MƏDƏNİYYƏT
Yoxlama prosesindən uğurla keçmiş 17 hotelə keyfiyyət sertifikatları təqdim olunub
Bakı, 30 sentyabr, AZƏRTAC
Sentyabrın 30-da Azərbaycan Turizm Bürosu və Azərbaycan Hotel Assosiasiyası tərəfindən Milli Ulduz təsnifat sistemi əsasında hotellərə ulduz dərəcələrinin verilməsi mərasimi keçirilib.
AZƏRTAC xəbər verir ki, tədbirdə çıxış edən Dövlət Turizm Agentliyinin sədri Fuad Nağıyev 2015-ci ildə turizm sahəsində lisenziyaların ləğv olunmasından sonra bir sıra hotellərin ulduz dərəcəsi ilə təklif etdikləri xidmətlərin üst-üstə düşmədiyini, bəzi hallarda isə ulduzlaşmanın ümumiyyətlə aparılmadığını qeyd edib.
Hotelçiliyin turizmin sütun sahələrindən olduğunu vurğulayan Fuad Nağıyev bildirib ki, ulduzlaşma məqsədilə beynəlxalq standartlar və meyarlar əsas götürülərək, yerli şərait nəzərə alınaraq milli ulduz sistemi yaradılıb.
O, ilkin yoxlamalara əsasən bir sıra hotellərin iddia etdikləri ulduz dərəcəsini ala bilməyəcəklərini, buna səbəbin isə onların malik olduqları şərait və təklif etdikləri xidmətlərin sayının, eləcə də keyfiyyətindəki çatışmazlıqların olduğunu diqqətə çatdırıb.
Fuad Nağıyev iddia etdikləri ulduz dərəcəsini ala bilməyən hotellərə Dövlət Turizm Agentliyi, Azərbaycan Turizm Bürosu və Azərbaycan Hotel Assosiasiyası tərəfindən konsultativ dəstəyin göstəriləcəyini bildirib.
Azərbaycan Turizm Bürosunun Baş icraçı direktoru Florian Zenqstşmid qeyd edib ki, Milli Ulduz təsnifatı əsasında ulduz dərəcələrinin verilməsi hotellər arasında sağlam rəqabət yaradacaq və onlara özlərini daha düzgün təqdim etmək şansı verəcək.
“Bir çox otellər birinci mərhələdən keçə bilməsə də, onların gələcəkdə ulduz ala bilməsi üçün müxtəlif təlimlər həyata keçirilir. Biz bu sistemi Avropa Hotellər Asossiasiyasından götürüb birbaşa Azərbaycana tədbiq etməmişik, biz onu daha da mükəmməlləşdirmişik. Artıq bir neçə ölkələr var ki, bizim təcrübəmizdən yararlanmağa çalışır, nəyisə öyrənmək üçün bizə müraciət edir”, - deyə Florian Zenqstşmid əlavə edib.
Milli Məclisin İqtisadi siyasət və sənaye və sahibkarlıq komitəsinin sədri Tahir Mirkişili çıxışında bildirib ki, Prezident İlham Əliyevin apardığı islahatlardan biri də turizm sahəsidir. Bunun nəticəsində turizm sahəsində çalışan insanların sayı 2019-cu ilin sonlarında 25 mini ötmüşdür. Qeyd edib ki, pandemiya dövründə bu sektor ən çox əziyyət çəkən sektor olsa da dövlətin koronavirus qarşısında atdığı addımlar ciddi irəliləyişlərə səbəb olub. Bir çox insanlar vaksinasiyadan keçdiyi üçün bu sektorun inkişaf etdirilməsi haqqında düşünmək olar.
Milli Ulduz təsnifat sistemini yüksək qiymətləndirən Tahir Mirkişili bildirib ki, hər bir otelin aldığı ulduz müştərilərin ona göstərdikləri məmnuniyyətlə üst-üstə düşəcək:
“Turizm haqqında yeni qanun hazırlanır. Qanunda kifayət qədər yeniliklər var. Turizm sektorunun tənzimlənməsi, sahibkarlara güzəştlərin edilməsi, Qarabağda turizmin inkişaf etdirilməsilə bağlı dövlətin apardığı iqtisadi siyasət bu qanunda öz əksini tapıb. Düşünürəm ki, irəlidə bizi yeniliklər gözləyir. Turizm sektorundan gözlətilərimiz çox böyükdür. Bu sahə Azərbaycanda innovasiyaların tədbiqi və inkişafı baxımından da aparıcı rola malik olacaq”.
Kiçik və Orta Biznesin İnkişafı Agentliyinin (KOBİA) idarə heyətinin sədri Orxan Məmmədov Milli Ulduz təsnifat sistemini yüksək qiymətləndirib. O, təsnifatdan müvəffəqiyyətlə keçmiş otelləri təbrik edib və onlara gələcək işində uğurlar arzulayıb.
Bildlrib ki, Qarabğın işğaldan azad edilməsi turizmin inkişafı üçün yeni imkanlar açıb. Bu bölgənin əsrarəngiz gözəlliyi, münbit şəraiti, zəngin mədəni abidələri səyahətçilər üçün yeni turizm marşrutlarının yaradılmasına gətirib çıxaracaq.
Azərbaycan Hotel Assosiasiyasının idarə heyətinin sədri Martin Kleinmann bildirib ki, bu layihəyə qoşulan qonşu ölkələrdən fərqli olaraq Azərbaycan çətin bir şəraitdə, həm də qısa bir zamanda bu sistemi ölkədə tətbiq edərək bir çox ölkələrə nümunə olub. O, təsnifat sisteminə qoşulan otellərə təşəkkürünü bildirib və onların böhran vəziyyətindən çıxacağına inamını ifadə edib.
Daha sonra yoxlama prosesindən uğurla keçmiş 17 hotelə keyfiyyət sertifikatları təqdim olunub.
Qeyd edək ki, 2019-cu ilin dekabrında Azərbaycan Turizm Bürosuna Azərbaycan Akkreditasiya Mərkəzi tərəfindən hotellərə ulduz verilməsinə görə uyğunluğun qiymətləndirilməsi akkreditasiya attestatı verilib.
Sənədə əsasən Milli Hotel Ulduz Təsnifat Sisteminin icrası Azərbaycan Turizm Bürosu və Azərbaycan Hotel Assosiasiyası arasında imzalanan birgə fəaliyyət müqaviləsinə əsasən həyata keçirilir.