbaycan Partiyasının sıralarında bu gün 700 minə yaxın üzvün birləşməsi Heydər Əliyev ideyalarına sədaqətin, Prezident İlham Əliyevin həyata keçirdiyi siyasətin gələcəyinə inamın göstəricisidir.”

B.Quliyev Heydər Əliyev siyasətinin uğurlu davamçısı Prezident İlham Əliyevin rəhbərliyi ilə ölkəmizin, eyni zamanda, Yeni Azərbaycan Partiyasının əldə etdiyi uğurlardan bəhs edib. Qeyd edib ki, bu gün Azərbaycan böyük quruculuq meydançasını xatırladır. Goranboy rayonunun timsalında bu inkişafı, tərəqqini aydın şəkildə görmək olur.

Goranboy Rayon İcra Hakimiyyətinin başçısı Nizaməddin Quliyev isə qeyd edib ki, Yeni Azərbaycan Partiyasının yaradılması Azərbaycanın tarixində önəmli bir hadisədir: “Ötən dövrdə Azərbaycan düzgün aparılan siyasət sayəsində inkişaf, tərəqqi yolunda inamla irəliləyərək, bu gün beynəlxalq tədbirlərin keçirilməsi üçün əsas məkana, eyni zamanda, iqtisadi möcüzələr ölkəsinə çevrilib. Bu uğurların fonunda Azərbaycanın müstəqilliyinin ilk illərində yaşadığı ağır durum aydın şəkildə görünür. O illərdə ölkəyə rəhbərlik edənlərin səriştəsizliyi, idarəçilik qabiliyyətlərinin yoxluğu ucbatından Azərbaycan müstəqilliyini itirmək, dünyanın siyasi xəritəsindən silinmək təhlükəsi ilə üz-üzə qalmışdı. Bu gün ölkənin ictimai-siyasi həyatında aparıcı rol oynayan Yeni Azərbaycan Partiyasının yaradılmasını şərtləndirən əsas amillər də məhz həmin dövrün reallıqları idi.”

Sonra konfransda təşkilati məsələlərə baxılıb. Elçin İsmayılov yenidən YAP Goranboy rayon təşkilatının sədri, təşkilatın 31 nəfərdən ibarət Şurası, 5 nəfərdən ibarət nəzarət-təftiş qrupu, həmçinin 11 nəfərdən ibarət İdarə Heyəti və sədr müavinləri seçilib.

Sonda YAP sıralarına qəbul olunan bir qrup gəncə partiyanın üzvlük vəsiqələri təqdim olunub. Bir qrup fəal YAP üzvü isə fəxri fərmanla təltif edilib.